2016-12-16
尋晚 Max 訓覺時發開口夢, 仲要係半喊半發忟, 仲以為佢只不過係發惡夢, 到半夜我地訓訓下, 佢走左過黎同我地一齊訓之後, 我發現佢原來發緊燒!! 果陣係4點半左右, 即刻同佢食左次退燒藥, 佢半夢半醒咁食完後繼續訓, 冇幾耐就退左燒。
雖然今日返學唔需要上堂, 因為係聖誕聯歡會, 但根據過往經驗, 佢燒得一次, 通常過幾個鐘D藥力散左之後又會再燒, 所以決定唔俾佢返學。(好慘…小學第一年既聖誕聯歡會就冇得參加…我想喊…)
不過, 呢個決定實在太正確! 因為佢朝早七點幾起身, 食左幾啖通粉早餐之後就話個肚唔舒服, 拎住架紙飛機係梳化坐&玩, 叫佢訓一陣佢唔肯, 問佢咩事, 佢話唔開心, 因為唔舒服, 話個肚唔舒服。後來仲突然擺隻手埋口…我就知道佢想嘔! (因佢不嬲想嘔都會做呢個動作!) 於是同佢去 toilet, 真係嘔左!
然後又反覆咁嘔多兩次, 第一二次都係白色嘔吐物多, 第二次多左水, 第三次已經係黃色既水…之後都有兩次話想嘔, 但係嘔唔出! 其中一次係臨出門口, 想同佢去睇醫生, 點知著好鞋之後又要除返鞋去攬住個廁所…陰公豬。
去樓下睇古醫生, 姑娘話醫生做緊手術要遲少少返, 到我地時大概12點幾, 於是買D野返屋企諗住煲粥食同埋等電話。返到屋企我都頂唔順要食藥啦! 其實我都有D感冒, 好多鼻水, 用左好多紙巾! 所以食左粒藥, 係之前靳醫生開既, 所以好安全, 唔怕食, 而且仲好 work tim!!
診所12點幾打黎叫我地落去, 醫生話 Max 係腸胃炎, 要戒口, 仲講到明唔好食菜! 因為易痾!! 可以食粥、粉、麵, 肉都可以食少量。問 Max 想食乜, 仲諗住返屋企煮通粉佢食, 點知佢揀粥, 仲話好肚餓。緊係啦, 今朝個早餐只左一半都冇。買粥我就買埋綠豆沙清下胎毒啦!
其實我都冇太刻意食乜去清, 因為其實我都唔係太信清胎毒呢樣野, 不過間唔中當俾個藉口自己食下糖水都好丫! 上胎反而都食幾多腐竹雞蛋糖水, 但 Max 咪又係皮膚差到暈! 佢唔係胎毒而皮膚差, 係根本皮膚底子受遺傳! 因為我以前都有濕疹, 都幾嚴重。
其實我估 Max 係食完尋晚果餐”上海野”之後病的! 因為尋晚我都去左兩次! 第二次係比較爛! 不過我就冇攪肚痛, 而且自從有左細佬之後, 我既腸胃都比較敏感, 好容易攪肚痛, 所以我就唔肯定自己係咪都係因為食完尋晚果餐先痾啦! 但阿仔就似囉!
夜晚我哋喺屋企睇碟 : Peter Pan. 係迪士尼最經典果套，Max 個傻瓜睇到好開心，Peter Pan 一同鐵鈎船長打嚟打去佔優勢時就笑得特別開心!!
今日開始天氣轉冷, 不過係屋企實在太和暖啦~ 日頭我都只係著短袖衫, 出街就要換件長袖, 同加件外套。Max 就更加要著多件啦! 一件長袖底衫+小厚衛衣+抓絨 jacket, 先岩岩夠暖! 落到街果陣佢隻手仔好快就凍凍地, 跟住行多幾行先至暖返。
大住個肚真係冇咁怕凍, 仲要係好怕熱添!
今日BB仲係踢得好低, 夜晚又轉左位, 習慣左俾佢同我”按摩”右邊, 突然轉左去左邊同前面就好唔慣同唔舒服….
