未夠６點，即係香港時間未夠５點！我就已經起左身啦！
因為民宿有露台，所以就行出去望下，原來真係睇到晴空塔！身處於日本既感覺更加強烈！
第一次自己一個帶埋阿仔去旅行，感覺好特別！雖然係香港都成日同佢周圍去，不過而家我地喺日本呀！飛幾個鐘先到嘅地方呀！
其實我仲好想繼續瞓, 但係點都係瞓唔到! 阿仔呢, 仲係瞓得好lum lum豬! 唔捨得叫醒佢。
本來plan咗話今日早D出發, 迪士尼一開門就跟住人衝入去拎出發前已經揀好的遊樂設施 Fast Pass! 結果呢, 我地就7點幾先出門口, 仲要慢慢行, 買下 Suica Card, 又買埋麵包食埋先去搭車。
所以其實同小朋友，儘管已經是小學生了，都係適宜將行程編排得輕鬆啲好。
去到舞濱站，嘩！同以前嚟好唔同丫！多咗好多嘢，當時趕住入園，所以都冇乜留意多咗乜，明顯係本身周圍冇乜嘢，印象中出站後向右邊行，就可以沿住條長長嘅路同橋，行到去門口。但而家變成要向左邊行，仲要搭「單軌電車」先去到！
後來玩完就知道原來多咗個商場，總之就複雜咗好多啦！😥
入園果陣我哋兩個都十分興奮，話哂我第一次去海洋，十分之期待㗎！
入到去個感覺超正，情緒都高漲哂！一邊「趕路」一邊閃電手咁影影影～
咁啱前面「地中海港灣」有表演，雖然睇唔到係乜表演（因為好趕），但都已經感受到樂園濃濃嘅快樂氣氛。
乜都唔理，即刻去搵我哋嘅目標：「玩具總動員瘋狂遊戲屋」。
但入面太大，又未黎過，唔識路呀！就算係向住地圖顯示嘅方向都唔係幾識行，我仲心諗，乜咁多橋同斜路既…..唔想浪費時間，捉個工作人員問吓。
點知收到惡耗……呢個 Fast Pass 已經俾人拎哂啦！😰 原來受歡迎嘅程度咁高！！唉…咁冇計啦！唯有衝去拎第二個機動遊戲啦！
因為唔識路，行咗超大個圈先搵到！我哋第一張FP呀！就係呢個：”Journey in the center of the earth”，阿仔揀的。
拎完第一個 FP 係唔可以即刻拎第二個，要等兩個鐘！張 FP 上面有時間，話俾你知下一次可以拎 FP 的時間係幾時。即係，我地呢張係 9:25 拎，下一次就係 11:25 先可以再拎。
趕完一大餐，終於可以自由自在做下其他野啦！
咁岩行行下又黎到「地中海港灣」（因為佔地太廣了），表演仲未完，阿仔又好想睇，幾熱幾曬都睇啦！（真係好～～曬）
{Life.Learning.Travelling} Our Diary 