【計數】做練習＆出題目

每日學習@20150716 星期四
上課：學校（生日會），普通話（連上兩堂補堂）

返埋聽日就放暑假啦！
我可以瞓晏啲啦！好開心！XD

今日同佢做呢本：階梯數學4

佢都幾鍾意做數學！一做又做左幾頁先話攰。
期間我發現，應該話更確定佢既計算能力，於是自己寫左啲題目俾佢計。
佢對1x既數唔係好明，同佢解釋例如13，即係10+3，所以13+7，可以先計3+7，然後先加返10。
咁我就發現佢對構成10既加數都唔太了解。（即例如1+9, 2+8, 3+7 等等）

我同佢講，遇到1+7時可以倒轉去計，即以7+1去計，咁出錯既機會就少Ｄ。
又例如2+7，可以倒轉為7+2，只需要拎7隻手指出黎，再拎多兩隻就計到。（佢會照拎兩隻手指，再慢慢加7隻）
即係話，唔好講10，連呢Ｄ基本既都唔太識計，所以我決定自己寫題目俾佢練熟Ｄ，唔駛下下都數手指。

我打算之後每日俾出類似既題目俾佢做，用埋計時既方法當作一個挑戰自己既遊戲。
而今日既成績係用左9分36秒，答錯一題。（7+2, 計錯為8）

講開又講，知道一位媽媽教個小朋友用背既形式去記住形成10既加數，即係”九加一係十”，”八加二係十”之類啦！好似乘數表咁背，其實背又唔好….我認為等阿仔自己計下，計多Ｄ，佢慢慢就會理解到其中既奧妙！

至於乘數表，爸爸話果日聽講座個老師話唯一要既係背乘數表，因為就好似條公式咁，唔需要佢明白住，而家咁細亦都唔會明…儘管如此，我仍然係經常搵機會同阿仔解釋乘法係點用。

好似今日咁，同佢行書店，佢見到副PUZZLE就走去數有幾多塊，而副PUZZLE既排列好整齊，我就同佢講，打橫有五塊，打直有四塊，四五中二十，唔駛用手指數，就咁已經知道呢度有二十塊砌圖啦！

今日冇講故事…阿仔好早就瞓啦！佢上完兩堂已經好攰，但返到屋企又唔肯瞓，冇瞓晏覺所以9點半都未夠就瞓左。