Posted in 【精油。芳療】, 【英國】生活篇 (2021)

【精油 DIY】乳木果油+椰子油乳霜 (小朋友可用)

喺英國有時都好得閒㗎!雖然話冇工人乜都要一腳踢,但係時間點都係有嘅!

呢排就開始學吓自己整 Lotion / Cream 啦!因為對精油 (Essential Oil) 有興趣,愈睇就愈想自己整嚟用!之前都為咗兩個仔嘅健康而學整嘢食,其實用喺皮膚上嘅嘢都一樣要注意吓,冇咁多化學嘢一定係件好事丫。🤣

第一次整就緊係搵啲簡單啲啦!如果你係新手就更加啱哂。呢個乳霜未必係最完美或最適合你,不過如果想加入呢個 DIY 行列嘅話,都可以話係入門同必試。而且我打算之後都會繼續試吓整其他唔同嘅 Lotion / Cream,有興趣記得 follow 我個 blog 呀!或者 Facebook Page,不過就好少 update,like 咗都叫做搵得返丫!😅

其實自己整乳霜係一啲都唔難,可以話超簡單!最緊要係買到啲材料。唔知點解硬係覺得喺香港係難買啲,呢度可能慣咗樣樣上網買,所以只要 search 吓就好輕易就搵到,而事實上呢邊嘅選擇就好似多D。

我呢次所有材料都喺 Amazon 買。

首先第一種材料就係乳木果油。(Shea Butter) 我係買呢隻:連結 Link

材料1:乳木果油(SHEA BUTTER)

好多 DIY Lotion / Cream 都會用到佢,睇返原來係因為……

一來佢係純天然嘅植物油脂,非常溫和唔刺激,連敏感皮膚都用得,BB同孕婦都可以安心用。

二來佢嘅油脂可以做到深層滋潤,防止皮膚乾燥爆裂,又好容易被皮膚吸收,仲可以喺皮膚表面形成一層保護膜,洗都唔係咁容易就洗得甩。

三來佢含有天然嘅抗氧化成份,同埋維他命 A, D, E, F 等等,促進表皮細胞再生!幫助延緩肌膚老化。

總之要保濕又要 homemade,好大機會都會用到佢。

認識咗乳木果油嘅功效之後係咪覺得超級無敵正正正呢?🤣 如果唔係想自己DIY都唔會刻意去做個深入了解,有時學到嘢就喺個 Blog 度同「有心人」「同路人」分享吓!都可以話係一件開心事。

咁第二個成份,椰子油又有咩好處呢?

材料2:椰子油 (COCONUT OIL)

椰子油又係一種超級保養成份!對皮膚對頭髮,甚至對牙齒同口腔健康,仲有指甲等等都有好多好處。

先講皮膚,可以補充皮膚嘅自然油份,鎖住肌膚表面嘅水份,滋潤皮膚之餘,又可以幫助肌膚形成天然嘅保護層,增強皮膚自身嘅抵抗力,預防暗瘡同粉刺。

佢仲有減淡幼紋 (女人最怕) 同皺紋嘅功效,抗氧化,用得耐仲可以改善埋皮膚膚質添!

早前曾經興起濕疹患者搽椰子油,話因為佢可以喺皮膚表面鎖住水份之餘又殺菌,紓緩到濕疹嘅情況。但有醫生話雖然好多產品寫住係天然,大部份都係有添加劑,所以大家試用呢個方法之前 (其實任何用喺皮膚上嘅產品都係) 一定要搵個部試吓有冇敏感唔舒服先!!

仲有要注意嘅係,如果係屬於油性皮膚嘅就要留意,因為有可能會堵塞毛孔。但又有好多人證實用完皮膚好咗,畢竟人人嘅膚質情況唔同,好定唔好真係冇人可以答實你……

可能椰子油嘅天然成份同效果都仲係有爭議性,所以我見網絡上都有好多係冇用椰子油做材料嘅方法,但我今次係第一次整,又見呢個方法幾乎係最簡單嘅,所以唔理咁多啦!試咗先講 😁

仲有一樣要提提大家,一定要買 Extra Virgin Coconut Oil,最好揀 Organic,同埋冷壓初榨—Cold-pressed (睇睇呢隻)

冷壓 – 棄用傳統高溫榨油,透過低溫,在不添加任何化學物質之下從種子榨取而得。因為冷壓的加工程式最少,所以還能保留天然抗氧化物,能減緩氧化和自由基形成,降低腐敗速度。 (資料來源網址

而家開始講維他命E油。

Advertisements

材料3:維他命E油(VITAMIN E OIL)

佢係天然嘅抗氧化劑,通過幫助清除自由基來防止對細胞的氧化損傷,即係防止皮膚細胞被氧化,延緩衰老。同時又係營養素,維持細胞膜完整性。而將佢加入配方材料入面就可以延長製成品嘅保質期,即係可以擺得耐D,好似防腐劑 咁。但需留意,純天然既係咁寫:d-alpha-Tocopherol/d-α-tocopherol,唔好買左合成的:dl-alpha-tocopherol/dl-α-tocopherol 。

市面上的天然形維生素E產品是以d-alpha -tocopherol最常見(另一種dl-alpha tocopherol為人工形式,生物活性僅有天然一半 (資料來源網址

Naturally sourced vitamin E is called RRR-alpha-tocopherol (commonly labeled as d-alpha-tocopherol); the synthetically produced form is all rac-alpha-tocopherol (commonly labeled as dl-alpha-tocopherol). (資料來源網址


簡單講,即係可以抗氧化、促進傷口癒合、淡疤同淡斑。
而加入自製乳霜嘅時候,仲可以令製成品擺得更耐添。


【自家製/DIY】Homemade Cream — 大人小朋友都適用

材料:

  • 乳木果油 – 100克
  • 椰子油 – 40克
  • 維他命E油 – 1滴
  • 自選精油 – 共10滴 (我用咗5滴羅馬洋甘菊,5滴薰衣草。)

做法:

用秤量好乳木果油同椰子油份量之後,細火隔水加熱直到完全融化。

熄火拎返出黎等15分鐘左右,冇咁熱之後就加維他命E油,再加精油,攪勻。

然後再等佢凍啲,雪入雪櫃令佢嘅凝固,但又唔好雪到好硬,我等咗好似30分鐘定40分鐘先拎出嚟,質地就會係咁:

Advertisements

呢個時候,如果懶人可以完成㗎啦!🤭
但如果質地想佢更似平時用嘅 cream,可以用攪拌器,將佢打到乳霜狀。
因為本人比較懶,同埋心急!所以今次就咁完成先喇~

我今次係用咗邊隻精油呢?上面寫咗係羅馬洋甘菊同埋薰衣草。

羅馬洋甘菊 Roman Chamomile:有助於鎮靜神經,舒緩緊張壓力,有安撫效果。皮膚方面對濕疹、發炎、敏感皮膚、乾燥痕癢都有療效。最重要係佢非常溫和,幼兒都用得,仲話係小朋友常備精油之一!所以第一種精油我就揀咗佢。

薰衣草 Lavender:同樣係十分溫和既精油之一,小朋友適用。佢出哂名有助睡眠同鎮靜寧神,夜晚沖完涼搽完等訓覺就岩哂喇!另一個原因就係陣味都唔錯。

講開氣味,其實前者(羅馬洋甘菊)陣味比較濃厚,未必人人都鐘意。哥哥就唔鐘意啦!我由一開頭麻麻地,之後聞下聞下就開始 OK!覺得都唔係完全不能夠接受丫。

除此之外都仲有好多種精油對小朋友係安全的,有機會下次再分享啦!!

使用後記:

哥哥雖然唔鐘意隻味,但係都好乖肯搽。但細佬用左幾日後,皮膚開始出現痕癢同好多粒粒,立即停用。暫時未知係因為精油定其他……會繼續嘗試!再同大家分享!

~ ~ ~ 使用精油必須注意安全!~ ~ ~

精油是高度濃縮的植物萃取物,因此需要適度地使用,千萬不要以為用得多就好。如果是初次接觸精油,請務必多做資料搜集。

用在兒童身上時,可先用極少量已稀釋的精油,塗在手臂內側或其他部位試驗敏感反應。絕對不要塗在兒童的手指上,因為他們可能會把精油從手轉到眼睛或口中!這是十分危險的。

如果你懷有身孕、有特殊醫療情況,或有關於精油安全的問題,請在使用精油前,先諮詢醫生意見。

精油絕對不能食用

如果有嚴重的皮膚、腸胃或呼吸道過敏或不適的情況發生,應立即停止使用精油。

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s