Posted in 【英國】生活篇 (2021)

【英國。日常】拆禮物啦😆 (家檔到)

尋日啲家檔終於都送到嚟喇!由1月中到今日收到,用咗足足兩個月時間,其實就同網上啲人講嘅同搬運公司估計差不多啦!

本身係星期三啲家檔已到,但係因為佢喺我哋啲箱上面放咗人哋一樣重成500kg嘅嘢!仲要佢㗎車冇嘢可以搬箱,咁我哋又點搬啲箱呢?結果就冇得拎……再安排咗今日送嚟。

今次就好好多,有司機幫手又有架可以搬貨嘅機 (唔係好知部機叫咩名),咁就順利落哂貨。

不過其實今日送嚟之前都出咗少少事……就係我哋上一單果個人拎錯咗我哋啲箱,仲要即場拆開咗先發現唔係自己嘅,真係暈😑

問題係當時落緊雨!攪到老公好緊張想即刻揸架車過去睇吓點攪。好在未出發,只係喺鋪頭諗住買保鮮紙包返啲貨之際,搬運公司打嚟話已經攪掂,出發過嚟我哋度喇。

咁最後都成功將呢37箱嘢落哂地。

用咗兩日時間,將全部箱拆開哂,而家間屋亂到七彩,有排執了。


啲箱拆到咁上下果陣,突然間感到好傷感……再加上發現原來期待咗好耐嘅、喺香港瞓開嘅枕頭,竟然冇寄到嚟!啲低落情緒即時爆發!

好唔捨得……有時我會諗,將來有冇機會返返香港住呢?

其實,又係咪真係咁想同咁鍾意住喺香港?

講真,我嚟到英國先發現自己原來咁鍾意香港,對香港有太多感情了。都係因為呢度係我嘅成長地……一個周圍都充滿回憶嘅地方……住咗接近半世人生嘅地方喎!好唔捨得……好唔捨得……

一開頭嚟到嘅時候都冇乜太大感覺,當租到屋,同兩個仔住喺度果陣,有時靜靜哋都會好想喊。試過兩個仔返咗學之後,忍唔住狂喊咗一次,又試過同細仔睇睇吓講香港嘅 Video 果陣傷心到不得了……

唉…心情好複雜,見到咁多喺香港時用嘅嘢,點可能唔傷感……嚟到之後更加覺得喺香港嘅生活實在太美好!有工人……又唔洗返工……可以日日睇住佢兩個成長……又可以做自己鍾意做嘅嘢……隨時想去邊都得……因為有人照顧佢兩個……有邊個會想放棄呢一切呢?!

喺英國生活嘅心已決,雖然萬般不捨,但係一諗到佢哋可以接受英式教育,英式嘅生活同喺呢個環境成長,就會唔再轉「有冇機會返返香港住」呢個問題,因為我絕對唔想佢哋喺香港讀書……生活……等等各樣啦!亦冇可能同佢哋分開!即使佢哋將來大個咗都係唔會,因為佢哋係我小朋友,係我生命嘅全部!!

曾經形容過呢種情形就好似情侶分手咁,幾唔捨得都要走……因為香港已經唔再係從前美好嘅香港,即使幾有感情幾咁愛香港,都冇辦法唔分開……

睇到兩個仔喺呢度生活好開心,已經係最大安慰,我相信呢個決定係絕對冇錯。

失落情緒持續咗一陣,然後,繼續努力執拾……

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s