9月5日 (星期一)
六點起身, 不過都係我叫先起到, 雖然佢間房有鬧鐘, 但係佢好似聽唔到咁。
梳洗完之後就去食早餐：牛奶＋粟米片。
食完野再執好哂野之後仲有時候剩, 我決定聽朝俾多十分鐘佢訓。
因為我都十分之眼訓！！
同佢佢相又係唔多願意咁…但係第一次著小學既運動服, 媽媽真係好想影呀！！
今日開始已經用正式既返學放學時間啦！即係話阿仔會下午三點八先返黎。
但由於天氣唔好, 不停咁落雨, 所以爸爸都收工了, 我地一齊去接阿仔。
原來佢係校車度訓著左, 所以落車個樣超攰, 想訓住行咁。
佢話學校上堂好悶, 好眼訓！
哦….因為你未適應係學校咁長時間, 而且仲食埋飯添！下午係眼訓Ｄ架啦！
「唔係呀！下午都冇堂上。」係咩？咁點解上堂會眼訓呀？
「好悶。」哦…
阿仔仍然話佢返學唔係幾開心, 即係唔係幾鐘意返學。
「D女同學好憎我, 我做親D咩佢地都”嘩”我！」
女仔到左呢個年齡開始會鐘詫同返女仔玩, 而且咁多小朋友, 大家都由唔同既幼稚園升上黎, 所以佢地唔係憎你, 係大家既相處習慣唔同。– 爸爸大概係咁樣同阿仔講。
我就覺得好有可能係佢有Ｄ行為太粗魯, 所以先會令女同學有咁既反應。
如果真係因為佢既問題, 我相信學校老師會睇到同會教佢…
記唔記得我地呢個月既目標係乜野呢？
「記得！唔好亂咁踢人同郁手郁腳。」
係啦！叻仔！咁今日做唔做到呢？
「今日有小朋友好似打功夫咁推我, 有兩個呀！仲推到我跌倒添。」
你係咪同佢地玩緊？你可以同佢地講唔好咁大力。因為有時你同人玩都會大力左！
咁下午做咩呀？係喎！上體育堂喎！
「冇上到呀！下午淨係度高磅重。」
可能第一堂, 要做左呢D野先。
「我覺得D安排唔係幾好, 乜野都係D女同學先。」
咩安排？例如呢？
「排隊度高果D囉！都係女同學先。」
咁女同學多丫嘛！男仔少會快D架！同埋做男仔要有風度嘛！係 gentlement 呀！有句話叫做「Ladies First」架！
「但係我覺得應該分兩條隊先岩, 一條係俾男仔, 一條俾女仔排。如果多左果D咪排去男仔果度囉！」
你呢個諗法都岩！但係當時有幾多個老師呀？係咪得一個？係囉！得一個咪只可以排一條隊囉！
小學了！會開始多呢Ｄ問題呢！仲有就係阿仔Ｄ脾氣, 我同佢都要努力改善….我知自己對佢都好大影響, 有時都唔係佢錯哂, 只係學左我…….
M.R. In UK 