Posted in 【LIFE】2012, We Two

沙田行街街

2012年6月30日 (星期六) 

阿仔今朝好早起左身, 7點未夠就要飲奶。

爸爸返工後, 阿仔喊住要跟爸爸, 一邊喊一邊講話「街~街~!」

我諗佢又好想去街啦! 呢個衰豬, 成日都扭去街丫~~

所以冇幾耐我都帶左佢出街, 出門口時落緊微雨。

不過阿仔鐘意去街, 都照同佢去啦!!

20120630-1

其實冇咩頭緒要去邊, 因為帶住阿仔想買野都唔係幾方便。

出去一定搭地鐵, 近丫嘛! 阿仔鐘意行商埸, 想去D出閘就係商埸既地方! 有諗過去旺角新世紀, 但就要轉火車, 唔係好想再轉火車, 所以打算去又一城。

去到九龍塘火車站, 搵緊邊度出口, 阿仔見到火車站月台已經大叫TRAIN, 又企係度唔郁! 好明顯佢好想睇或搭火車! 所以最後都係上左火車, 因為咁岩真係有架車到站!

最後就去左沙田, 阿仔幾開心幾興奮! 成日都唔要我拖! (佢一興奮就係咁架啦) 自己走走走~~~

慢慢行左去一田果邊, 再落地下行左陣, 係間BOOK SHOP (好多教育玩具同書果間, book castle?) 度停留得最耐! 阿仔對果D有得玩既書好有興趣, 不停”禁”。

有幾本ELMO都幾得意, 我真係好想買呀~~~ 不過本本都差不多兩舊水一本, 如果真係要買, 絕對要揀清揀楚! 

之後去買左兩個麵包, 一路行一路俾阿仔食, 點知食食下佢眼訓到要抱, 然後一抱就即刻訓左啦!! 如果搭返火車轉地鐵回家, 咁就要轉三次車…同埋我驚冇位坐….唔通叫醒阿仔? 定係又膽粗粗地問人可唔可以讓座呢? 我選擇左…….都係搭的士啦! 不過80蚊, 係去程時既10倍有多!!! 而家一百蚊對我黎講真係好多, 但係搭車真係我弱項! 慳唔到呀………!!

返到屋企~ 唔~~ 都係1點半左右!  

Posted in 【LIFE】2012

新車~ POLICE CAR

2012年6月26日 (星期二)

今天爸爸突然放假, 去左對面果邊間「明星」度飲茶。

竟然唔記得帶架車俾阿仔玩! 所以爸爸就即刻去買架新車! 就係呢架啦!

20120626

而家同阿仔出街, 佢都實係一隻甚至兩隻手拎住架玩具車先肯行! 有時佢唔記得拎, 我都會拎。尤其是去飲茶食飯之類, 唔帶定架車俾佢玩真係好大獲架! 佢會周圍攪呢樣攪果樣, 帶左車會好好多!

Posted in 【LIFE】2012

第一位客人

今日我好朋友黎左搵我同阿仔! 好開心, 亦好多謝佢! 係我搬黎呢度第一位黎探我既朋友! 

希望盡快黎到探你BB啦! 做左人阿媽真係好多野諗好多野煩呢~~!!

我地都要努力呀!!

Posted in 【LIFE】2012

搭地鐵

今日去左大埔食飯 (做節)。

回程既時候因為等唔到小巴, 上左另一架, 要係太子轉地鐵。

阿仔已經累不到堪, 訓得好林! 抱住佢上車, 有位好心既太太讓位俾我坐, 我好多謝佢!

Posted in 【LIFE】2012

剛剛識講既短句

阿仔識講GOOD NIGHT了!! 仲要講得幾正架! 我好早已經開始晚晚同佢講GOOD NIGHT, 真開心阿仔到左快歲半前就識講了! 希望再識埋GOOD MORNING啦!!

又識叫”DADDY”! 唔係爸爸, 係DADDY!! 叫得好攪笑!!

亦已識最少至20既英文, 因為一路同佢數, 佢TWENTY都識接落去!

而近來亦開始教佢星期幾, 同埋月份。

一個星期前左右, 阿仔訓訓下突然彈左起身, 手做埋動作咁講左合字”TALL”, 跟住又訓返!! 好好笑!

不過果下突然覺得…阿仔咁樣好似好可憐咁?? 連訓覺, 定係發夢, 都諗住學習既野….

但係, 小朋友白紙一張, 你俾咩佢就接收乜野, 佢習慣左既野, 其實對佢黎講唔係一件慘事或者係辛苦事吧? 而且佢都好喜歡學習! 教佢一樣野, 佢除左好快就學到記到之外(當然有時都會之後唔記得左), 亦都明顯見到佢真係好想學!

例如, 過馬路咁, RED IS STOP, GREEN IS GO。佢而家每次見到紅綠燈都會叫”RED”或者”GREEN”, 仲有車呀, 貨車呀, 的士呀等等~~ 總之叫到你要應佢為止!! 唔係就會一路講果樣野! 甚至佢會拍下你, 叫你, 你應佢之後, 佢就再講果樣野!

顏色果方面阿仔好似比較弱, 問親佢咩色都好似亂答咁, 講開RED, 就問親佢都答RED…而家就係咁, 問佢咩色一定係答你RED!! 顏色分組, 佢又好似唔識咁, 唔肯分或者分錯哂…其實我有D擔心呀…

Posted in 【LIFE】2012

教育孩子

讚美孩子, 說話用「用功」比「聰明」好。
如:「孩子很捧啊! 你一定很用功」, 比這句好:「孩子很捧啊! 你一定很聰明」

愈努力, 才會愈聰明, 才會愈能幹。

 

(書 : 教子心經)
早幾日係圖書館偕。
呢本書幾好呀! 幾有深度! 繼續睇!!

Posted in 【LIFE】2012

自己數1, 2, 3

2012年6月22日 (星期五)

今日如常同阿仔去寄野, 跟住就去圖書館。

尋日都係同樣既動作, 不過原來呢度既圖書館係星期四休息的…

係郵局買郵票, 跟住人地找錢, 阿仔就大聲叫”MONEY“! 把聲真係超可愛…阿仔我真係愛到你不得了呀….!! 

大概係個幾星期前, 同阿仔一齊數ONE, TWO, THREE, 佢都識得接落去。不過有時會跳左一兩個數字, 例如SIX跳去EIGHT, 因佢唔識個SEVEN發音!

呢兩日, 佢就開始自己數”ONE, TWO, THREE, FOUR….”, 講得唔太正, 加上佢把聲, 真係好攪笑!! 佢係好似VIDEO既小朋友咁既音調~~ 非我地平時果種讀音! 連我自己都因為跟阿仔一齊學, 所以自己D讀音都係唔同左!

我認為同小朋友一齊學習係一件好好既事! 既可知道自己不足而努力, 又可以親子活動! 阿仔都好鐘意學習架!! 所以我更加要努力學好D英文!! 唔係佢再大個D, 我真係冇野可以教到佢了……

 

至於今日係圖書館, 佢就係咁自己數數字~~ 仲要大大聲咁, 叫佢細聲D都唔聽。

不過呢度冇果邊果間圖書館D人咁煩, 擺明企你隔離望住你個小朋友!

我唔會理佢! (講開先講, 呢樣野想講好耐!!) 只要阿仔唔過份, 我都會由佢自己去「玩」D書, 佢唔擺返原位我先會叫佢擺, 如果佢都係唔擺我會自己去擺。我相信唔會得我一個係咁樣做! 但係點解每次果D人都係咁既呢? 仲有, 阿仔佢咁細個, 當然唔太識控制亦唔多知道圖書館係唔可以大聲或嘈吵, 圖書館係一個公眾既地方, 而我黎呢度係兒童圖書館, 我個仔都可以享有黎呢度既權利囉! 你理佢真係識睇書唔識睇書丫! 只要唔過份, 根本唔需要你一下就要即刻同我黎個下馬威! 咩事丫而家! 你估你嚇人多定我嚇人多丫拿??!! 你呢D只係超低程度既LEVEL囉!!! 食Q!!!

Posted in 【LIFE】2012

醫生都幾肯定咁話阿仔係哮喘!

2012年6月14日 (星期四) 

今日帶左阿仔去睇梁醫生。

我好直接咁問醫生阿仔係咪有哮喘, 佢竟然答左我最唔想既答案!!!

雖然佢話有D小朋友會頭幾年有, 之後會冇, 但我真係超唔想…..咁樣好辛苦架…….唉!! 都係我唔好………

阿仔第一餐奶係6點, 之後訓到10點幾, 今日冇聞過氣。起身之後佢其實都幾精神架! 係有咳囉! 同埋有D熱熱地, 因為有少少燒。

返到樓下買左個飯, 就同阿仔係屋企開餐。其實佢都冇咩胃口, 食唔多。

訓左三個小時有多之後, 起身同佢沖涼, 再飲奶, 舒舒服服~~ 就食藥啦! 

呢次冇之前咁乖啦! 之前都肯啜架, 可能上次果D好味啦! 聞落都有果汁味! 可能飲落仲好味! 哈!

但今次真係唔好味, 所以每次食藥阿仔都狂喊! 

 

期間婆婆同姨婆都有打電話黎問阿仔點, 好多謝大家關心…
好在阿仔成日都好精神咁玩, 只係食少左, 仍然係咁多野講咁令人發笑!!

頭先教佢講”電腦”二字, 同埋”紅色”, 佢講到D音鬼咁高! 笑死我啦!!

尋晚就親耳聽到阿仔扮蟬叫, 好得意呀! 仲有識講”迪仔” (史迪仔)

Posted in 【LIFE】2012, 【LIFE】生病紀錄

阿仔病左, 仲要氣喘……

2012年6月13日 (星期三)

阿B病了! 仲要呼吸好辛苦咁, 應該係氣喘……

本來話聽日先去接佢, 但因為咁, 就今日夜晚接。

一去到第一時間俾阿仔聞氣, 即刻舒服哂!

不過係電話度聽到阿仔喊, 真係超心痛架! 當時已經好想入去拎舊野俾佢聞…

話說前兩晚將阿仔交俾姨媽果時因為我冇俾到件外套佢, 而之後佢地去既地方又勁大冷氣, 一冷一熱咁阿仔就病了!

一病, 佢條氣就好容易唔順? 我都唔係太記得係咪! 因我冇印象係嚴重! 只記得佢病就會有啖, 俾佢聞氣就訓得好D! 呼吸大聲成咁真係好少………

走果時搭的士, 個司機又好好人, 幾多野講。佢仲話阿仔好乖添! 可能係因為佢病但又冇扭計?

今日日期阿仔唔係屋企, 自己一個人又諗野諗到好唔開心。
其實唔想諗, 但聽到一首又一首既歌, 眼淚就流左落黎, 都唔知乜事, 完全控制唔到!

Posted in 【LIFE】2012

賣玩具

因為搬左去一間好細既屋, 所以阿B一D大型既玩具要賣了!

第一件就係跳跳虎搖椅! 其實阿B係好鐘意玩架! 佢失驚無神就會走埋去, (不過多數都係企上去=.=”) 搖幾下。最記得就係呢個衰豬明知我地唔俾佢企上去玩, 佢都要望住你,博你唔鬧佢咁玩!!

第二件就係學步車啦! 呢架車其實都唔係買左好耐喳嘛! 舊年返工冇耐買…即係11月至12月啦! 都未夠半年!! 記得初買返黎佢唔識玩, 淨係識企係度玩, 架車俾佢玩到向前行時佢都係雙腳企定定唔郁! 到後來, 我突然諗到同佢一齊扶住架車同佢一齊行, 佢就玩得好開心啦! 之後仲行得勁快添!! 不過其實都有D危險! 有時唔覺得推前左個人就會容易跌, 甚至撞到個玩具。阿B尤其喜歡玩D車輪! 每次玩親佢, 都一定係玩D WHEELS!!

其實我真係真係好唔捨得佢D玩具架!!! 咁就賣左啦~~ 咁就冇左啦~~ (我哭!!) 一件玩具, 代表左好多好多既回憶….死啦!! 來日方長! 阿B仲有好多好多既玩具架喎!!! 遲早都係要掉, 我咪一直都會好懷念佢D玩具囉!!??

Posted in 【FTM】心情記事, 【LIFE】2012

新居第2天@2012

P6085209.JPG

2012年6月9日 (星期六)

講唔該 — 尋日同阿仔落街, 唔記得係去食野果時定係幾時, 佢聽到我同人講唔該, 佢就跟住講, 之後仲成日都講添! 尤其係每次我講完, 佢都跟手就講埋一份! 笑死我啦!!

今朝早同阿仔去食早餐時, 佢就講啦! 跟住第二轉落街, 拎衫去洗。由地鐵站行上黎時, 有個姐姐派傳單俾佢, 佢接左之後竟然識得講唔該! 哈哈~~~自己個仔…始終都係覺得係非常非常可愛! 不過又覺得客觀d黎講, 佢真係好鬼得人鐘意丫!!

好似呢兩日出街咁, 都幾多人會望住佢, 同佢玩下, 同我吹兩句, 例如問佢幾大啦! (通常都係問呢樣野! 我自己都係啦! 不過俾著我, 通常係見到一d我覺得比較叻既小朋友先會問, 或者係同對方傾開計!)

但對於主動撩佢既街外人, 佢仍然係好怕醜, 唔多肯講HELLO, 拜拜就好D! 因為佢明白係會同對方分別嘛!!

新居 — 今日第一次係度同阿仔沖涼, 因冇地方, 所以要用花灑。佢不嬲都好怕架啦, 但真係冇辦法啊! 佢喊到…好勁!! 又係喊到狂咳, 我見佢眼白都紅哂添呀!!! 嚇到我死死下!! 唉~~~ 來日方長, 唔知佢幾時先唔驚呢….見到我咁我真係好驚呀!! 我仲驚過佢………

今晚又係去左西九龍FOOD COURT食飯。原來果度食野都幾平呀! 不過唔知係咪自己唔好彩, 兩晚叫既野都唔係咁好食! 我都係揀D岩阿仔食既野, 因為未有得煲粥住, 所以夜晚想佢食返D肉同菜。

Continue reading “新居第2天@2012”

Posted in 【LIFE】2012

接歌

而家阿仔經常令我笑翻了!!

實在無比可愛, 又非常聰明!!

前晚我跟他唱教材裡的歌, 刻意唱到一半讓他接著唱。想不到很多他都能接上呢! 真是太出乎意料之外了! 當然也非常非常高興! 又有種「安慰」的感覺!!

不過佢始終未識跟住MELODY來啍歌。

至於數字, 佢第一個就係講NINE, 跟住EIGHT佢都好記得, 同佢一齊數, 其實佢係識哂! 不過都係成日唔鐘意聽聽話話咁話你知佢識囉!

顏色, 我由佢好細個已開始教, 不過唔知點解佢好遲先開始學識咁。最叻咪係睇交通燈, 見紅就RED, 有時講埋STOP。見綠就GREEN, 好少講埋GO。

果D LAMP呀, BUS肯定係講得最多。

呢排都開始講DARK, MOON, AIRPLANE等~~

總之, 一出街, 佢就講個不停, 仲要一定要人應佢! 唔應佢, 佢就一直係咁講, 望住你, 大大聲講, 你唔應佢都係唔得架囉!! emotion

喂? B? <<< 呢排成日都講既說話! 加埋佢講野唔多正, 勁攪笑!!

Posted in 【LIFE】2012

搬家了!

2012年6月7日 (星期四)

接下來的日子, 可能會有點辛苦…不過, 有一個真正屬於自己的家, 還比甚麼都好! 而且更有一個一生中最愛既人~~阿仔在我身邊, 心足矣!!!

昨天開始執拾, 最成功的就是今天已經能上網了! 因剛剛裝好了寬頻, 而且良久都沒有動手去插電腦線的我, 努力地把線插好!

現代人…生活就是這樣吧??!! 沒有電腦的日子很不知怎過?? emotion

東西多得很! 要執拾好也許要多幾天呢….還未買雪櫃, 又沒有”針板”, 未能為阿仔煲粥, 今早起來兩餐都是飲奶奶~~可憐啊~~! 現在還睡得很甜! 因為他昨晚跟我們一起”辛勞”到半夜一點多才肯睡覺!emotion

Posted in 【LIFE】2012

跌倒

果日帶住阿仔去郵局, 原本想係樓下等的士, 點知等左一陣都冇車, 唯有行落的士站啦!

點知行行下阿仔跌倒, 雖然拖住我, 但仍然跌損左右邊KNEE, 仲要幾傷下…

之後我同佢講話你跌倒, 佢係咁跟住我講。

去到又同婆婆姨婆佢地講! 聽佢地講返, 係見到人就話跌倒! 跟住又識得攪完D野之後話痛。

婆婆話阿B好乖, 訓醒覺冇嘈醒佢, 自己玩, 到婆婆起身時, 阿B就走埋去叫佢”婆”! 識叫人, 好叻仔!

Posted in 【LIFE】2012

2012年5月總結

呢個月以黎, 阿B有好大既進步, 例如突然間識讀APPLE, 又發覺原來佢好多個英文字都記得! 指住個字, 然後阿B識讀出黎果下既感覺真係好奇妙呀! 好得意! 個心又好安慰! 不枉我”無時無刻”都教佢野!

最SURPRISE果下係, 前兩日我先後寫出C,A,T, 阿B當然識呢D字母, 但最驚喜既係, 佢識讀 “CAT”!!跟住我又寫D,O,G, 佢又識讀係DOG!!! 開心到我彈起呀!!!

有D字卡, 佢簡直就如同教材錄影中既小朋友咁, 識讀D字! 果種感覺真係難以言喻!!

好可惜, 自己既英文唔叻, 唔能夠再教更多俾阿B, 但我仍然會繼續努力, 盡量將自己識既野同阿B講多D, 教佢多D!

而家阿B亦開始發幾個音, 例如UMBRELLA, 同埋佢一直都好鐘意講既”CAR”, “ON ROAD” (the car is on the road), 好攪笑架! 聽到佢有努力學習呢!

尋日又突然叫我”媽媽”, 但佢既音真係好特別…好似D日本人叫媽媽果種音呢! 即係類似”媽麻”。

一直以黎佢叫我都叫到好似”馬+晚”音咁, 有時喊既時候叫我都會重覆叫媽媽媽媽。

同埋佢其實都幾多野講, 又好鐘意跟人講野。我有時同佢係屋企, 我講乜佢就跟住我講乜, 好好笑, 對住阿仔真係好開心, 而且慢慢一日一日咁見住佢識既野愈來愈多, 亦都非常非常開心同滿足!!

BB~ I LOVE YOU!!!

睇書話中國人唔會常將我愛你講出口, 我諗我對住阿仔唔會!! 我而家都經常對住佢講MAMA love you so much!! 同埋I LOVE YOU MAX!!

另外, 閃卡已經好少玩了! 當然呢排我冇返工又開始同佢玩返, 不過都係唔多記錄每日玩, 總之記得既時候我就會同佢玩啦! 即使有冇成效都好, 我都相信會有一定用處既!!