【京都(2018)】共乘制機場接送 MK Taxi ~ 便宜方便舒適的好選擇

回程去機埸本來想包車, 問過幾間淘寶店, 多數都話我哋可以坐七人車, 但有一兩間堅持只可以坐九人車。

由於佢哋比較便宜嘅車都係白牌, 而非白牌嘅就貴成倍! 所以遲遲都未能決定租唔租。

後來上網見到有人分享呢兩間: MK Taxi 同 Yasaka

於是就 Send 左份表格俾 MK Taxi 先。收到回覆係話我想 book 果日嘅大型商旅車已經滿了….唯有轉搵第二間啦!

去 Yasaka Taxi 網站, send 左份預約表格, 但之後一直都冇收到佢哋嘅確認信, 亦冇任何 e-mail, 唔知係咪收唔到? 後來都係試下 Book 返 MK Taxi 嘅共乘機埸接送。

竟然又有位喎!! 好似好奇怪咁? D車原來會留俾共乘多! (??)

預約表格只需要填航班號碼同時間, 仲有你想幾點鐘到達機埸, 並無講幾點鐘上車的。
對方會響接送當日既前一日, 先至 send  e-mail 俾你話你知幾點來接你, 網頁有寫明「關西機場 ↔ 京都： 2.5-3 小時」, 大家可以自己預時間。

根據今次既經驗, 對方只係預兩小時車程, 即係我想下午兩點到達機埸, 佢約我12點05分上車。
可能5月中不太繁忙! 而且實際上我地比預期更早抵達機埸。

講返今次既搭乘情況先! 來接我地嘅係呢架 HIACE 9人車, 司機比預約時間早成差不多十分鐘到達我地民宿前面! 非常準時呢! 估計12點05分係「開車時間」, 預早少少到俾你放行李等等。

好在我哋都預早左落去等車。

架車冇其他人, 開頭以為一陣可能有人上車, 所以唔敢亂咁坐。

大約行左40分鐘左右, 司機突然駛入一個橋底停車埸。
心諗 : 唔通要接人? 又唔似丫, 冇理由呢度上車。

中途有得休息！

司機落車打開門同我地講話 Break! 嘩~估唔到咁好!
又話呢度離機場大約45分鐘。我就順便問下佢仲有冇人上車, 原來係冇架啦!

停車場側邊有間7仔, 仲有個好大好乾淨既洗手間同隔離一個吸煙區。

本來冇諗住入7仔, 點知一入去就掃左堆零食同幾盒模型。

我地響呢度都逗留左成廿分鐘! 而再去機埸真係大約45分鐘到, 好快呢! 根本就唔洗兩個鐘。

到機埸後先俾錢, 我哋4大1小 Total 18100 yen (約 HKD 1303)

總結 :

帶住個16個月既BB, 雖然我地有成4個大人, 但始終都係怕拎住行李周圍行仲要轉車, 所以回程就就最好係可以點到點, 睇過淘寶既「飛豬」同幾個網站既包車, 價錢都起碼2字頭! 既然係咁, 不如就搵間可以自己直接聯絡到既日本公司啦!
錯有錯著, 因為冇車可以俾我地「包」!! 最後選擇左共乘車, 咁樣反而仲抵! 亦同樣方便舒適。
可能唔係旺季, 所以冇其他人搭。
坐哂成架車緊係正, 但如果有其他乘客, 都唔會話坐得好迫! 價錢又比自己包車平好多! 有機會下次都會再搭。

MK Taxi 機場接送車（MK Skygate Shuttle）

http://www.mk-group.co.jp/tw/shuttle/kyoto

YASAKA Taxi

https://www.yasaka.jp/english/shuttle/book.html (英文預約網頁)