Posted in 【學習】K2

K2下學期功課

image
有加數啦
image
藝術?!

呢個仔,我俾佢笑死啦!明明我去瞓午覺前見到佢做好左上面既配對,我瞓醒起身就見到佢將D線改成咁樣!

但佢好乖仔,係我瞓覺期間做左兩張工作紙,寫左兩行數字。跟住佢入房話「我攰啦!」就開始瞓覺。當時係6點幾!我地去完公園返屋企已經5點啦!沖埋涼食埋野5點幾,即係佢用左一個鐘頭黎做,又冇人睇住佢,叻左呀!陣間起身要讚下佢先得!!

Posted in 【LIFE】2015, 【學習】興趣班, 【學習】K2

公園引發的謎思

image

返埋今日就放假啦!(1/5 紅日)
今日係星期四,由於再上一個星期四冇上到普通話堂,所以今日補堂,兩點開始,上到四點!
點知阿仔冇話攰,或者悶呀、好耐呀等等~ 回家路上我問佢去唔去公園玩一陣,佢竟然好乖巧咁同我講:「返屋企啦!要做功課啦!」可能佢想氹我開心,不過我早已打算同佢去玩,反而變左我鼓勵佢去!佢就非常興奮咁話好呀!去玩一陣啦!我好想去玩呀!
傻瓜…我知你一定想去既!只不過驚我話佢未做功課者!

image

原本打算玩20分鐘,不過玩左唔夠一陣,附近間幼稚園放學,好多小朋友黎玩,阿仔就愈玩愈開心,咁就玩左差唔多40至50分鐘。
期間佢曾經坐係上滑梯條樓梯度,有個女仔去上,阿仔又唔讓人,個女仔竟然一腳踩上阿仔大脾上!我即刻走埋去!
又,有個男仔突然大哭,咁岩阿仔之前好係佢附近,不過走開左。我聽到佢話有個男仔推佢定打佢,我幾驚係我個仔呀!原來唔係!其實我個仔佢極少會出手打人,推人都有可能,但係玩到忘哂形果種,所以都有諗過會唔會係佢。
阿仔佢比較鍾意同女仔玩,都好!我見間幼稚園有幾個男仔一齊玩,玩得好癲下,跌落地啦,一個疊一個咁,仲要見到都走埋去瞓埋一份,我就諗:老師講得岩,佢話如果讀男校,怕唔怕會曳呢?
果下真係嚇到有D驚!阿仔已經屬於活躍(活潑)份子,如果再加多兩三個同類型既就…諗到都想暈啦!

講返少少普通話堂既野,我差唔多夠鐘先上去,佢地仲上緊堂,我望入去,見到得兩個小朋友,另一個就好專心咁望住老師,而我仔就…雖然坐定定,但就望左唔知去邊!我聽到老師問佢問題,我仔全程答廣東話……
落堂時我問老師阿仔上堂既表現,係咪好唔專心。佢竟然答我唔係,係因為佢好聰明,一聽就明,所以唔洗望住佢!(下???)
不過,再一次聽到呢個 point,真係要我相信?聰明既人係唔駛聽書架咩?學校老師有講過話佢聽覺型,所以好多野佢聽左就已經記左係個腦度。希望係啦…
總之聽到正面既評價我已經好開心,但唔會滿足。