阿仔成日話想去 picnic，舊年去過一次，可能佢唔記得啦！前排因為老師講同佢地介紹過迪士尼快線，佢就話好想搭。
呢排又拎返套美語教材既碟黎聽，就更加想去。
尋日先知道今日爸爸要返工，所以尋晚就決定今日同佢搭下迪士尼快線兼去埋野餐啦！次次同爸爸去都係揸車，所以都冇機會搭！仲唔襯呢個機會去搭返次？我都未搭過吔~！
朝早等阿仔起身再出街買野準備整野食，返屋企整左三樣好簡單既野食帶去: 芝士火腿三文治，什果沙律，唐生菜雞肉。如果有「迪士尼美語世界」既家長一定會對呢三樣野有點印象！事實上，阿仔就係要做到幾乎一樣！最好笑係佢曾經講過要打 baseball！一諗起呢樣野我真係忍唔住笑到流眼淚，實在太可愛啦！去 picnic，整 sandwich, chicken 我都仲可以，講到 baseball 就…真係幫你唔到呀仔…..！
我地1點幾出發，搭地鐵去到荔景轉東涌線，呢條橙色線亦都係佢成日都好想搭既！終於都搭到啦！所以話，尋晚同佢講完今日會帶佢去邊之後，佢係咁話好開心呀！Yeah etc….
去到欣澳站就轉迪士尼線啦！佢係第一次親眼見到架車係點，上到車又好興奮咁即刻跳上 mickey 窗前面個位望出去。
好快就到達迪士尼resort呢個站啦！我同佢既心情一樣咁興奮，但都覺得有點兒失落，就係我地只不過係去迪欣湖，不過呢個先係我地今日既目的地嘛！為何要失落呢？可能係因為諗到阿仔幾咁想去迪士尼樂園啦！
兩點正落車，出閘後就慢慢行下望下咁去巴士站，見到R8再睇清楚先去排隊。
等左三至五分鐘就可以上車啦！車程好快，大概5分鐘內到。
一落車跟大隊咁行，兩三分鐘就到左啦！
第一樣見到既係遊樂場，不過緊係唔去住啦！
我地都肚餓啦！即刻入去搵個位坐低開餐！
好多人呀！個湖都好靚！
一入到去已經見到有得租艇仔同租單車，望一望，有一樣已經full左，但冇留意係乜。
我地第一次黎，又得我地兩個，所以都冇諗住租黎玩，得我一個踩乜都大獲啦…
專誠搵左個可以望到迪士尼快線列車既位，拎張墊出黎就坐低食野。
阿仔佢好開心，睇返呢張相，見到佢既笑容，個心好滿足，能夠令到佢開心真係比令到自己開心更滿足！（自己開心就只有自己開心，佢開心=兩個人都開心）
食到飽啦，佢話要去堆石果邊玩，但我發現原來好遠下，我緊係要同佢一齊去啦！又即刻收返哂D野起行！
佢好開心咁呢舊石爬下，果舊石跳下咁，然後我地就一直圍住個湖咁行左個圈。
呢度名副其實只係一個湖，好大既湖，外加一個兒童遊樂場。已經可以令到小朋友勁開心啦！沿途都有好多個”station”俾大人或小朋友做下運動，阿仔每行經一個都要去玩下。
行完又影完相，我地就出去個公園度玩。佢見到好多小朋友除哂衫係個地面噴水池度玩水，好羨慕好想去玩，但我冇帶多套衫俾佢又冇毛巾抹身，所以話下次準備左先玩，佢都好乖咁話好！而且之後亦提過幾次話下次要帶衫同毛巾再去玩過，最好笑係佢話要除埋底褲！！
大約4點40分, 我地正式離開迪欣湖活動中心。
搭返R8去迪士尼站，行左去迪士尼樂園前面既噴水池。
要離開啦～入閘後見到時間係5點正，即係前後我地玩左3個鐘。
返到屋企我竟然攰到暈！但仍然要休息一陣再出去買野，唔買唔得！
今日佢非常開心，瞓覺時都話要再去迪欣湖玩！
