首先講吓晚餐有啲咩食。
1) 三文魚+菜心+蛋黃+糙米白米飯波
2) 菜心莖
由於Rex下午3點半左右醒咗到晚飯時間 (7點幾8點) 都冇瞓過！本來都好驚佢會太眼瞓而唔肯食，點知竟然幾乎同我掃哂所有嘢！
今次堅唔係掃落地！本身我一開始放低個盤，佢就拎乜掉乜，我嬲嬲地，已經一見佢掉就捉住佢隻手，平時最多擋吓，唔俾佢掉到落地。今次我見佢掉多幾掉就成盤拎走，然後逐啲嘢分批放喺檯。咁樣佢反而開始拎嚟食！丫…明明肚餓，都要掉餐飽先！
有時佢一邊掉，隻狗就一邊喺附近等食，好好似佢餵緊狗咁！😑
然後呢一餐就係佢一路食，我就一路將啲嘢食放喺檯。最後仲食到冇哂，連喺檯上面啲碎哂嘅都拎嚟食！從未見過嘅奇景呀！！
可惜我全程一張相都冇影到，只可以喺佢食完之後影張 “after” 嘅相。
睇張相都見到佢已經食咗唔少飯！雖然好多散哂，又有差唔多成粒跌咗落地，但係估計落咗肚嘅大概有一半！冇記錯係整咗7個飯波，即係食到3~4個，咁應該夠飽了！
順便講埋午餐啦！
雞肉丸：尋日整果啲，先蒸4分鐘睇吓會唔會硬啲，唔得，所以焗，好似係一邊6分鐘一邊3分鐘，夠硬可以食了！
蕃薯 ＆ 薯仔：全部切粒，蒸熟。
紅蘿蔔：切幼條，蒸熟 (主要煮俾哥哥)
粟米：切成約3cm薄，蒸10分鐘。
士多啤梨 ＆ 藍莓：切開，食到咁上下先俾。
之前都係將薯仔蕃薯切條狀，但我發覺佢太懶！要咬嘅嘢9成都係咬一兩啖就掉，(即使有時例外) 既然佢拎到細粒嘅嘢食，一於切到細細粒咁等佢一擺入口就成舊食。
仍然係非常鍾意食粟米，期間都有拎吓第二啲嘢食，不過都係咬兩啖就唔食，繼續咬粟米。
精心泡製嘅雞肉 (貴到咩咁嘅無激素雞) 竟然只係食咗兩啖咋，仲要跌埋俾隻狗食咗！😭😭
薯仔同蕃薯有食幾粒咁啦！反而食薯仔多啲。
之後加嘅士多啤梨同藍莓又非常落力咁食哂，好在係後加，如果唔係可能唔會食其他嘢。
最 surprise 係佢食藍莓，啜完啲肉就拎走層皮！之前都冇咁做過。講開又醒起記低，呢排食嘢好鍾意吐返出嚟，不過唔係一食就吐，係咬幾啖就吐，有時根本唔係吐嘢食，而係吐咗一啖口水落飯衣度囉…(點解冇隻「掩面」公仔，我想整呢個公仔以表達我嘅心情)
但總括嚟講都算叻咗好多，我已經冇再餵佢，今日當然完全冇啦！我全日睇實佢食嘢！朝早10點幾佢瞓咗就開始準備Rex嘅嘢食，整埋焗蕃薯俾Max學完游水食，仲有煲咗飯醃咗肉煮咗椰菜花，即係準備俾Max食嘅午餐。因為佢朝早就去泳池練水了，返嚟食完飯坐一陣又出去上堂。
佢今日要考試，今次真係冇乜點同佢練習，所以…升唔到班呀！唉…佢都好唔開心，佢話明明睇到教練話唔合格嘅係第二個，冇話係佢喎！咁我唔知啦！個結果就白紙黑字寫喺度…其實佢都好緊張自己升唔升到班，上兩個星期已經開始話要練水，而家升唔到班好大打擊咁，仲話唔想學。
M.R. In UK 