CB片片初體驗 + Sunday Shopping

今朝一早就試下著環保尿片, 我等左呢一日好耐啦！

相關文章：我的第一套【環保尿片】Charlie Banana

睇過原來著起上黎都好大舊, 睇過官網定唔知邊度, 話3個月以上建議用兩條片芯, 於是就放入一大一細入去, 所以真係好大舊呢!! 怪不得D外國人成日話 bulky 啦! 

由於我只係第一次用環保尿片, 亦冇其他牌子可以比較, 所以唔知呢隻算唔算呢?

呢幾日我已經好努力咁做左好多 research, 仲係外國D網站度買左好多片片, 到時就可以比較下啦! 好期待….用完之後一定會寫係 Blog 度! 有興趣既爸爸媽媽可以係blog右邊果欄 “Follow Blog via Email” follow 呀!

著左第一幅相果條片片後冇耐, 就要換第二條啦!!

因為…漏尿呀! 唔知係咪我包得唔好呢?

其實呢個 Size 我都唔知岩唔岩…好似話最重要係對大脾仔要貼哂! 我咁樣鈕先夠貼。

又一條!!

因為今次係漏便便呀…..即係爆CC….

可能因為當時爸爸抱住佢? 又或然者仍然係包得唔好….總之, 今次就係爆前側。

第一日試著, 就俾我地試下會遇到最麻煩既問題, very good! 爸爸又係度, 沖便便既動作就緊係佢黎啦!! 不過我都好想睇下係咪真係咁易沖?

結果呢, 都算幾易沖走, 不過脾位有橡筋既位置就沖唔到好乾淨, 沖完就直接放入膠袋待洗。

上午, 爸爸同哥哥去左上籃球班, 我就係屋企。
突然好想同細佬剪頭髮!
雖然一直都好想同佢剪, 不過係諗住出去剪。
但係今朝我執執下野時, 見返好耐冇見果個剪髮器, 於是就叫姐姐幫手抱住細佬, 然後我就「手起刀落」咁開始同佢剃啦~

太耐冇剪, 唔記得原來 3 mm 係超級短!!

不過都好, 因為細佬仍然不停咁出頭泥, 唔知剪短D係咪會唔再出呢??

我都有用過 Olive oil 黎幫佢去頭泥, 但係冇左又出返, 所以我只係用過兩次, 可能要成日用先得??

個個都見到都問細佬D皮膚咩事?

我估係濕疹啦! 成個額頭D粒粒都出水呀….好慘….但我唔想同佢睇西醫, 都係搽藥膏, 我寧願同佢搽多D cream。

我地下午2點幾出門口食野, 去左附近飲茶, 然後就出尖沙咀。

竟然有免費 macaron 派! Max 緊係好開心啦! 我同佢都有一個, 多謝啊~~~

不過佢話唔好食…其實我都覺! 雖然間 shop 係上層, 但呢隻味麻麻, 點吸引人去買啊…??

行到去 FACESSS 門口, 又有個男仔拎住好多汽球 (當時我只見到汽球), 見到 Max 就俾左呢支棉花糖佢! 嘩~ 哥哥, 你今日大豐收呀! haha

海運大廈展覽大堂有BENZ車展, Max 好雀躍周圍走….因為佢想坐司機位! 坐後面乘客位都好開心! 展覽至到5月1日。

之後我地就去玩具反斗城。

講開又講, 本來話想去旺角, 因為想買隻專 for 洗環保尿片既 detergent。但係哥哥話想去玩具反斗城, 所以先去尖沙咀。買完玩具後, 本來想去誠品, 咁岩見到 Mothercare, 就入去睇下有冇啦!

見到呢樽：

$156咋!!! 我記得上網睇過個價錢係 $228 左右! 平咁多既?? 即刻買啦! 唔好忘記本來我係想今日去買的。

唔知係咪生完, 定年紀大, 返到屋企非常疲累….比平時早 zzz。

但係因為細佬仲要飲夜奶, 所以而家成3點幾4點先打blog, chi gor sin…