Posted in 【LIFE】2012

白雪公主之魔幻復仇記

今日阿仔去婆婆度玩, 爸爸媽媽夜晚有D時間就去左睇戲。

係媽媽好想睇既白雪公主之魔幻復仇記呀~! (Snow White and The Huntsman)

走果時遲左少少, 車又遲左少少到, 又塞塞地車, 攪到我差點以為會錯過了開頭一些部份! 成個人都DOWN哂! 真係好DOWN!!

好在最後都只不過係遲左幾分鐘!

套戲都OK既~ 我覺得同上次睇果套怪誕黑家族 (Dark Shadows) 都一樣咁好睇!

Posted in 【LIFE】2012, 【學習】興趣班

第三堂 (TIN HAU)

2012年5月30日 (星期三)

阿B真係多節目丫! 又黎到星期三, 上堂啦!

20120530-1

20120530-2

而家阿仔既習慣係9點前飲奶, 11點幾至1點左右食粥 (即第二餐)。

好多時都會食完就眼訓。而今日食完都冇訓過, 所以出門口後搭車冇耐就訓左!

落車都唔醒, 抱住佢行去上堂果度, 好累啊~!! 阿仔好重丫…..

不過去到果度當然醒哂啦! 佢好鐘意呢度….D玩具嘛!!

本來有諗過上完堂同佢去行下街, 不過都係回家好了! 我真係冇咁多..「耐力」….. 20120530-3

Posted in 【LIFE】2012

買左架電單車!

本想搵一架玩具車仔, 不過俾我搵到架好有型好得意既電單車! 好快就決定要買下它!!

人仔155, 加埋運費係港幣238元左右。

好期待佢快D到呀! 不過因為係用EMS, 所以應該都要等起碼兩三日左右。

Posted in 【LIFE】2012

有活動參加左, 但冇去! 因為落雨!!

2012年5月26日 (星期六)

原本今日係參加左一個活動, 但由於出門口前一直都落大雨! 仲要真係幾大下, 最後係冇去到…雖然俾左錢, 但落咁大雨, 我九成都會搭的士去…因為如果唔一出門口就搭, 搭到旺角或觀塘轉車, 都已經濕哂…! 我真係好憎落雨架!!! 邊度都唔駛去….

點知而家又好好天咁…算吧! 期待會再有下次!!

(後記: 如無記錯應該係從facebook既tiger BB媽媽會攪既, 我仲同其中既媽媽傾過咁大雨好唔好去呢? 地點係九龍, 但唔近地鐵站, 又冇車直接去到, 所以最後先放棄)

Posted in 【LIFE】2012, 【學習】興趣班

1小時45分的PLAYGROUP (試堂)

上左兩堂PG, 上星期冇寫, 今次一次過寫返兩日既情況啦!

http://youtu.be/QSQz7yR2aDw

2012年5月16日 (星期三) 第一堂

20120524

呢日同阿仔上一個全新既PLAYGROUP, 係團購而且係轉購返黎! 三百蚊有4堂, 每堂都成1小時45分鐘! 價錢黎講就幾抵啦! (試堂咋喎! 正式幾錢我唔知亦冇問冇睇過)

阿仔鐘意玩車既程度真係勁! 個埸地好多玩具,  佢黎黎去去都係玩車! 仲要係主力玩車輪!! 不論果架係大車定係小小既玩具車!

呢個PG係類似返學形式的, 阿仔好明顯非常唔習慣要佢做呢樣就做呢樣, 唔可以做第二樣野!

上完堂, 阿仔唔肯走! 佢好似好鐘意呢度~~雖然應該係D玩具!! emotion但都比唔鐘意好呀!! emotion

http://youtu.be/OHsmq8jBs24

2012年5月23日 (星期三) 第二堂

今日係直接由屋企出發去上堂, 點知等等下巴士果時, 見住一單 T.A. 發生, 就係一架小巴同一架VAN仔相撞, 似係小巴撞到前面架VAN! ANYWAY, 呢D唔係我關心既問題! 我最關心既問題係….再唔快D攪掂, 我架巴士埋唔到站, 我地就會遲到架啦!!

好在, 雖然未移車, 但仍然可以通車, 慢少少囉, 不過車唔多, 所以都OK!! 咁我地最後上左巴士, 去到果頭都係搭8搭9左右, 仲有15分鐘行過去!!

不過…我真係好笨啊! 睇完地圖都係唔識行, 又行錯左! 最後都係問人果條街點去…行行下開始認得附近, 咁衝左去~~ 連過馬路都亂來了!! 真係對唔住阿仔啊….我都唔想架! 不過我更更唔想既就係遲到!!

其實呢個PG果1小時45分鐘, 頭果15分鐘係俾小朋友玩玩具! 跟住就收玩具, 開始一齊唱歌同玩遊戲啦!

今次阿仔比上次好左D, 比較集中精神同留心左人地做既野。上次一有機會佢就想衝去D玩具度, 今次都有, 不過少左, 而且都乖左, 唔俾佢去玩D玩具都冇上次咁扭計!

食茶點時, 佢忍唔到啦! 可能太餓了! 因呢度要先一齊祈禱後再開動! 佢就係呢下等唔到! 其實係因為佢出門口前仲訓緊覺, 係我狠心整醒佢, 然後餵佢食粥, 所以佢其實食得唔多! 而家就好餓囉!

今次玩手指畫既時候, 我幾乎完全俾佢自己玩! 不過呢, 呢個傻豬唔係用手指點D顏料, 而係用埋其他手指同手側邊! emotion

走既時候佢又冇扭呀! 好乖咁離開! 叻仔左呀!! emotion

之後我地入大埔, 所以要搭巴士, 點知果段時間係勁多人! 我地果個站上車係冇位坐架!! 好在…有位好心既太太 (另外仲有一位好心既女士) 讓座俾我同阿仔, 所以就唔駛咁狼狽了!

阿仔就在大埔住兩晚…佢今日都冇乜點訓, 好累呢! 但係之後去姨婆度更加冇得訓! 因為太多人要同佢玩啦! 我地就寧願唔俾阿B訓, 免得佢俾人整醒仲辛苦…所以, 果下真係覺得…阿B好可憐呀!! emotion

今堂PG多左個老師! 佢話阿B好叻仔, 不過有機會係偏向一邊, 因佢見佢玩車只玩車輪….老師建議我俾多D其他唔同既野佢玩。

今日拎返上堂張點點手指畫, 佢仲表演俾婆婆睇點點畫係點畫添! 唔知阿B識唔識得回憶剛才或之前發生過既事架呢??

又想講下, 阿B既性格, 係上PG有相比較之下, 可見一二。佢係好活躍, 幾乎唔能夠停落黎,如果有一樣吸引佢既野, 佢就會一有機會就走埋去攪果樣野! 雖然佢都會望到老師做D乜, 但時間唔耐, 望一陣就要行要走, 所以同佢黎上堂, 我仲累過佢呢! 因為要成日捉住佢, 捉佢返埋位。講野方面, 俾佢笑死, 上上堂佢望到外面有車就叫CAR! 又成日突然講野, 其他小朋友都好少咁。

Posted in 【LIFE】2012

5月9日 開始行時間表

2012年5月9日 (星期三)

今日開始要跟時間表行事!

原本打算8點起身, 無論阿B醒左未都好, 都起身做左要做既野先!

點知…竟然係阿B醒先 (7點左右吧), 跟住再同我一齊訓, 後來係我10點起身, 而阿B就因為再訓返, 所以未起身。

不過佢冇耐都起身了! 所以就落街買送啦!

但係落完街返屋企已經11點幾, 所以阿B已經肚餓了! 好在早有準備! 買左個蛋糕佢食! 由於當時我要開始整送煲粥, 順便訓練下佢自己進食。點知個衰豬唔食, 係度玩! 玩到D蛋糕落哂落地, 佢又肚餓又喊! 我想佢學識自己食野, 而唔係拎D食物黎玩, 所以唔理佢一陣, 再俾另一件蛋糕佢食, 佢邊喊邊食, 好好笑….不過我好狼心! 佢點喊, 都只係同佢講, D野食要食架, 唔好掉落地呀! 唔係就冇得食架啦!

我唔知咁樣WORK唔WORK, 試下先…

之後同佢玩遊戲, 跟住就食得啦D粥。唔知係咪唔好味, 佢食左一半又唔想食咁, 不過最後都食左9成幾! 最後果幾啖我自己食! 都唔係唔好食丫…只係好似有D怪…

食完就同佢出去啦! 因我約左朋友。

阿B係餐廳都算乖既! 不過就兩次因為攪D醬油, 整到污糟左。到個幾兩個鐘之後, 佢就開始扭計要走! 都算耐啦! 有時係餐廳一個鐘唔夠佢都想走了! 今次算叻仔!

之後同佢行去圖書館, 路程好遠呀! 今日又熱喎! 因為唔想曬哂阿B, 所以抱住佢行快D! 而走果時我自己覺得咁熱好辛苦, 所以選擇左搭的士…

返到屋企阿B玩左陣就自己係張床度訓左了! 乖豬呀! 等媽媽有時間做其他野, 不過其實我自己都好眼訓, 好想訓下, 但都係決定寫下BLOG!^^

今日既時間表應該都OK! 不過如果自己可以早D起身會更好! 早D煲粥俾阿B!不過D送就一定要前一日買定! 唔係就要等到阿B起左身先可以一齊落街買!

睇下聽日8點起唔起到身先! 又要睇下阿B會唔會7點起身又訓返! 如果會既話就可以跟足今日咁做! 但如果佢起左身唔肯訓醒 (佢係我訓係隔離先會訓返! 唔係既話, 佢多數都唔會肯訓架!), 咁又會唔同哂! 因為佢午睡既時間又會唔同左….所以都係聽日又諗啦!

Posted in 【教養篇】, 我看的

聰明寶寶左腦右腦大開發

早幾日去圖書館借左本書

1

令我非常想買左佢! 內容係教你用遊戲既方式去激發左右腦既發展。

吸引既地方係佢有好多遊戲, 針對唔同既發展, 而且每個遊戲篇幅精簡, 無論駛唔駛返工, 多時間定少時間陪小朋友玩, 都可以精簡地利用呢本書既遊戲去幫助小朋友既發展! Continue reading “聰明寶寶左腦右腦大開發”

Posted in 【LIFE】2012

識自己上落樓梯

20120504-1

今日下午去左街市買送, 期間等爸爸的時候, 阿仔係人地舖前面既樓梯上行來行去, 行左好耐, 後來佢想落返黎, 想我扶佢落, 不過我冇扶, 我想等佢自己試下得唔得。

最後係~~ 得左! 勁開心! 再試埋自己上返樓梯, 又得左! YEAH!!

雖然只係好矮既一”及”樓梯, 但都OK啦! 有進步了!

阿仔已經識叫爸媽好耐, 爸爸仲教左佢有野要叫人幫既時候, 就拍拍對方隻手, 叫”爸”或者”媽”, 阿仔好多時都會記得! 不過就好好笑, 因為佢成日都會叫錯架! 拍我但叫爸, 拍爸爸但叫媽!

佢仲會拍完之後講埋佢想要做乜野, 不過由於識講既字有限, 所以暫時講得最多既字係~~”抱”! 同埋”蝦”!! 蝦呢個字, 其實係有兩種解法! 一係就係”CAR”, 一係就係”CARD”! 但佢唔識發個”CA”音, 所以就變左”蝦”! 俾佢笑死啦!!emotion