5點半食咗60ml奶奶，6點半再食多60ml，8點幾又喊肚餓！
沖返個涼先食奶啦！呢個Baby似乎唔係咁enjoy。
8點9，呢轉食咗80ml，都仲好似未夠，啜到冇哂都仲啜…！之後又唔願瞓覺。
(尋日已經係咁，幾乎全日都冇乜點瞓)
未夠10點又爆喊想搵嘢食，可能想瞓覺但瞓唔到？於是出動奶咀，佢食咗一段時間之後開始唔願啜，始終都係想飲奶咁款！
終於捱到10點9，見佢上餐食80ml都唔夠，沖咗100ml俾佢，點知只係食到50ml！就瞓咗啦！
浪費咗成50ml奶奶，唔知點解咁難掌握到底佢一餐食幾多！三個鐘先食一餐嘅話可能要每餐食多啲先得，但係佢又唔似食到咁多，冇理由夾硬餵，就算夾硬嚟都未必食啦！
但以佢食嘅份量~80至90ml一餐，又好似好快就消化咗咁，通常兩個鐘就喊肚餓。所以呢兩日我覺得自己餵到好亂！有時喺“新一餐”同“加奶”之間嘅選擇錯誤，就會造成好多浪費…
雖然係第二個寶貝，但我就同一個新手媽咪一樣，乜都係重頭學過。話哂哥哥已經係6年前嘅事…我份人又冇記性。
諗諗吓，BB胃仔好細，可能細佬消化得好好，所以好快就肚餓呢！不如照餵60ml，如果有隔兩個鐘或以上都照餵下一餐吧！
另外，本來我喺醫院第2日開始餵人奶，後來因為損咗好痛同埋谷奶勁痛，加上開刀傷口同子宮都係超級痛，所以決定停餵。後來又因為某啲原因又餵得比較少甚至之後要停餵，但今日收到醫院電話後，知道餵係冇問題，所以都會再餵，不過奶量就要重新建立啦…呢幾次泵出嚟嘅都係極少…
又講真，我個人超怕痛同超級忍受唔到痛楚…所以要堅持的話都有少少難度…希望我可以做到啦！！
爸爸抱~
其實我都幾靚仔呀？＞ｖ＜
FOLLOW / CONTACT US : FACEBOOK
Advertisements
