Posted in 【LIFE】2017

【二年級】Eat & Shop @ Festival Walk

今次測驗第一日係星期五,又早放學,所以等細佬喺屋企食完嘢,我哋就出發去又一城。

一來想去玩具反斗城,二來要去Taste換貨,三來知道GAP做緊減價,買夠6件有65折,都幾抵,所以順便去果度食 lunch & shopping。

Max認得呢間餐廳,未睇有乜食就話要入去!原來佢想要氣球!

Max好叻呀!自己叫嘢食,仲主動問人有冇氣球。

細佬呢!就緊係一齊食啦!但由於佢已經食咗 lunch,所以我就俾咗啲麵包佢咬。咬足大半場,叻叻! Continue reading “【二年級】Eat & Shop @ Festival Walk”

Posted in 【Baby Food】, 【Rex】成長記錄

BLW (9M18D) 第一次清盤,好叻叻呀!

晚餐:芝士薯仔西蘭花焗蛋,西蘭花,雞鎚

開頭食得唔好,成日掉嘢食落地,食食吓又喊想人抱抱。估唔到氹吓又唔理吓佢,最後可以清哂盤入面啲嘢食!又有一大進步啦!太開心了~

Continue reading “BLW (9M18D) 第一次清盤,好叻叻呀!”

Posted in 【LIFE】2017

BLW (AGE:9M16D) 午餐♡牛奶饅頭♡仲有美味雞肉丸♡

尋晚又整饅頭。

屋企有蕃薯,本來想試吓整蕃薯饅頭,但都係下次先,因為開始整果時已經10點幾。

呢啲時間兩個小朋友都瞓咗,我先可以安安靜靜地做呢件事!如果佢哋未瞓,我絕對會忍唔住去攪吓佢哋!完全唔可以整。咁點解日頭哥哥返緊學細佬瞓緊覺果陣唔整呢?因為太多嘢要攪啦!又成日都覺得好攰,反而夜晚冇咁嘅感覺!?

今次用多咗一倍份量,但同上次一樣,點都搓唔到個麵團光滑,我諗係因為牛奶嘅比例多咗少少?下次試吓落少啲先。

上次哥哥食到一個唔夠,要食埋人哋果個。今次夠喇掛!點知佢又唔想拎返學校當snack咁食,我都明,緊係想食啲「好味又冇益」嘅零食啦!但係間唔中一兩日食返啲健康啲都要!所以最後佢都帶咗一個饅頭返學校。

咁細佬又點呢?

睇吓佢食到!

我將一個饅頭切開3份,佢幾乎全部食哂,只係掉咗半舊落地,睇嚟都OK鍾意喎!其實都係因為之前見佢食得幾好,我先有動力繼續整,當然哥哥又肯食就更加要整啦!

另外,午餐仲有早幾日整好嘅「焗洋蔥紅蘿蔔雞肉雞肉丸」,因為屋企冇哂蔬菜了!唯有加埋士多啤梨同梨。

今次食到兩個左右嘅雞肉丸,士多啤梨幾乎食哂,梨就食一兩舊就吐同喊 (哈哈!),其實BLW嘅小朋友唔係更加揀飲擇食咩?我覺得好好好明顯噃!!

Posted in 【Baby Food】

是日午餐 (9m14d)

午餐:薯仔菜心焗蛋、豬肉丸、紅蘿蔔粒、菜心莖1條

因為只係需要用到一條菜心,葉嘅部份拎咗去攪碎,淨返條莖就同埋啲紅蘿蔔粒一齊蒸。

呢個薯仔焗蛋係上網學的。

材料有:

日本男爵薯仔一個 (因為比較細個,所以只需用一個便夠,本身食譜係用半個薯仔)

菜心 (街市買的)

無激素雞蛋

麵粉 (我用Bob’s我用Bob’s Red Mill Unbleached White All Purpose Organic Flour)

Emmental cheese

做法:蒸薯仔先,再壓蓉。菜心攪碎,mix 埋薯蓉。加雞蛋攪拌,再加已過篩麵粉攪拌。然後平鋪上焗爐紙上,再加芝士碎喺面。

由於未夠鐘食,所以我雪咗一個鐘左右,夠鐘就拎出嚟焗,一邊焗15分鐘左右 (已經唔記得確實幾多分鐘啦!因為我初時焗嘅時間唔夠再加),另一邊焗多5分鐘。

出嚟嘅效果幾好!唔會太軟,用刀切開都要出少少力果種硬度。

睇片:https://youtu.be/e0Ohf6g6A8I

題外話:

【1】細佬呢兩日開始識得雙腳跳起離地!好勁!不過當然要扶住佢啦!睇嚟遲啲識行之後,平衡力好啲時就好快識跳起!記得Max細個係好遲先識㗎!兩個小朋友真係好唔同呢!

【2】識掉個波波入籃球架了!

Posted in 【Baby Food】, 【學習】興趣班

【9個月】BLW (9M11D) 晚餐♡幾乎掃哂

首先講吓晚餐有啲咩食。

1) 三文魚+菜心+蛋黃+糙米白米飯波
2) 菜心莖

由於Rex下午3點半左右醒咗到晚飯時間 (7點幾8點) 都冇瞓過!本來都好驚佢會太眼瞓而唔肯食,點知竟然幾乎同我掃哂所有嘢!

今次堅唔係掃落地!本身我一開始放低個盤,佢就拎乜掉乜,我嬲嬲地,已經一見佢掉就捉住佢隻手,平時最多擋吓,唔俾佢掉到落地。今次我見佢掉多幾掉就成盤拎走,然後逐啲嘢分批放喺檯。咁樣佢反而開始拎嚟食!丫…明明肚餓,都要掉餐飽先!

有時佢一邊掉,隻狗就一邊喺附近等食,好好似佢餵緊狗咁!😑

然後呢一餐就係佢一路食,我就一路將啲嘢食放喺檯。最後仲食到冇哂,連喺檯上面啲碎哂嘅都拎嚟食!從未見過嘅奇景呀!!

Continue reading “【9個月】BLW (9M11D) 晚餐♡幾乎掃哂”

Posted in 【FTM】心情記事

Feeling…great but blue?

晚飯後又帶細佬落樓下行吓,得我同佢兩個。

散吓步又可以當運動,而且都好開心,我好 enjoy 呢段親子時間,雖然只係咩住佢,而且已經日對夜對!

今日有啲涼涼哋,掛緊3號波。本來淨係著咗件 one piece,褲都冇著!落到去咁大風即刻返屋企同佢著返條長褲。

呢種天氣再加上邊散步邊聽舊歌,竟然覺得心情有點藍。

尋晚食完 buffet 夜訪星光大道
Posted in 【Baby Food】, 【買】Shopping, 【FTM】學整嘢食

BLW (9M11D) 新買意粉&芝士♡新嘗試:雞肉丸/餅

做咗ftm咁多年,我諗我近排先開始算合格!

尋日去 Taste 買咗好多正嘢!分享吓呢幾包意粉。

3包都係0納,啱哂 baby 食,尤其 BLW 嘅BB。

不過左邊果包就細粒啲,要抓握能力好啲先試到。

我今日就先煮中間果包 ~ Delverde 嘅蝴蝶意粉,睇落個外形係最易俾bb拎嘅!

不過Rex似乎唔係好咬到!定係懶呢?成餐都食少好。

用嚟撈意粉嘅白汁就係一向都用開方法整:奶粉 + 麵粉 + 芝士。 Continue reading “BLW (9M11D) 新買意粉&芝士♡新嘗試:雞肉丸/餅”

Posted in 【買】BB用品, 【買】Online Shopping 網店購物

【淘玩具】推薦遊戲桌

淘寶買嘅玩具到咗啦!

其中啲蛋蛋係我最想買的!未拆開,但睇落質量都唔差。個繞珠就失望啲,雖然有睇尺寸,但竟然係咁細?右上角個玩具,中間有架火車開著會自己行,Rex 竟然驚!細膽到佢……至於下面果8個拼圖啲質量就差啦!而且佢仲處於乜都擺入口嘅階段,所以會收起唔俾佢玩住,因為有少少木刺。

右下角有個人頭果個,係可以自己幫佢配眼耳口鼻,幾得意。

最後再講吓右上角張遊戲桌,雖然細佬驚架火車,但係成舊嘢嘅質量唔錯!幾好添!RMB200 左右。

Posted in 【Baby Food】

BLW 9M9D 食得叻咗,因為耐咗

呢排愈來愈有進步!由之前食5分鐘、10分鐘就喊,而家開始可以食到20分鐘左右,甚至超過30分鐘都試過。

我亦都好耐冇餵佢啦!(但工人有時我唔喺度時會餵)

今日午餐係:第一次食嘅翠玉瓜、南瓜藜麥飯波、紅椒綠椒豬肉丸,仲有蘋果切片。

食咗20分鐘左右,好似幾鍾意食翠玉瓜,肉丸就好快就「掃」哂!包括食同埋掉,哈哈!飯波成績都唔錯,拎起過4個,食咗大約2個倒啦!都幾大個吓㗎!啲瓜「掃」咗大半,蘋果亦食咗大約2~3條。所有嘢係估計食咗落肚的。

食食吓托腮😂 知我影你所以要擺Post?

至於代唔代到一餐呢?有時得,午餐可以食完隔3個鐘先飲奶,但有時個幾兩個鐘就餓。晚餐由於接近瞓覺時間,所以通常食完後都會就返時間俾奶佢飲,有時飲得多,有時可以飲1或2安就唔飲,所以都叫間唔中食得飽佢㗎!

Posted in 【旅】東京 2017 - 媽媽和哥哥的二人之旅

【東京二人遊】出發!

2017年8月22日

晨咁早起身,8點多啲出發,Call 咗的士,仲有 Grandma 同工人同行,重點當然係帶埋細佬嚟送機啦!實在太感謝媽咪啦…等我可以見細佬耐啲。

8點7左右到機場了

不過離境果陣望住細佬,啲眼淚水好想湧出嚟…好唔捨得呀!果一刻又諗:早知帶埋你!

Max 亦都非常之唔捨得細佬,仲撲埋嚟想喊咁樣!佢咁錫細佬我都好安慰…… Continue reading “【東京二人遊】出發!”

Posted in 【Baby Food】, 【Rex】成長記錄

有意識地叫「媽」(9m1d)

有兩件事要記低!太重要!

第一,帶咗佢去睇中環果個「名醫」,話Rex嘅嚴重程度只有2,以1~5嚟計,5係最嚴重。

第二,幾次都望住我叫「媽」,唔係講得好正,但我相信係有意識而且知道我係媽媽。仲有,佢亦都識叫「哥」,唔知咁啱定真係識?

今日午餐都好豐富,有南瓜波飯、啤梨蘋果蓉豬肉丸、有機青瓜,仲有生果~無花果!差啲唔記得食呢啲嘢之前仲俾咗啲自制嘅基本麵包,但佢食好少咋,雖然好肚餓 (我係正下一餐嘅時間俾佢食),但佢好似唔多鍾意食咁。

呢餐樣樣都食得唔多,後來都係餵,全程坐咗有差唔多45分鐘,因為冇乜點喊,佢想喊時餵佢食嘢又唔喊,所以先可以持續咁耐。

下午又俾咗啲水蜜桃佢食,但由於我要出門口,所以就快快手手咁餵佢。

到晚餐,簡單啲,雞鎚同青瓜,用我哋食嘅糙米白飯整飯波,仲有火龍果。青瓜咬兩啖就掉,睇嚟佢真係唔鍾意食青瓜。

而家食雞鎚可以同佢拆到條骨咁樣,叻咗!

而家 Keep 住「記得嘅話」每日都同佢碌卡 (迪士尼美語世界),仲會睇一至兩次DVD,初時都比較緊張睇幾耐,但發現細佬唔會十分專注咁睇嘅時候,我都會俾佢睇耐少少。

唔知係咪首歌特別吸引Baby? 有一首唱時間嘅歌,同哥哥一樣特別鍾意!一睇到或聽到都會笑!

Posted in 【旅】東京 2017 - 媽媽和哥哥的二人之旅

【二人遊東京】近上野站民宿

之前講過話要努力寫,終於寫第二篇了!決定由民宿開始講。

我係喺airbnb租,地點決定住喺上野站附近,因為就返我哋要去嘅目的地。

租果時已經鐵定係必須要近車站,因為只有我自己帶住Max嘛!本來想租喺正京城上野站對面果間酒店,但係又唔sure個站有冇電梯上地面,搵極都搵唔到有人話有!雖然好近,但考慮到走果陣如果好多行李,咁我自己一個又如何搬落樓梯呢?就係因為呢個原因而令我卻步,唔敢租呢間酒店。

由於個人理由,可以選擇嘅民宿唔多,結果只有兩三間可以揀。選擇呢間係因為佢寫話離上野站5分鐘步程,而且睇相望落大間啲。結果租咗之後先發現原來佢距離果個上野站出口,應該係最遠果個!咁果5分鐘其實就要加埋由站內行去出口果幾分鐘,實際上夾埋可能係15分鐘,因為出站後果5分鐘都寫少咗,實際行起上嚟都差唔多要10分鐘,尤其玩完返嚟,行路又再慢啲呢!攰丫嘛!

除咗對我嚟講太遠之外,第一日入屋已經聞到一陣味,唔識點形容,唔算好臭,係怪味…雖然怪,未至於係臭。最慘係個廁所就真係有陣臭味啦!唉…臭臭哋嘅up味。其實我個人又唔係太太太介意,所以尚可勉強接受。咁喺間房度又有種 cozy feel 嘅…

不過問題唔只呢兩樣,佢張床,林到不得了!如果係張梳化就好好,係張床就瞓得幾辛苦吓!

仲有,我哋第二晚,去完迪士尼返嚟,發現牆上有隻昆蟲!我好勇咁搵咗民宿本雜誌拍死佢!仲影咗張相以備不時之需!哈…

好啦!已經講完。基本上我唔會推薦呢間民宿嘅原因簡述如下:

1) 離車站太遠
2) 間屋有陣味,廁所有陣臭up味
3) 張床太軟林林,瞓得唔舒服
4) 有小昆蟲

揀民宿其實都係自己貪新鮮想試吓住!估唔到…咁樣。其實要講最唔好嘅地方都係太遠,其他嘅我個人嚟講仲勉強接受到。不過民宿嘛!又唔係酒店,位置緊係冇咁便利啦!或者係啦!要搵啲真係好近站嘅可能要住啲細站,咁其實又有得諗呀!

有咗呢次經驗,我覺得下次都唔會揀民宿多,如果要揀,就會小心啲,揀「真正」近車站嘅。但好可能會係啲細站,玩到好攰都要轉車返去果啲……咁,最後可能都係租返酒店!

Posted in 【Baby Food】

BLW 8個月29日。今日食啲乜?

星期日一起身就好忙!首先整呢個焗蕃薯俾兩位公子:

【焗蕃薯】用光波爐180度焗18分鐘

然後整「牛油煎牛奶蛋」俾爸爸:

呢隻蛋好耐冇煎過啦!今次煎得唔錯!

跟住仲整埋 banana oats pancake:

食譜係跟朋友教的,加埋 oats 好正呀!細佬都肯食,但哥哥就唔鍾意啦!佢不嬲都對 banana pancake 麻麻地……係唔食嘅!但佢又鍾意食香蕉喎!只係唔鍾意食 pancake,麥當勞果啲除外!好奇怪。仲有佢都唔鍾意食麥皮,所以呢個都預咗佢唔肯食。

下午茶係食唔哂嘅 pancake 同另外蒸嘅蕃薯。仲切咗啲蘋果粒。睇佢好似好努力咁食,但其實食得唔多。

夜晚食咗啲大人食物:雞肉同豬都有,所以就只煮咗啲長通粉同菜心俾佢。本來想放啲三文魚入長通粉入面,再整埋意粉汁,結果太懶冇整到。

好耐冇記錄食啲乜,寫開就簡單寫吓啦!之前一直都好擔心會吸收唔足夠嘅鐵質,近月都係食洋蔥豬肉丸或雞鎚多!難得細佬好鍾意食,所以一啲都唔擔心,反而 carbohydrate 就食得較少。蔬菜類嘅都係西蘭花會食到最多,菜心而家都唔太鍾意食。另外亦有俾全蛋、芝士同一啲可能容易引致皮膚敏感嘅食物,例如 Kiwi。因為見佢食完都唔好少有敏感,所以都會俾,但唔會俾太多住,慢慢試。