Posted in 【LIFE】2012

發展情況:英文, 食飯, 去廁所

1Y7M – 一歲七個月

阿仔近日講既英文開始有尾音啦! 例如 CAT 有T音, YES 有S音!
另外, 教左好耐既GOOD MORNING, 佢開始起身時主動同我講啦!
仲有GOOD NIGHT, 不過相對較少。

而”THANK YOU”, “唔該哂” (阿仔係會加個”哂”字!! 好好笑!)
有一兩次都記得同主動講! 希望之後都記得多D啦!!

而近兩個星期左右, 佢亦都開始多左自己拎D書出黎睇!
至於LOOK卡就少左, 應該係因為我少左拎出黎同佢玩…我真係衰呀….
但係部Leap Pad 呢, 佢就好主動咁成日叫人同佢玩!
開下關下咁, 都係因為佢鐘意按d制….不過都有點本書既, 未聽完就點來點去囉!

食飯方面, 仲未識自己食! 佢肯學肯試, 但只係開頭果一陣間, 轉頭就唔試。
日頭我同佢既時候, 我會開頭果幾啖捉住佢隻手同佢一齊食, 但之後我會放手由佢自己食, 食就食, 唔食就到咁上下時間收左佢。阿仔通常都係我唔幫佢既時候就唔肯自己食, 跟住就喊! 喊到我收野同俾佢出黎為止。
但之後佢當然會好快又餓啦! 我就會俾生果佢食, 直至到晚飯一齊食。

去廁所方面, 小便都係未得! 開大就退左步! 之前都有試過開大前出聲, 趕我切坐低, 但自從果次之後一日, 去左姨婆度之後返黎就忘記左咁!! 連all左之後都冇出聲!! 跟住咪又話佢啦! 佢就開始講返, 但仍然係遲左講。
尋日買左幾條學習訓練褲仔俾佢, 希望訓練到佢小便啦!

目標係8月份之內能夠成功咁訓練到佢去廁所小便!! 大便既就要繼續努力!

Posted in 【LIFE】2012

我既第一次!! (媽媽的)

19同20號係我人生既第一次同第二次!!

就係成餐飯都係自己親自下廚! 絕對係我既人生大事呢!!

呢兩三年實在太多第一次啦…果D以前從來都唔駛我做既野都幾乎做哂! 從今起可能會步入”入得廚房,出得廳堂”之列啦! 哈哈哈…emotion

20120720

Posted in 【LIFE】2012

又係淘寶買左好多野

呢幾日又係淘寶買左好多野俾阿仔!

第一樣係手指畫既顏料

第二樣就係之前提過既積木, 不過唔係LEGO, 係普通疊上去果D。

因為諗諗下, 下下要佢大力合大力拆, 就唔係玩積木了….! 係比積木玩!! emotion

我意思係…我係想佢用疊積木來發揮下創意! OH~錯! 唔應該用發揮, 用發展會好D! ^___^

另外就係一D搭單買埋既玩具, 都揀左好耐架!! emotion

Posted in 【LIFE】2012

學講野~ 3個字

阿仔多野講已經唔係呢排既事, 不過應該係上星期開始, 佢開始學講三個字以上既字句。(UMBRELLA除外)

例如同婆婆, 姨婆分別果晚, 我同阿B上左小巴, 我就同阿仔講:「阿婆走左啦~ 姨婆都走左啦~」

阿仔就話:「婆~~ 走~~ 」, 跟住再講:「E~~ 婆~~ 走~~ 」(D音全部高幾度)

打後果幾日都得閒無事講: 婆婆~~走~~, E~~婆~~走~~!

又例如爸爸去廁所, 佢就話: 爸爸~~ 廁所~~! 等等~~

Posted in 【LIFE】2012

第一次係BB坐廁上去便便

2012年7月1日 ~~ 係阿B第一次係BB坐廁上去便便既日子!

當時阿B突然間話:「ALL屎!」我就問佢一句:「係唔係要ALL屎呀?」佢答我話係, 於是即刻除佢條褲拉佢去佢個坐廁度ALL!

一除褲就見到都ALL左一大堆, 不過都要坐落去ALL架啦~~ 要俾佢知道ALL都係呢度ALL。

之後呢幾日都係一樣, 阿仔會突然間話ALL S, 咁我都係會拉佢去坐廁所。好似尋日咁就最成功啦! 雖然都係ALL左係條片度, 不過都有一半係廁所度。

而 今日, 阿仔好似有D玩野成份!! 同佢出左街, 佢又話ALL S, 唔知係咪「形住」, 我都好似聞到D味, 點知返到屋企望, 原來係冇囉! 之後食左D野, 佢又話ALL, C同尿都有講過! 但去到廁所坐左好耐都冇!! 到有次我做緊其他野佢又話ALL, 我都唔知信唔信佢好啦! 而且我都唔得閒!! 但呢次竟然係真!! 好似狼來了咁~_~!!

俾阿仔激C左啦~~~~! emotion

 

其實呢~ 之前阿B係姨婆婆度都試過話ALL, 然後真係坐左係大人廁所度ALL左。

唔知佢幾時可以真係學識呢….??