Posted in 【Baby Food】, 【LIFE】2017

Baby Yogurt

Day 217
7 months 5 days
31 weeks

第一次食,已經可以食到9成!剩低果一成就緊係媽媽食埋佢啦!

(好在唔多……總覺得D Baby food好肥!😅)

Rex 食第一啖時,成個人好像打冷震一樣,似乎味道好震撼?哈哈!但之後一直都吃,應該係覺得原來都幾好味!?

另外,今日食咗兩餐糊仔 (米糊同燕麥糊),另外自己揸住食嘅有粟米,同埋菜心。粟米食幾啖唔食,改餵糊仔,菜心係飲茶時叫嚟俾佢食,但因為剪得太短,拎唔到,而且亦唔夠林,所以食得唔多。

反而食得多啲嘅係節瓜,但都係因為啲皮冇削哂,仲有一層薄薄哋喺度,所以好難先咬到啲肉俾佢!(係啊!我係咬完再餵佢) 要好似西瓜刨咁刨走層皮,又要留到啲肉俾佢食,好高難度!😂 仲有再俾啲飯佢食,夜晚果餐都有。

仲有試咗新嘢!就係將啲糊仔,「不」定喺 spoon 度等佢自己食。第一次用匙羹,好好笑,見到個 spoon 上面嘅嘢食,就用手抓啲糊仔!結果當然係周圍都係啦!超 messy!我扶住佢手教佢點用,佢就揸住咬個匙羹尾!以後都會繼續俾佢用匙羹食嘢。

總結,最近食嘢 (非糊仔或食物蓉類) 都冇乜點咳,而 gaging 更加係好耐冇見到有出現!睇佢食嘢都有郁吓郁吓個嘴,應該係咀嚼啦?又或者叫做「妹」緊,總之佢吞到,又冇上述兩種情況出現,我就認為佢喺食嘢呢方面有進步啦!

嚟緊計劃每餐加返多啲食物種類俾佢,之前一餐都係一至兩種,因為我真係好想可以完全俾佢BLW,所以要勤力啲整多幾款嘢俾佢食啦!

Advertisements