2016年7月13日 (星期三)
參加左兩年幼稚園畢業典禮, 今次終於到 Max 畢業啦！地點仍然係: 國際基督教優質音樂中學暨小學 – 以勒音樂廳
爸爸兩年都冇去到, 今年又點可以唔去呢？！不過我地有D野要做而遲左超過30分鐘先入埸, 好在小朋友都未開始表演, 而且仲可聽到兩位嘉賓同校長既演講。
我地坐第二行靠左邊既位置, 上面隻 Minion 已經係座位度等緊我地啦！
首先係頒發畢業證書, 阿仔佢緊張到兩隻手十分「僵直」…好可愛呀！！（由於我地坐得比較側, 所以D相影得都唔係咁好….好在有其他家長 share D 相出黎, 感激！）
跟住就係頒獎啦！原來阿仔佢有份拎獎！！係禮貌獎！！
自從K1上學期拎過一次之後就冇再拎過啦…今次仲要有份上台領獎, What a BONUS!!
(照片是完埸後拎住個獎座影的)
然後就全體K3同學仔出黎唱歌。
唱完歌仔, 小朋友就分批落台, 拎份小禮物送俾爸爸媽媽！仲可以用極速影兩張相。
跟住就係大家最期待既表演環節啦！今年K3既小朋友表演既話劇係講環保, 而唔係過去兩年所睇到既關於聖經既故事, 幾有新意！
下面兩張相都係同學仔爸媽影的, 真係好多謝佢地, 因為我地坐既位同阿仔企既位係打哂斜對面….用手提電話影係點 zoom 都影唔到！
阿仔係話劇中扮演好重要既角色！就係扮樹啦！睇佢幾認真！
佢仲有一句單人（樹）獨白添！就係：「不過我地見到呢個環境乾淨左，好開心呀！」
臨完埸前既一曲, 全部小朋友載歌載舞, 真係一個好難忘既演出同經驗！！
多謝學校每年都俾機會全校既同學仔參與表演呢！唔只小朋友, 做父母同家長既都十分興奮同難忘！光陰似箭, 最後一年既畢業典禮亦都話咁快就完結了！阿仔都話唔捨得呢！雖然冇同學們會同阿仔同一間小學, 但可能第時中學會有機會再見呢？？！希望各位小朋友都有一個開心愉快既童年, 有緣再會…
