Posted in 【旅】東京 2017 - 媽媽和哥哥的二人之旅

【二人遊東京】行程

今年暑假終於帶咗Max去日本旅行啦!舊年想去但有了意外,今年唔想再等了!狠心掉低細佬,我哋兩個去玩…第日仲有機會帶埋細佬去,而家實在太細個啦!不過,去到日本見到啲小 baby,真係好掛住好掛住細佬…

簡述吓行程先!

Day 1 ~ 去到上野已經夜晚7點,冇行程

關於我哋住嘅呢間民宿:【二人遊東京】近上野站民宿
Day 2 ~ Tokyo DisneySea

我呢個媽媽太大意,冇諗到個仔唔受得咁刺激嘅機動遊戲!攪到佢呢次旅行印象最深刻嘅就係:Tower of Terror….
Day 3 ~ 大宮鐵道博物館,上野7層高玩具屋,博多龍風拉麵

「 大宮鐵道博物館」~~ 令Max流連忘返嘅地方!有咁多架火車展覽令人大開眼界,一個字:正!
Day 4 ~ 台場 Bills,台場一丁目商店街,西松屋,Legoland

Bills 啲 pancake 確實超正!
西松屋大出血。
Lego 係 Max 最鍾意玩嘅,Legoland 點可以唔去?
Day 5 ~ 上野藥妝店,錦糸町Akachan,アルカキット錦糸町 (Arcakit) & 超市

上午極速去掃藥妝店,返民宿 hea 吓就出發去 arcakit,重點係去 akachan,又大出血。樓下幾層都好好買。最後,落埋超市兜個圈,完美!
Day 6 ~ 忍野しのびの里,河口湖駅

行程另一重點!就係忍者屋啦!山長水遠去到河口湖呢邊就係為了忍者!Max同兩個日本小朋友玩得好開心!諗返我都有啲唔捨得。跟住搭車去河口湖食嘢,然後搭成4個鐘巴士返新宿!
Day 7 ~ 上野一蘭拉麵,機場

果然名不虛傳!一蘭拉麵好味到唔知點形容!可恨嘅係我哋最後一餐先嚟食。
啲行李多到,我哋兩個人可以拎到咁多嘢返嚟,呢啲唔係叫「超堅」咁叫咩呢?hahaha

Day 1 @ NRT Airport 成田空港

 

Day 2 @ DisneySea 東京迪士尼海洋

 

 

Day 3 @ The Railway Museum 大宮鐵道博物館

 

Day 4 @ Decks 台埸
Day 5 @ Arcakit

 

Day 5 @ 忍野 しのびの里 (忍者屋)

 

 

Day 6 @ 回程了!

 

遊記持續不停期補上……有朝一日會寫完!XD

Posted in 【FTM】學整嘢食

【光波爐】媽媽整嘅曲奇餅

早幾日工人好有 heart 咁整咗啲曲奇餅,今日終於輪到我啦!尋晚上網搵咗個比較簡單嘅食譜,即刻試吓!

整俾個仔食,當然會有多少少心機啦!重點係曲奇餅可以用啲得意有趣嘅模去壓啲形狀出嚟。而呢兩個模具:心心同星星,已經買咗幾年啦!一直都冇乜點用,最多用嚟壓吓 sandwich,但因為個模太細,其實都極少用。而家開始整吓啲甜品小食,先終於大派用場。

Max 當然係非常開心啦!焗出啲曲奇餅又咁啱係佢最肚餓嘅時間 (就嚟食晚飯),所以就話好好味!其實我哋都覺得一般啦!都唔喺度分享食譜了!下次整得好先寫。

Posted in 【LIFE】飲飲食食

【午餐】SP Flower & Tea Room

同細佬喺尖沙咀中心上完 World Family (迪士尼美語世界) 嘅 Story Telling 之後,就同朋友一齊去咗呢間餐廳食嘢。

11點幾到,冇乜人

餐廳嘅另一邊

係咪好靚呢?我都係被環境所吸引!好唔好食我都好少理!除非好多人都係差評,否則都會想去試吓,實在太鍾意啲靚嘢啦!

而呢間原來唔只得個樣,啲嘢都幾好食添㗎!

啲蛋糕好靚好靚!我哋都叫咗件嚟食!

位置唔難搵,就係轉角位。

睇咗Menu先。

呢個係Sandwich,箭咀住果個,好正!
朋友點嘅Risotto,又係正!只不過我對舊肉麻麻地(  ̄▽ ̄)σ

Today special ~ Blossom,好好味呀!

食件蛋糕,為呢一餐畫個甜美嘅句號!♡

總結:又食得又睇得,掂!

Posted in 【FTM】學整嘢食

【自煮晚餐】基本白汁意粉 (麵)

本身夜晚出去食,結果冇出到,但又冇買餸,就上網搵吓白汁係點整,屋企有牛油有奶又有cream,估計都係用呢啲材料。

咁就整咗呢個超簡易嘅白汁!加咗洋蔥同芝士腸,仲有幾舊本菇去炒。炒完就加返啲牛油、牛奶、麵粉混合嘅「麵糊」再兜兜,最後加埋已煮好嘅意粉落去,再加少少鹽、白胡椒粉同 Italian seasonings,完成。

不過由於睇唔到食譜份量係for幾多人,原來只係2人份,結果啲汁唔太夠,所以用嘅麵都減少啲。呢個都唔係大問題,下次要改進嘅係味道,應該加返多少少鹽!咁就好OK啦!

以前屋企邊會有麵粉呢樣嘢,無鹽牛油更加係唔知點用,而家我諗呢幾樣嘢一定要長期有存貨先得啦!

Posted in 【FTM】學整嘢食, 【LIFE】2017

【光波爐】海綿蛋糕 (亂改版)

不得不讚,繼尋日工人姨姨 (我叫唔出”工人姐姐”,因為佢年紀比我大😂) 好有心咁整完曲奇餅之後,今日又再主動話要整呢個海綿蛋糕!

佢係參考本光波爐食譜嚟整嘅,但係又懶叻咁唔睇,話自己記得。點知轉個頭原來佢記咗整曲奇餅嘅材料,完全唔係整蛋糕果啲,只係用咗整蛋糕話要用嘅自發粉…代替咗整曲奇餅用嘅麵粉!

當時佢已經將牛油150克同自發粉150克溝埋咗啦!發現咗之後唯有即刻上網睇吓有咩係可以用呢兩樣嘢嚟整啦…最後就將人哋嘅食譜份量加返啲,而用嘅糖份量又減啲咁 (我唔鍾意太甜),結果焗出嚟又幾好食喎!

材料:
牛油 150克
自發粉 224克
糖 90克
蛋 3隻
鹽 少量
雲尼拿油 2滴

做法:
用光波爐焗12分鐘+3分鐘+4分鐘,完成。

點解焗幾次,咪就係因為入面未焗到囉!所以自己慢慢加時間去焗咋!

原來咁都得嘅,好似又唔係太難。難得工人姨姨咁肯學,我都要努力呀!

***係喎,呢個應該已經唔係海綿蛋糕,都唔知係乜蛋糕啦…😅 最大嘅分別係用多咗一樣嘢:牛油!

Posted in 【FTM】學整嘢食

【光波爐】曲奇餅

第一句要講嘅係,啲曲奇餅唔係我整㗎,我完全冇參與過,哈哈!

咁邊個整呢?當然唔會係屋企個男人啦!即係另一個女人…就係工人啦!

唔知係咪因為見我呢排咁努力整麵包,所以又想學吓整嘢食呢?其實佢已經好好,學識煮好多餸,估唔到連呢啲都想學埋,仲要咁主動!

唔分享食譜啦,因為係跟光波爐本食譜整,由於我冇買低筋麵粉,所以就用 all purpose flour。

味道都可以,跟足食譜嘛!但我覺得甜咗啲!(以前我好鍾意食甜嘢,而家口味變咗) 至於個質感就爭啲,用低粉應該會鬆化少少吧!第日囡返低粉再試先得!

本來以為 Max 會鍾意食,點知佢唔多食,原來同我一樣都係覺得啲餅硬咗啲!呢個仔對食超級挑剔!

Posted in 【FTM】學整嘢食

整麵包失敗了

今次諗住整俾細佬,所以用咗隻靚啲嘅麵粉,加少量鹽,冇加糖。

點知焗完出嚟變咗咁樣!扁嘅?

估計係因為啲酵母…我唔識分亦睇唔到我用果隻係咩酵母,尋日用完剩返果啲我拎咗去雪。可能因為咁,啲酵母死哂啦!個麵包似係未焗到,亦似係發唔起,所以我諗冇錯感受係酵母問題!

我要繼續努力!學整多啲嘢食俾佢兩隻小魔怪!

Posted in 【Rex】成長記錄

7~9個月寶寶的生活啟蒙遊戲 – BabyHome 新知大耳朵 (轉貼)

https://www.google.com.hk/amp/s/m.info.babyhome.com.tw/amp/article/3628

7坐8爬,細佬係未夠6個月識坐,6個月後坐得愈來愈穩,7個月兩隻腳成日young young吓準備爬,7未夠8個月識爬了!而家仲要爬得好快添!

轉身,之前雖然已經識,但係學識之後一直都唔多肯轉,連我哋反轉想佢趴吓都唔制!但係呢兩個星期,可能為咗起身爬,所以轉身十分靈活!一下就反轉咗個人,兩吓就雙手撐住地下,第三吓就已經坐咗喺度。所以而家同佢換片要佢係鬥快!慢咗或者換緊時,甚至將佢瞓低果吓,佢已經彎哂腰要轉身,每次都要拎啲嘢俾佢揸住,令佢分心,先比較容易完成任務!

可能地方問題 (9成9係),細佬爬得比哥哥多,多爬行「有助延腦平衡功能及肌肉神經協調的發育」。以前哥哥跑步好容易跌倒或成日好似就嚟會跌倒咁!唔知關唔關事呢?

識爬之後都開始學扶住啲嘢企,由趴住咁扶住企,到愈扶愈高,會捉住梳化企。睇 facebook 先記起哥哥未夠8個月時已經會企喺梳化上面,扶住梳化背咁爬 (擒會貼切啲) 上去!超勁!

細佬開心嘅時候好得意,果對手會係咁上下郁,即係好似扮雀仔飛嘅快版咁樣!就算睇唔到佢個樣係咪笑緊,淨係睇佢對手就知佢開唔開心啦!仲有樣嘢好特別,就係佢成日都會皺眉同戚眉㗎!

寫住咁多先,再儲喺草稿度就會唔記得Post….😂

Posted in 【FTM】學整嘢食

用麵包機整麵包

舊年買電視送咗部麵包機,一直都放喺屋企發毛中……近來成日整嘢食俾細佬,又會煎吓Pancake等等,於是就拎埋部麵包機出嚟試吓用啦!

跟部機俾嘅食譜去整,話落酵母係要用手指喺麵粉中間開個窿嚟落,點知我忘記咗,一嘢就倒哂落去。好在冇乜事!之前都驚會失敗,整唔到麵包㗎!因我上網見有啲人話整幾次先有一兩次成功。

結果一打開部機,見到原原整整嘅麵包頂部,即刻開心哂!雖然要成3個鐘咁耐,但係簡單嘛!唔洗自己攪啲材料,慳返啲力水,哈哈!

唔好睇我好似咁醜樣,其實我幾好食㗎!屋企個個食過都讚!

食譜話落嘅食用油,我就用咗可高溫煮食果隻橄欖油,唔知會唔會因為咁而好味啲呢?

下次買咗隻靚啲嘅麵粉先整俾細佬食啦!今次其實都有俾咗少少佢食,差啲唔記得……

Posted in 【Baby Food】

BLW (8M9D) 午餐&晚餐:肉丸、薯仔、車厘子、紅蘿蔔&甘筍

朝早買完餸返屋企就開始整肉丸。

加咗洋蔥同菠菜,但我冇用到攪拌機,啲洋蔥同菠菜太大,攪到啲肉丸咁嘅樣。

下次一定唔可以懶,要記得用攪拌機!

呢個衰豬一開頭食就喊,我冇理佢,又冇鼓勵佢,由佢扭一陣,竟然突然自己食!

每次佢主動拎嘢嚟食,內心就好激動,好開心。 Continue reading “BLW (8M9D) 午餐&晚餐:肉丸、薯仔、車厘子、紅蘿蔔&甘筍”

Posted in 【買】BB用品, 【Rex】成長記錄

我的孩子很忙碌

斬吓眼細佬就8個月有多啦!近來可以坐定定耐玩具嘅時間亦都耐咗!

對於玩具,我個人比較鍾意啲具有操作性嘅!而且最好唔係電子玩具,即係㩒制就發聲果啲。不過我覺得呢類玩具點都要有一個,係一個就夠啦!所以最好就係揀啲大舊啲,即係多啲唔同操作就有唔同聲音嘅。

好忙咁玩緊新拎出嚟嘅玩具!(多謝朋友仔)

我唔想個仔擁有太多玩具,所以我會精心挑選!

前排就買咗下面呢架珠珠車仔,一來有上面可訓練小肌肉嘅珠仔,二來前面有繩拉,可以俾佢知道要架車行,唔一定要推架車,仲可以用繩嚟拉㗎!

但凡可以轉(Spin)嘅玩具,細佬好鍾意轉!就好似呢架車啲轆咁,同哥哥一樣咁鍾意玩!(太相似啦!定係多數BB都係咁?)

又好忙咁玩呢架車仔,一玩就…唔知幾多分鐘!

講開玩具又想講吓去完日本返嚟,買咗一樣非常滿意又鍾意嘅書仔!就係呢本啦~ (同玩具有關咩?哈哈…)

係磨砂膠書,中間有層薄海綿。

購自大宮鐵道博物館。

我鍾意佢嘅原因係,一來唔會被撕爛,二來又咬得(/≧▽≦)/~┴┴   仲唔怕好似啲紙板厚書咁唔小心打到自己會痛。仲可以陪BB沖涼時睇,一邊睇書一邊沖涼!仲有仲有,入面全部都係男仔都鍾意嘅車同火車!一見到已經諗都唔諗即買。

佢有時都會拎住本書嚟睇㗎!好攪笑,唔只書,有啲 lotion 呀,cream 呀果啲,佢都會拎住睇,好似識睇啲字咁。

Posted in 【LIFE】2017

【BB車】Larktale Chit Chat 好吸引 (得個睇字)

前排 REX pat pat 紅左好多日, 我唔想用 disposable diaper, 所以就用 liner, 結果D liner 好快就用哂啦! 於是諗座上網買啦~ 咁岩睇到呢部BB車 : Larktale Chit Chat, 好吸引呀! 價錢又唔貴, ($2200) 又想換車添…

Larktale Chit Chat.gif
6.6kg 重左D, 不過我幾鐘意

 

屋企部 Capella 都係用左唔係好耐咋….貪佢夠輕(4.5kg), 岩哂我呢D怕重怕阻訂既人, 而且坐位又比較高。不過個外型就平實D, 而頭先見到呢部就靚仔D咁囉…..

capella.jpg

Posted in 【Rex】成長記錄

去超市採購~第一次坐超市購物車

尋晚細佬3點幾醒咗,喊咗好耐,點都氹唔到,見佢好似想食奶咁,唯有去沖奶俾佢啦!飲完終於都肯瞓啦…

我今日8個月4日大啦!

今朝起身後,10點幾帶埋佢落去超市,諗住買個電子磅同買啲食材。呢間超市比較少人,可以慢慢逛!仲第一次嘗試放佢坐喺架車度添!

開頭細佬都好好奇咁摸吓架車,又伸手出去摸食物架上面啲嘢。但坐咗大約十分鐘左右就開始扭計!抱返佢出嚟咩住佢就唔喊。呢個BB好癡身呀…

Posted in 【Baby Food】

成功整到唔易爛嘅飯波同肉餅

Day 245
8 months 1 day

星期日,工人放假,爸爸要去上堂,得返我同兩隻馬騮仔喺屋企。

上網睇多幾次人哋點整飯波,終於整到啦!不過我今次係用珍珠米,唔知關唔關事呢?煲好米同南瓜後用保鮮紙包,成功整成一個個都幾結實嘅飯波。但咁做非常唔環保…自己又唔太識用,所以整7個飯波用咗3大張保鮮紙。

可能又係新鮮感,細佬一見到就拎嚟食啦!由於我係一整好就俾佢食,所以見佢食得幾好就繼續整,最重要嘅係,當我整好哂之後,啲波波已經全部被消滅了!(舊舊都俾佢揸爛或食過) 想影張「全相」嘅相都冇啦!

然後就到肉啦!本來我係想整肉丸(meatballs),但係最後出嚟嘅形狀都係扁哂!所以我唔敢寫係肉丸,叫肉餅好似啱啲!

好開心佢可以食到!我整咗4塊,佢食咗嘅估計都有一塊!

分享吓我係點整:豬肉剁碎,加咗洋蔥,再加蛋黃同麵粉 (份量我有啲隨意,因為冇量杯亦唔知啲豬肉係幾多克),撈埋之後放份雪櫃雪咗成個幾鐘,再拎返出嚟蒸15分鐘,完成。

因為好驚會散哂,所以我用蒸。