Posted in 【精油。芳療】, 【英國】生活篇 (2021)

【精油 DIY】驅蚊(蟲)膏 – 盒裝方便攜帶

轉眼間,2021年已經過左4個月,好快就開始步入夏天啦!

黎到呢邊未夠一年,天氣既變化仲未完全體驗哂。由一開始(10月)到埗時覺得好凍,到12月至2月時真真正正既凍!直到而家所謂既春天,冇錯好似回暖,但係氣溫依然由零至12度左右不等。只不過係因為一來日照時間長左,二來個太陽曬得耐左,又唔知點解個太陽好似特別熱咁!如果冇出去,有時係屋企都真係要換短袖衫褲,連我咁怕凍既人都會換!(不過涼返少少就要換返長袖!)

周圍d花花草草樹木都好似由沉睡中起返哂身!明明出面棵樹黎到果時一塊葉都冇,到而家竟然開哂花!!

雖然未見有好多蚊蟲(但開始有螞蟻),不過做定準備都係有需要!所以今次整既係驅蚊(蟲)膏。

本來想整噴霧,但為咗保存問題,用酒精係少不免,而且亦都係最好的選擇(暫時所睇到的資料所知,將來睇得愈多可能會發現更多!)。但問題係,原來喺英國要買隻最普通嘅乙醇係好困難,搵到的都係超貴,再唔係就係「變性酒精」!搵咗好多資料都係唔知用唔用得喺呢D噴霧度,都係算啦!整啲穩陣啲,成份入面冇水既 homemade 驅蚊膏用住先。

其實做膏都好,唔怕個樽漏D液體出黎整污糟手袋丫嘛!
當佢護膚/保濕咁搽又得!最重要係試左D精油對皮膚有冇敏感先!
用精油,一定要小心謹慎!必須先知道安全守則同各種精油特性。唔係一陣用到皮膚敏感,甚至發生意外就唔好啦!緊記。


Homemade DIY 用精油自製驅蚊膏

材料:

頭4樣材料加埋係30g,咁成品大概都係30g,精油就要睇你想要幾多%濃度,我整俾兩個小朋友,大嘅10歲其實可以接受高濃度少少,不過我兩個都用得,因為諗住係帶出街,所以最好唔洗分啦!咁濃度就要就一就細果個喇,所以我將濃度定喺1.5%。

簡單講,濃度計算係去決定你用幾多滴精油。2至6歲建議用1~2%,我就取中間數1.5%。如果保守D,其實用0.5~1%就夠。至於哥哥屬於6~15歲,可以用1.5%~3%。

咁點計?用呢次防蚊膏為例,做出來嘅總量係30克 (總容量),咁就用30乘濃度,即係30×0.015 (1.5%=0.015, 如果2%=0.02, 3%=0.03 etc)。然後再乘20,因為 1 ml=約20滴精油。咁就計到要用幾多滴精油。

計數時間!30 x 0.015 x 20=9(滴)

所以總容量30克,濃度 1.5% 就要用9滴精油。
當然,你可以少過9滴,不過就唔可以多過9,否則濃度就會高左。
將來有時間&機會時再詳細講解下。

製作步驟

量好哂D材料之後,先隔水加熱去溶化 (melt) 頭幾樣材料,即係蜂臘、乳木果油、甜杏仁油同椰子油。期間可以用一隻筷子攪下,等佢快少少溶。

全部都溶哂之後就可以熄火,等一陣。

開始冇咁熱既時候,就可以加入維他命E油同埋精油。再攪拌均勻。

最後就係倒入你要裝的容器入面,等佢凝固,咁就完成了!係咪好簡單呢?

由於第一次整,英國嘅天氣又比較凍,所以都好快就開始凝固😓,即刻拎返去再加返熱等佢再溶。不過都係唔夠快手😖,因為未倒入容器就已經又開始凝固!所以淨返我諗都有成幾毫升或者幾克既防蚊膏係個量杯入面,下次要快手少少先得。

防蚊精油的選擇

精油方面,我用左:

  • 香茅 (Citronella Essential Oil) 2滴 – 天然的驅蟲劑,十分適合用來驅蚊
  • 茶樹 (Tea Tree Essential Oil) 3滴 – 可以作為驅蚊劑。具有抗菌特性,可以舒緩昆蟲叮咬
  • 雪松 (Cedarwood Essential Oil) 2滴 – 驅蚊。可殺死和驅除跳蚤,蝨子,蚊子,螞蟻,蟎蟲等害蟲
  • 廣藿香 (Patchouli Essential Oil) 2滴 – 殺菌、消炎、止痕及驅蟲

除左上面4種精油外,仲有好多其他精油可以選擇:

  • 薄荷 (Peppermint Essential Oil)
  • 檸檬 (Lemon Essential Oil)
  • 尤加利 (Eucalyptus Essential Oil)
  • 羅勒 (Basil Essential Oil)
  • 丁香 (Clove Essential Oil)
  • 百里香 (Thyme Essential Oil)
  • 檸檬草 (Lemongrass Essential Oil)
  • 天竺葵 (Geranium Essential Oil)
  • 薰衣草 (Lavender Essential Oil) 不過聽聞薰衣草好惹蜜蜂!

揀精油時需要注意,因為會搽在皮膚上,所以盡量揀D非「光敏性」的精油。(phototoxic 光敏性)
呢類精油會令皮膚產生光敏反應,即係話搽完之後接觸到陽光的話好可能會導致肌膚曬傷、紅腫、變黑、甚至出現嚴重敏感等情況!

雖然話可以較低D濃度,但始終出去玩都可能有陽光,而且係俾小朋友用,我自己就唔會選擇呢類精油喇!

但如果你又真係好想用,咁請閣下先做好 research 先!!

仲有要注意俾小朋友用的精油份量,尤其是兩歲以下,就唔建議用啦…..

仲有仲有,剛好睇到呢篇早期的報導,同大家分享下。係講話消委會驗出精油含有致敏物,有小朋友因為搽左多種精油調配的驅蚊劑後出現嚴重皮膚敏感仲暈低添!!

消委會今年2至3月測試市面上30款香薰油,雖然大部分樣本聲稱產品屬「pure」純精油,但全部樣本均驗到含有超出歐盟化妝品規定的致敏物,兩款樣本更含多達7種致敏物。消委會又引述香港中毒諮詢中心資料,指有慢性皮膚患者使用一款由多種香薰精油調配的混合精油後,出現抽搐,有一名小童使用由多種香薰精油調配而成的驅蚊劑後,出現嚴重皮膚過敏致昏倒;亦有人在使用1款香薰精油產品後哮喘發作。


所以用精油真係要謹慎!小心!最重要先測試有冇出現敏感!同埋要稀釋使用。當然仲要學識點樣「安全使用」啦!

消費者在揀選及使用香薰精油時,應留意以下提示:

– 勿將未經稀釋的香薰精油塗抹於皮膚上,避免因致敏物濃度高而誘導皮膚過敏反應;
– 宜先稀釋後再塗抹少許於皮膚上,如出現過敏反應或不適,應立即停止使用;
– 含多種精油成分的產品較易引起敏感,選擇前須留意產品所含的致敏物成分;
– 切忌胡亂食用香薰精油,避免導致過敏甚至中毒反應;
– 香薰精油易燃,應存放在陰涼的位置,遠離熱源或火種;
– 容易致敏人士在使用香薰精油前要先進行過敏性評估。

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s