Posted in 【飲食】0-2歲, 【LIFE】2011

薯仔西蘭花, 帶出街食

201108181

今日雖然會帶阿B去俾婆婆湊, 但我唔想因為咁而令阿B冇得食奶以外既食物, 所以朝早佢食完奶之後冇耐, 我就咩埋阿B落街買左個薯仔啦!

我當然係唔知點整又唔知整咩好啦! 所以都係上網參考下….最後決定煲稔D薯仔再加埋西蘭花混埋一齊俾佢食! 仲可以裝埋入尋日新買既碗仔度帶出去食添!

呢個碗仔都真係幾方便呀! 係TOYRUS買超特價, 20蚊!! 不過缺點係唔可以保暖, 所以當帶左出去俾阿B食既時候已經凍哂。

201108182

另外又開左支果汁俾佢飲。係屋企都唔多肯飲, 但出到去最後都飲哂! 叻仔^^

Posted in 【LIFE】2011

阿B唱歌!

繼早兩日拍VIDEO時唔覺, 睇返先發覺阿B識跟住黎唱歌之後, 今日再次有類似既情況出現!

就係我清唱俾佢聽, 而佢又間唔中跟住開幾聲咁! 好得意呀! 希望阿仔可以怏D識講野就好啦!

原來阿仔唔係冇乜點進步到, 而係向左其他方面發展呀!

企果方面佢已經好叻啦! 可以企好耐, 應該係十幾秒啦! 而家仲FEEL到有野可以企上去既就爬添! (其實由上星期開始已經會) 最勁係企係個軟綿綿既枕頭度都可以企好耐!

早幾日又開始教佢”SHAKE HANDS”, 佢又係好快就學識, 我話”BB, SHAKE HANDS” 佢都會好慢咁伸手出黎俾我!

前日收到網上買既波波, 教左佢一次點樣掉返個波俾我, 佢又識啦! 但控制方面當然麻麻啦!

而阿仔既脾氣有時真係令我唔知應該點教好…佢有D咩係想拎黎玩, 但你又唔俾佢時, 佢就會發脾氣大喊! 我最多都係等佢喊多幾聲先哄下佢, 點都唔會因為佢喊而俾佢玩果樣野!

另外, 開始放佢落床仔都唔係次次喊。因為我會同佢玩一陣先, 跟住先行開, 佢多數都會好乖咁自己玩。但如果行開時都係喊, 佢就會喊一陣唔喊, 自己玩。到你返返入去俾佢知道左, 佢就又開始喊架啦! 呢個衰豬…

仲有, 四日前開始同佢戒奶咀, 頭兩日好成功咁完全冇食過! 尋晚都差D得架! 不過佢訓訓下喊, 最後都俾左個奶咀佢啜…其實咁樣反而我都接受! 因為佢唔係無啦啦要食, 而係可能發夢嚇親之類, 需要果一種既安撫…..所以我認為都OK! 不過最好當然都係唔俾佢食啦! 希望快D可以做到!

至於今日呢, 就因為要送去俾婆婆佢地湊, 所以都有俾佢食 (佢地話我知)。