Posted in 【LIFE】飲飲食食, 【旅】大阪京都 2018 - Family Travel

【京都。木屋町】超級無敵美味壽喜燒:モリタ屋 (十級推介) 一定要預約!

京都木屋町壽喜燒 モリタ屋入口

大推大推大推~~~

呢間「モリタ屋」既壽喜燒真係好食到暈呀!!! 想試下壽喜燒既可以諗諗佢。

行程第五日, 上午著和服, 下午還和服再去嵐山「快遊」。因為去到果陣時間已經唔早, 我地又慢慢 hea 行, 走果陣D商店都開始關門。

跟住就搭巴士去三条, 目的地就係呢度: モリタ屋 食晚餐。

我地係嵐山搭6點2車, 去到三条要差唔多成個鐘! 不過可以體驗搭巴士+望下外面既風景, 都唔覺得坐左咁耐。

大約7點半去到, 但因為我地冇Book位, 接待員初頭同我地講話 full 哂, 果下都幾失望。點知隔離果位姨姨就同佢講話可能有位, 所以我地就企&坐哂係門口位度等….

終於可以入座啦!

京都必吃壽喜燒, 環境

好 Surprise! 間房係「個室」!! 好正!!  Continue reading “【京都。木屋町】超級無敵美味壽喜燒:モリタ屋 (十級推介) 一定要預約!”

Posted in 【LIFE】飲飲食食, 【旅】大阪京都 2018 - Family Travel

【大阪●美食】串炸「串カツ だるま」心齋橋店

尋日落雨落足全日,細佬(仲有哥哥都係)留在民宿全日,今日好好天,有得出街街,好開心啦~

其實就算落雨都要出呀!因為今日有件好重要嘅事…就係約咗個日本朋友食 Lunch。

朋友就揀咗呢間:「串カツ だるま」食串炸。

だるま 心斎橋店 Website Tabelog

20180514_110603
呢度咁多人, 要捉到實一實呀!
20180514_110702
未食野, 就想食甜品?!

原來樓上都有,仲要係環境都好寬敞。人又唔多,所以我地好似包左半個埸咁。

Continue reading “【大阪●美食】串炸「串カツ だるま」心齋橋店”

Posted in 【Rex】成長記錄, 【學習】認字

【Rex 學習】中文認字

唔知大家有冇睇開 Facebook 一啲二手童書 Group?我間中都會睇吓。最近就俾我見到套中文認字閃卡,係大 size 果種,於是就俾我買咗啦!

之後喺淘寶訂購咗幾百張白卡紙,好似係 300g/張,重到阿媽都唔認得😅

但要自己手寫,我又懶,買就叻,做就……哈哈!都寫咗10張㗎!不過就好少同佢睇,所以其實都仲係停留咗喺度。

去完旅行返嚟正常都唔想洗錢住,已經洗咗一大筆嘛……都唔知點解無啦啦又走去睇啲 Group。都好嘅!中文字卡不嬲都想買,只不過我未搵到邊度有,先至唯有去淘寶訂。而家終於都有啦!就開始同細佬玩嚕!

首先,我係已經知道佢OK會睇嘅,我先決定買。之前一直有用迪士尼美語世界啲卡仔同佢閃,佢好開心㗎!重點係我發現佢真係有睇,仲會好似睇到唔夠喉咁!所以每次同佢玩完我都會攬到佢實同大力拍手讚佢,佢又會笑得好開心!好似因為認到字而有滿足感咁。

而家一日同佢閃兩三次,記得果吓就會玩,唔知成果會係點呢?我都好期待……就好似用迪士尼套教材咁,我相信堅持同佢做都係會有成果嘅!

希望佢可以對中文都有興趣啦!英文我反而唔擔心。

Posted in 【買】Shopping, 護膚品

Kiehl’s

今日去做 Laser,做完順便行吓,諗住買返啲護膚品。
啱啱先去完日本,冇理由買 Sofina 㗎!其實我想買眼部精華,Sofina 果啲我都用緊,話就話可以當眼精華,但我多數用嚟搽喺最後,即係用作減淡或預防皺紋。但係我又懶,唔係成日有用,因為搽完一大堆嘢之後,通常都已經唔記得搽佢……

行過Kiehl’s,好耐冇買佢啲產品。
買左兩樣野 ($1300),俾錢果陣先知道原來對上果次係2015年!
係囉~不嬲用開 Sofina,有乜咁奇?
只係覺得乜時間過得咁快……

今次買咗兩樣野,一支自己用,一支俾媽咪。

因為我係會員而且今個月係生日月,所以送埋呢三樣野!
印象中好似舊年定前年都拎過一次。
都係幾唔錯嘅禮物^^

最後就係送嘅 Sample。

又因生日月份有雙倍積分,一蚊一分,即係我即時有 2600 分!已經可以換到野啦!不過果支好似係金盞花洗面,唔係幾啱我,所以就留返下次先啦!(希望記得!)

今次先感受到雙倍積分嘅「威力」!

Posted in 【旅】大阪京都 2018 - Family Travel

【大阪。京都】關西機埸=>難波:搭特急Rapi:t

出發前, 在南海電鐵網站內買了「特急 Rapi:t (普通席)」成人 : ¥1,130, 兒童 : ¥570

普通車費即一般空港列車都要 ¥920/成人, 加多二百 yen 就可以坐 Rapi:t, 所以就決定買飛。

不過下次再黎既話應該唔會再買啦! 因為真係快好少, 但最大問題係, Rapi:t 既班車比較少! 好似我地咁, 去到南海電鐵既服務櫃台換車票時, 下一班 Rapi:t 列車要等成25分鐘!! 咁如果我係買普通車票, 呢25分鐘就唔洗呆等, 而且問題係都係慢10分鐘左右…即係話, 點都會快D到達目的地!! 所以問題唔係平同貴, 因為都係差少少, 最大問題係時間。

=> 南海電鐵 特急 Rapi:t 網上買票 :
http://www1.nanka-e-tabi.com/NERCT/ItemDetail.aspx?tc=IB4AOSKIXWTT&sk=1

20180512_140120
我到左日本啦啦!嘻嘻~

Continue reading “【大阪。京都】關西機埸=>難波:搭特急Rapi:t”

Posted in 【旅】大阪京都 2018 - Family Travel

【大阪。住宿】西心齋橋民宿。好大的露台+位置方便

說到民宿, 第一個想到的就是 Airbnb。
在找優惠碼的你, 快去登記+訂房 (接此連結), 訂單滿$550 HKD便可享$263的優惠折扣了!!
因為要填入境表格, 租民宿的記得要準備好地址和電話號碼! 是一定要填的呢!

(咦? 怎麼又用了書面語來寫….哈! 希望沒讓大家感懊惱)

今次去日本租的兩間民宿都十分滿意, 跟上次在芭提雅的那間感覺差很遠呢!所以誠意推薦!!

先說在大阪這間, 位置就在難波地鐵站附近, 走路大約只是幾分鐘。
不過沿途都有很多店鋪, 可能會令步行時間增加呢!(受不了誘惑)

由於沒有刻意拍下照片, 所以大家就自行到民宿的連結去看好了~ 照片跟實際上相差不遠。

 

20180513_113700
行程第二天就下雨了…..

上圖是民宿的露台, 超大!拍到的只是其中三份一!除了有這張戶外桌椅和太陽傘外,再前一點有個網床, 看到嗎?(我知道….看不清楚!連我自己也幾乎看不出來!)

照片左轉走的話又是三份一,有曬衣服的地方!即使下雨天也都不用收衫,因為雨打不到,超正! Continue reading “【大阪。住宿】西心齋橋民宿。好大的露台+位置方便”

Posted in 【LIFE】飲飲食食, 【旅】大阪京都 2018 - Family Travel

【大阪。梅田】晚餐:但馬屋E-ma

但馬屋イーマ,係一位現居大阪的日本朋友推介, 不過佢話佢自己都未去過…叫我試完話返佢知好唔好食!!估計應該都係睇 [食べログ] 的食評,見評分高所以推薦吧!?

由於行程嘅關係,編排咗喺第三日夜晚去梅田果間分店食。不過呢間就唔可以 Online Booking,要用電話預約,我地民宿附近果間心齋橋分店亦都係冇得 Book,最後唯有請朋友幫我地打電話去 Book。

Book 咗七點半,本想諗住食晚飯前去 Grand Front Osaka 果間 Kid O Kid 度玩。但最後我地因為行完街之後所剩嘅時間唔夠,所以就冇去到,真係好遺憾!但冇計啦!我已經編排得好少行程……

六點幾由民宿出發,難波搭地鐵去梅田十分鐘都唔洗,不過行去地鐵站都有一段路程,而且去到梅田又驚迷路,所以咁早出發係正確的!可以喺七點半前準時到達!日本人好講信用嘛!遲到就唔係咁好啦。

去到梅田出站後完全唔知點行,要不斷問路先去到!(太驚行錯)

20180514_191714
連接地鐵站的入口

Continue reading “【大阪。梅田】晚餐:但馬屋E-ma”

Posted in 【旅】大阪京都 2018 - Family Travel

【京都(2018)】共乘制機場接送 MK Taxi ~ 便宜方便舒適的好選擇

共乘的士松埸接送 MK TAXI

回程去機埸本來想包車, 問過幾間淘寶店, 多數都話我哋可以坐七人車, 但有一兩間堅持只可以坐九人車。

由於佢哋比較便宜嘅車都係白牌, 而非白牌嘅就貴成倍! 所以遲遲都未能決定租唔租。

後來上網見到有人分享呢兩間: MK Taxi 同 Yasaka

於是就 Send 左份表格俾 MK Taxi 先。收到回覆係話我想 book 果日嘅大型商旅車已經滿了….唯有轉搵第二間啦!

去 Yasaka Taxi 網站, send 左份預約表格, 但之後一直都冇收到佢哋嘅確認信, 亦冇任何 e-mail, 唔知係咪收唔到? 後來都係試下 Book 返 MK Taxi 嘅共乘機埸接送。

竟然又有位喎!! 好似好奇怪咁? D車原來會留俾共乘多! (??) Continue reading “【京都(2018)】共乘制機場接送 MK Taxi ~ 便宜方便舒適的好選擇”

Posted in 【哥哥的小學生涯大小事】

哥哥的禮物

星期五放學返嚟拎住呢個公仔,原來係中文科老師送俾佢,因為佢乖喎!

多謝老師呀!哥哥都要繼續努力!我成日都覺得佢係食咗藥之後先咁乖……但其實佢本來就係咁乖乖㗎……

佢好鍾意,瞓覺都捨棄咗隻 bear,攬住呢隻公仔瞓!

Posted in 【LIFE】2018, 【Rex】成長記錄

準備去旅行啦!(+細佬發展情況)

成個月有多冇寫 blog,睇嚟我真係好忙!🤤

忙啲乜,前排搬屋都已經夠多嘢攪,仲要同工人攪日本簽證!臨發現時日無多果陣,仲差兩個星期日左右就出發…好在,唔需要等5~7個工作天就已經收到通知話批咗,拎得visa啦!太好啦!幾驚唔批…唔批錢事少,冇人幫手就好大件事啦!

因為根據上次旅行嘅經驗,真係會攰到咩咁㗎!想瞓多陣都唔得。即係呢,個B晨咁早起身,習慣咗都係工人湊住先,到我瞓醒先接手,但去旅行就冇啦…所以我同爸爸都一致認為呢個決定係冇錯!(帶埋佢去)

其實幫工人攪簽證都唔係咁煩複,只要齊哂文件就OK!但有啲冇喺網站度註明,但原來都係要嘅,其實係咪應該改改佢,寫返清楚啲呢?攪到我係咁即時搵俾佢哋…

不過算啦!都批咗!而家就等出發!仲有一個星期咋!好好好好好期待呀!

細佬而家16個月大啦!呢張相影到佢超級老積…其實真人都唔係咁老成嘅!係好 cute 㗎!而家成日扮可愛引人笑,又比以為大膽咗!仲大膽到不得了,成日擒高擒低,睇少一陣都可以已經爬咗上哥哥張書枱度,隻手攪緊隻窗啦!😲

未係好識講嘢,但會有意識咁指住一樣嘢讀,例如英文字,圖書同海報上面嘅字,有時睇圖書見到幅圖畫仲會「咔」一聲笑出嚟!好似覺得個公仔好好笑咁!

講得最叻嘅應該係個「街」字,喊果陣識叫「媽」,好肚餓或者想食嘢時識講「mum」,擲骰仔又學人講個掉字,但係…完全聽唔出係咩字囉…😂

佢好鍾意喺我哋張床度典來典去,好 enjoy cozy 同軟林林嘅嘢!但就多次因為突然撐個人,撞到我爆缸!尋日先俾佢撞爆完咋!痛到我呢…仲要佢又痛,狂喊,我點痛都要忍住,首要任務係錫返佢……

佢雖然超級好動,成隻 monkey 咁,但係又可以非常專心。呢樣嘢同哥哥唔同,而且比哥哥早更多對書本有興趣,會自己拎出嚟睇。

哥哥而家鍾意睇書嘅程度,可以用「極度喜歡」嚟形容,甚至都未夠貼切,因為佢經常喺未瞓著果陣,偷偷地睇書,仲要冇開燈!有時半夜醒咗,都會拎書嚟睇,確實係非常誇張!

Posted in 【Baby Food】

【14個月】每日餐單 (March from 2018.3.18 ~ )

今個月開始會喺度記錄細佬每日餐單。其實之前一直都有記錄,等我得閒果陣再喺度寫返啦!雖然都係 copy and paste,但都要搵時間整理吓!

呢個3月都係由18號開始記,因為本身諗住唔再記,但諗諗吓又好想記,咁不如寫喺呢度啦!應該會比較努力😁 不過有時我都會忘記咗㗎!(大家作為參考好了,我只係一個普通媽媽,而且都係剛開始煮食半年左右😊)

細佬14個月,體重大約係9點幾 kg。通常一日都有4餐固體食物,只飲朝早起身一餐奶,約 100~180 ml。

2018.3.18 Sunday

Breakfast : Banana Pancake, Strawberries, 紫甘筍汁杏脯燕麥

2018.3.19 Monday

Breakfast : Banana Pancake, 自家芝士粟米包小半個

Lunch : 藜麥飯波,炒茄子,蕃茄仔,Bell pepper meatballs

Tea time : 日式煮紫甘筍,芝士炒蛋

Dinner : 白飯,肉桂蘋果,青椒豬肉丸,西蘭花

2018.3.20 Tuesday

早午餐 : 日式揚豆腐,茄子,青椒豬肉丸,白飯,配和風蘿蔔醬

♡因為起身後未食早餐就瞓返,再起身時已經唔係早餐時間,否則就唔知幾點食午餐,所以就食一餐算了♡

Tea time : 自家芝士麵包

Dinner : 洋蔥西蘭花炒蛋,蘋果,白飯

2018.3.21 Wednesday

Breakfast : 烚蛋,自家提子包,芝士,車厘茄

Lunch : 紅扁豆白飯波,雞肉丸(冇食),南瓜,白蘿蔔

2018.3.23 Friday

Lunch : 螺絲粉,牛肉薯波,烚蛋,豬肉丸

2018.3.24 Saturday

Breakfast : Banana Oats Pancake, 杏脯燕麥

Lunch : 洋蔥牛肉紅蘿蔔飯波,香蕉

2018.3.27 Tuesday

Lunch : 甘筍,粟米藜麥菜心蕃薯飯波(焗),車厘子,火龍果

Tea time : 牛奶麵包

Dinner : 焗飯波(同上),白飯波 (即是有兩款),甜豆煎蛋,豆腐豬肉漢堡

♡個煎蛋佢肯食,好多時都唔食㗎!比較鍾意食烚蛋,又或者佢鍾意食煎嘅多啲?焗蛋9成食剩大半♡

2018.3.28 Wednesday

Breakfast : Pear (綠色皮果隻,唔記得叫咩梨)

Lunch : 三色螺絲粉,洋蔥炒牛肉,芝麻紅扁豆焗紫心蕃薯波波

啲牛肉就咁俾佢食㗎咋,但我有間中有用筷子餵佢。

Tea time : 自家肉桂提子包

Dinner : 烚蛋,豆腐豬肉漢堡,火龍果,鮮淮山西蘭花紅米糙米飯波

2018.3.29 Thursday

Breakfast : Banana Pancake, Yogurt

Lunch : 豆腐豬肉漢堡,揚豆腐,紫菜黑白芝麻飯波,車厘子

Tea time : Cheese, 自家提子包,自家蘋果蛋糕

Dinner : 紅蘿蔔飯波,雞肉漢堡,烚蛋,車厘子

♡大件事!而家好似開始對烚蛋麻麻地!之前明明好鍾意,尋晚同今晚都唔多掂隻蛋♡

2018.3.30 Friday

早餐:杏仁片核桃杏脯燕麥

♡點知勁眼瞓,食唔多♡

午餐:有機粟米,焗雞肉漢堡x2,焗紅蘿蔔薯餅,白飯波

♡哥哥走埋嚟合照,攬到人家咁嘅樣ಠ╭╮ಠ ♡

下午茶:自家提子方包一片

晚飯:外出韓食 ~ 白飯,烤牛肉、豬肉、紅椒、黃椒,芝士粟米,蛋…

2018.3.31 Saturday

早餐 : 粟米煎蛋,Oatmeal with cranberries

♡又眼瞓到暈,直頭暈咗😅 所以只係食咗兩啖蛋,燕麥冇食到♡

午餐 : 烏東,紅蘿蔔薯蓉,蕃薯,雞肉丸,自家提子方包半塊

♡早餐冇乜點食,竟然連午餐都食咁少…原因係啲嘢唔啱佢胃口😑 最後唯有俾半塊麵包佢,等佢開吓胃♡

晚餐 : 紅米糙米白飯波,粟米煎蛋,三文魚

♡自己食得好差,唔肯食,最後幾乎全部工人餵……😣♡

Posted in 【Rex】成長記錄, 【學習】

14M9D ~ 開始學習用筆畫畫啦!

星期六同哥哥出中環睇醫生。爸爸收咗工,緊係叫埋佢出嚟啦!難得只有我哋兩個,細佬喺屋企,我哋就完全屬於佢啦嘛!睇完醫生Join埋爸爸就周圍行吓。

入咗HMV,哥哥睇玩具,爸爸唔知行咗去邊,我陪咗哥哥一陣就去睇第二啲嘢。原諒我……睇啲男仔玩具真係冇興趣㗎……

無意中發現咗呢盒特粗嘅蠟筆!諗起之前聽完姑娘講要俾佢試吓拎筆畫嘢,於是即刻買。

買咗返嚟幾日都未開始用,早幾日第一次,同細佬喺廳張檯,俾佢坐喺張櫈仔度畫。

雖然我有捉住佢右手同佢寫吓畫吓,但係佢畫兩吓就開始拎啲筆嚟玩,最後仲將支筆擺去個窗度,又想掉……好在唔易爛啫!

今日食完晚飯,佢又好似平時咁,多次走埋嚟要我抱住。

都係一上嚟就攪個 keyboard 啦!再唔係見到第二啲新奇嘢就攪吓。

呢次我突然醒起呢盒蠟筆,就拎返上次畫果張紙出嚟俾佢畫啦。

今次叻咗!開頭未係好記得咁,後來就開始畫畫畫~ 畫完一支又拎另一支,不停換筆!係不停!拎起畫幾秒就換!

其實抱住佢睇住佢畫仲好!一來親暱啲♡二來要捉住佢手都容易得又,三來就係睇得好清楚佢點畫(玩)法。

仲可以喺佢一邊畫嘅時候,一邊教佢認識咩顏色,我覺得個一個非常適合同一歲BB玩嘅親子遊戲/活動。一邊親子 (我成日都會係咁錫佢面珠仔),一邊教吓佢嘢,佢又開心有新奇好玩嘅嘢俾佢攪。

我覺得佢係「攪」,比起玩,用「攪」呢個字嚟形容絕對係更加貼切!😂

Posted in 【迪士尼美語學習】World Family, 【Rex】成長記錄

迪士尼美語世紀課程:認識各種職業

2018-03-10, Day 433, 14m8d

呢兩日突然咁凍,又病病哋,但都唔想因為咁而唔帶細佬去玩!哥哥以前好似參加得比較多,反而細佬係少參加。呢個係第一個「非Storytelling 」嘅課程!(哥哥以前未有的) 以後要多啲參加先得。

一入去都仲係好怕醜,係都要痴住我想我抱,唯有攬住佢上堂啦!慢慢我都放低佢喺地下,但都仲未 warm up。

我諗有成10~15分鐘左右,先開始自己企起身,即係好似之前咁,會想走來走去,但又未 action。

導師一拎啲櫈出嚟,百厭豬就「大顯身手」!爬上去,仲企埋喺櫈上面添!張櫈嘅大細同顏色都同屋企果張99%相似!佢完全係駕輕就熟。

導師同佢玩完之後,俾咗呢個醫生聽診嘅玩具俾佢,不知幾開心,有玩具玩丫嘛!每個BB都有㗎。

到尾聲啦!一人拎幾張唔同職業嘅公仔貼上張大卡上面,好好玩,好新奇呀!

睇吓佢哋幾 busy!哈哈……

上堂期間細佬都有走來走去,不過唔算多,比較多嘅係想走埋去攪導師已收起嘅玩具。佢見到有條杆咁嘅嘢就拉起!

有時又無啦啦喺度倒後行,仲突然自己轉圈添!我係第一次見到佢轉圈咋!

返屋企同工人講,佢話原來係早一兩日教佢轉過嚟,但我明明喺度都睇到,但我又見唔到佢轉嘅……?

同場加映:終於收到呢條好靚嘅奶咀鍊啦!多謝❤ 真係好靚靚。不過細佬唔食奶咀,條鍊又咁精緻,應該會永久「珍藏」。😉

Posted in 【買】BB用品, 【買】Online Shopping 網店購物, 環保尿片 Cloth Diaper

又買新片片!一睇就知我最LIKE邊個牌子啦…

nickisdiaper2018.jpg

雖然Rex啱啱先至14個月大, 不過我想為戒片片做定準備!
所以就揀咗上圖果套 “Best Bottom Potty Training Kit”。
另外, 因為屋企用緊嘅片片已舊, 唔係話唔可以繼續用, 不過我真係好想同佢換多啲輕巧啲嘅片! 而且有啲牌子吸咗VV就會勁臭!當然同時間有關, 但只不過係隔耐少少都會好臭喎!我仲有好多其他牌子可以對比, 所以我真的不能亦不想接受….!

又有啲牌子雖然唔算好臭 (點都係會有啲, 分別在於是否強烈!!), 但質地就偏硬, 我覺得唔夠舒適。

今次就主力只買 Best Bottom 呢個牌子, 因為佢係片殼同片芯分開, 又有 button 可以扣實, 條芯唔會周圍走, 呢樣好緊要呀!大家都知道, 啲 BB 幾咁活躍㗎啦!換片又點會同你乖乖瞓喺度唔郁任你舞。呢個時候, 我唔想仲要去 adjust 冇固定到嘅片芯囉……

另外一個重點就係佢啲片芯仍然好柔軟, 感覺好舒服, 我買既係 “Stay Dry Bamboo – Large”。
今次想試下第二款, 就揀咗 Bamboo, 同 Bamboo Overnight。而家夜晚用緊即棄式, 唔想咁臭嘛……我又唔敢博用一啲比較薄嘅環保尿片(Flip, Best Bottom) Best Bottom 呢隻片芯我怕唔夠吸。

講返今次我都係 Nicki’s Diapers 度買, 原來星期六 order 仲有 giveaway 添!!

但如首圖 Order Summary 所見, 只有3位幸運兒咋!!唔知有冇我份呢~嘻嘻!!

Order Summary 第二張相果份係 Free Gift, 買滿 USD 49 就送俾你, 唔洗抽獎。
買滿 USD 100 同 200 又有另一款禮物, 我記得滿 $200 好似係送 Bamboo Blanket, 都幾吸引!可惜我冇乜野要買了, 或者遲D要戒片片果時就要再入貨。
但如果你係新手媽媽/ for new born baby/ 入定環境尿片做準備, Nicki’s Diapers 真係一個唔錯既選擇。

lineb_simple_121_1m

相關文章:

【環保尿片 CLOTH DIAPER】

美國製造環保尿片 Best Bottom【+另一推薦買片網站】

Posted in 【Rex】成長記錄

識跳,仲會餵人食野

過埋今日,細佬就14個月大啦!
未夠一歲識行,未夠14個月識跳!真係跳起,雙腳離地!
仲有,未夠14個月就差啲打到「關斗」!超勁!!(我就話打唔到好啲,好驚佢扭親條頸)

其實,我自己就認為係同點同佢玩有好大關係。以前哥哥細個果陣好多我都唔知道或唔識點做。而家哥哥都7歲啦!而且亦因為一啲特別嘅經驗,知道有啲野真係要由細細個開始同BB玩+訓練。

即係例如用腳踢野啦,用手拋或掉,甚至好似我咁,見到佢雙手撐住地下,個頭「烏」低少少,我就試下扶住佢打關斗,俾佢感受下係咩滋味!(點知佢夠力打向側邊……)

仲有,我認為BLW都有一定幫助!佢嘅手部發展幾好,識得「禁」、搣、「練」等等….幾個月大就識用手指去掀書。

由11定12個月開始俾佢用匙羹。今日有新嘅突破!終於自己「不」到少少乳酪嚟食啦!Yeah~

Posted in 【旅】曼谷芭提雅 2018

【芭提雅住宿】The Base Central Pattaya

這間不是酒店,是 AirBnb 的「民宿」。

說是民宿真有點牽強,實際上,這兩座大廈幾乎都是出租與遊客的。

因為我們在這幾天看到的情境就是這樣,每天都有很多人,跟我們入住當天一樣,行李一堆的,站在閘門外等候……

而且,就以我們今次的房東為例,在這兩座大廈就有好幾個單位放在 AirBnb。

The Base Central Pattaya 的位置很好,在 second road,出大門後右轉,大約5分鐘左右就會到達 Central Festival。

我們沒有去 Central Festival 逛,只有在對面一間不多人的餐廳吃過晚飯。

如果往大門的左邊走,也是幾分鐘左右路程,便會到達這裡:

原來這個商場叫做 “Royal Garden”,我幾乎想要說這裡就是「信不信由你博物館」😂

要去沙灘的話,也都只是幾分鐘就可以了! Continue reading “【芭提雅住宿】The Base Central Pattaya”

Posted in 【旅】曼谷芭提雅 2018

【曼谷購物】Terminal 21 超市大出血

在曼谷住的是一間酒店式公寓,位置在BTS Asok 站附近,步行只需3分鐘左右便可到站!

Asok 站的另一邊是 Terminal 21,我們就住在對面!去這個商場超方便啦!

今日的行程本來是上午在商場逛完之後,回公寓休息一下,再出發去逛夜市。

吃午餐時,哥哥說沒有胃口,不想吃,趴在檯上睡著了。回公寓後繼續睡覺,然後就發現他發燒了!

所以,之後的行程就全部取消,好讓他多休息,我們也在「家」照顧他和陪伴他。

幸好這個商場那麼近,我們決定去超市買晚餐回 apartment 吃。一買就是38xxx baht!看到價錢時真嚇了一跳!竟然買了這麼多!

由公寓行去 Terminal 21,要先上 Asok 車站那一層再入商場,所以入去之後要搭兩層電梯下去 Gourmet Supermarket 那一層(LG/F)。

上午來的時候沒逛過,原來 Rome 這區域在 G/F。不過我們的目的地只是超市,就沒有多逛了!連看見 Boots 都沒有入去呢!雖然好想去買……但在超市買完之後已經不能再買了!無手拿東西啦……

Continue reading “【曼谷購物】Terminal 21 超市大出血”

Posted in 【旅】曼谷芭提雅 2018

【曼谷芭提雅】早餐:The Sky Gallery

在芭提雅的最後一天,我們搭乘 Grab Taxi 到達 The Sky Gallery 吃早餐。

這裡除了可以看到超美的景色外,食物還很多選擇,而且味道都可以!個人認為很值得來,為我們在芭提雅這裡留下一個很美的回憶。

我們還在這裡認識了一位很漂亮的日本媽媽呢!帶著一個只的4個月大的女兒,超可愛! Continue reading “【曼谷芭提雅】早餐:The Sky Gallery”

Posted in 【LIFE】飲飲食食, 【Rex】成長記錄, 【哥哥的小學生涯大小事】

【13M7D】午餐 & 晚餐

有南瓜、翠玉瓜、粟米雞肉丸、芝士、紫菜,仲有準備中所以冇入鏡嘅白飯波波!

晚餐仲豐富!有翠玉瓜、菠菜豬肉丸、蕃茄、三文魚,仲有烚緊嘅雞蛋同三色米飯波!都係未準備好所以影唔到😅

通常俾嘢佢食都唔可以一次過,因為佢見多嘢食就成日拎嚟掉!所以寧願整好咗嘅就放上盤度俾佢食先,而且天氣凍,都唔想啲嘢凍哂。雖然……佢食成粒鐘有多,乜都凍哂!但係都盡量啦!攪到好似食法國菜咁逐樣出😂

佢食嘢係慢慢嘆,你以為佢掉咗啲嘢食就係唔食咩?以為佢飽?完全唔係!掉完果樣嘢,轉頭都會拎返果樣嘢嚟食!(當然唔係執返上嚟俾佢食啦) 真吹脹!好多BB都會係咁……

太耐冇寫 BLOG,通吓呢個細佬仔嘅發展先!

而家13個月啦!成日跟人講嘢,最好笑係講:「哎…吔!」或者係:「哎吔吔!」又或者係:「吔吔吔……」不停咁「吔」!

好早之前掉咗落地就話:「喔~OH!」

出自咁細個BB把口超好笑。

早幾日見到佢突然倒後行!!有冇咁攪笑呀?12個幾月就識倒後行??真係好可愛!佢仲要係倒後行完幾步之後,再行返前,再倒後行!

仲有爬樓梯,無啦啦爬上上格床啲樓梯,仲要一爬就爬到上三層,好危險呀!以後絕對要睇到實一實……

已經識得「俾/GIVE」同埋「俾細佬/TAKE」,(好似之前講過) 仲有OPEN, CLOSE….我覺得仲有好多佢係學識咗,不過未能表達。

最好笑嘅動作係,坐喺度,用腳撐起個PAT PAT,但兩隻腳板係冇離地,即係坐喺度「櫈」!好似隻青蛙仔咁!

仲有最勁嘅就係佢可以坐喺度自轉!360度咁轉一個圈都得!

講緊嘅都係未夠13個月時發生,爬樓梯好似係剛剛一歲左右。

而呢幾日仲識得自己玩搖搖馬!由一開始要人幫佢坐上去,到之後識自己爬上去坐,之後想搖但兩隻手又唔識得扶實,到而家識得扶邊度啦!仲識得搖添啦!絕對唔可以睇少BB自學嘅能力!

實在太神奇,咁細個嘅BB都已經好有自己嘅意識!想咁定想咁呢,非常有主見!

係啦~打一歲針時姑娘建議可以俾佢玩多啲積木,同埋俾啲筆佢試吓畫吓,訓練吓啲小肌肉。所以前排淘咗啲「泡沫積木」返嚟,今日第一次開嚟玩。點知,呢個傻豬豬忍唔住嘴,先後咬咗三啖!!咬爛咗3舊積木……仲要含咗喺口入面,好危險呀!!睇嚟呢啲積木未啱佢玩……又要再買過啦!反而哥哥就超鍾意玩,但又可能係貪新鮮啦!頭先砌咗呢啲:

好靚!我都忍唔住,即刻影相!

一開始玩果陣佢未識咁砌,但經過砌咗幾次之後,就砌咗呢啲車出嚟啦!仲要係有意思又有名堂㗎!

講開哥哥,因為流感情況嚴重,所以提早放新年假!而早前同佢做嘅評估已出咗報告,125…爭少少就130,所以呢個衰豬真係超難攪…

Posted in 【Baby Food】, 【LIFE】2018

【12M28D】午餐。西餐

今日嘅午餐好簡單,不過就好有營養又健康!

有:

意大利三色螺絲粉 (落幾滴Olive oil煮10分鐘左右)

烘芝士牛油自製麵包 (最細火烘熱)

煎三文魚 (檸檬汁醃完落少少牛油煎)

烚蛋一隻

話咁快,細佬就嚟13個月大啦!愈來愈作怪!

呢排成日都咁笑:

兩兄弟亦都十分相親相愛!

而我部電話影得最多嘅相,就係細佬食嘢時嘅相!!

Posted in 【FTM】學整嘢食

哥哥指定零食:提子餅乾 (附食譜)

夜晚臨瞓前同哥哥傾吓計,講講吓問佢想帶咩零食返學校食,佢話想要提子餅。

喺我腦海中嘅提子餅,係某個牌子出嘅,中間夾住啲提子,係幾好食。

不過佢有食過咩?我自己都好耐冇食啦!一於立即上網搵食譜整先!(當時已經晚上10點幾)

俾我搵到呢個!原食譜大家可click入去睇,我自己就跟足9成,係糖果度用少咗一半,因為佢成日話啲嘢食太甜!真乖仔,食少啲糖仲乖!

材料 : 大約 18 x 18 cm 之餅乾
低筋麵粉          100 g
baking powder   1/4 茶匙
肉桂粉               少許 (我落得都多)
Brown sugar         10 g
鹽                        少許
橄欖油                2 大湯匙
蛋 (中尺寸)        1 個 (打散)
提子乾               80 g
水      50 ml

做法睇原食譜啦!我跟住做嘅,焗完先切開,仲要切得好唔整齊。

Posted in 【買】BB用品, 【Rex】成長記錄

訂奶粉有玩具送

本來飲開S26H.A.低敏果隻,前幾日飲哂又買唔返,所以順勢轉吓奶粉!咁啱美素佳兒打嚟話訂兩罐有份V-Tech玩具送,咁有緣😌就訂啦!兩日後即係今日就送貨嚟啦!連埋個玩具,正呀!即有新玩具玩。

細佬好有興趣,早餐都未食,都俾佢玩一陣先啦😊

Posted in 【童言】, 【FTM】學整嘢食

唯有幫你消滅哂佢哋!

講緊嘅係呢啲:

其實我自己好鍾意飲,尤其係朝早起身口淡淡,飲一杯熱乎乎,濃濃嘅朱古力!好正!

尋晚整咗啲牛奶包,其中兩個夾白朱古力饀,兩個夾芝士,當然都係整俾哥哥,仲有三個迷你麵包夾BB芝士俾細佬。另外有兩個冇饀嘅,下午哥哥放學返嚟我就整咗個牛肉漢堡夾埋芝士俾佢食,超開心!

尋日仲焗咗個 Apple Crumble,哥哥今日帶咗返學校小息食,仲話今日得一件開心事,就係食咗呢個咁好味嘅蘋果批!我相信係真心話,因為佢放學返嚟同臨瞓前都講咗次!♡♡♡ 又曾經好幾次話多謝我,成日整咁好味嘅嘢俾佢食。知就好啦!😘

頭先就整咗兩個迷你腸仔包、兩個吞拿魚包、一個提子包(切開6件再痴埋成一個圈,哥哥仲問我係咪冬甩🤣),仲有兩個冇饀嘅麵包。

唔知點解今次焗完有個包面縮咗!麵包真係唔易整,我仲有好多咗要學!!

Posted in 【Baby Food】

【12m6d】午餐:燕麥紫薯麵

而家大個仔,食嘢方面容易咗好多,尤其開始食得比較好。雖然都仲會掉嘢食,但少好多,通常係食咗一兩啖後覺得唔好味就掉!

呢個紫薯麵係早幾日自製的,整完果日食過一次,其餘做好嘅就雪冰箱,點知早兩日拎出嚟煮時,癡埋一堆分唔開,結果就冇食到。

今次知道係咁,就拎出嚟解凍先,再手撕將佢哋分開。要搵一搵方法改改,睇吓係咪要晾乾哂先雪好啲。

Posted in 【FTM】學整嘢食

【肉桂蘋果包】好味!一口氣食咗三個(附食譜)

參考人地食譜, 再改D咁。(我係新手!食譜純為分享)

麵團材料:
高筋粉 210g
全麥粉 40g
Buckwheat Flour 5g
酵母 3g
Brown Sugar 30g
鹽 3g
暖水 170g
橄欖油 20g

麵團做法:全部放入麵包機,按DOUGH模式,需一個半小時完成。

麵包餡材料:
蘋果 1個
檸檬汁 幾滴
Brown Sugar – 1茶匙
玉桂粉 – 5g (大約, 隨自己喜歡)
提子乾 – 50g (先浸15分鐘, 再瀝乾/印乾水備用)

麵包機開始運作後就準備麵包餡材料:浸提子乾,將蘋果切細細粒,與檸檬汁同Brown Sugar,再加D水(約兩大匙)放入小鍋用細火煮十至十五分鐘直至蘋果夠軟,加入肉桂粉拌勻後熄火。

做法:主要參考呢個網頁去做。

困難之處係一來我冇細少少巴焗盤,所以當切開哂D包之後放上長方形焗盤就變得好鬆散,形都變埋!哈哈!而切麵包切到入面D餡好易跌出來。

可能用左全麥麵粉同 Buckwheat Flour,口感比較實,不過我自己好鐘意Buckwheat Flour!就係貪佢口感實D同時又幾好味。

Posted in 【Baby Food】

【12M3D】BLW。豐富的午餐

20180105_094951

晚安~我已經在甜睡中,媽媽說今天有心情(本來打算早點睡…)所以超級難得地坐在電腦前面寫BLOG!自從我出世之後,媽媽已經很少坐在電腦前面寫BLOG了,大部份都是用手提電話。

照片中的我正在吃早餐。
是昨天晚上媽媽趕工做給哥哥的提子包!我也有份兒吃呢~

下圖才是我的午餐。
媽媽本打算煎個蛋,蛋下了之後,用最小火煎。
一邊煎才一邊想:加些甚麼好呢?
完全沒有想清楚就去煮!(經常如此)

20180105_124502

最後,竟然出現了這條「蛋卷」!
因為煎蛋期間,打開雪櫃,見到前天剩下的菠菜,就拿來當餡!
結果就想到了煮日式甜蛋的方法,把蛋卷起來吧!
因為只用了一隻蛋,所以小小的…不過已經很足夠了,還有很多其他食物!(不只上圖,還有下圖的呢)

20180105_131228

還有左邊紫色的:手工麵條!
咦!不是麵條嗎?怎麼一粒粒的,不是一條條?
因為媽媽又要玩…印了星星的形狀!
伴著星星粉的是燕麥,本來想用之前的方法去整些波波形(【1歲】簡易有營早餐),但做不到,因為太濕了。所以就這樣,靠著那一點點黏稠,黏著星星粉,我也能夠吃到。

右邊的是肉桂煮蘋果,這裡的份量約為一個中型蘋果的三份一。
士多啤梨只給了大半粒,因為我已經飽飽了!連最愛的蘋果和士多啤梨都吃不完。

都說這餐太豐富…
其實沒問題的,因為媽媽會幫我吃光光啦!
這就是媽媽的午餐…我剩下的食物!^^

Posted in 【Baby Food】, 【FTM】學整嘢食

手痕整。手工麵條,芝士包,muffins

早幾日病咗,間唔中都周身攰又頭痛,仲要瞓住覺時骨痛!辛苦到暈!不嬲都唔鐘意食藥,所以冇睇醫生。今日病情又好咗好多喎!又手痕要整吓嘢食先安落。

繼今朝整個一口藍莓燕麥後,又整咗南瓜同菠菜麵條。(南瓜麵條跟呢度整, 兩款都冇落鹽)

其實十分容易整!只要個麵團唔好太濕又唔可以太乾 (講廢話),同埋用多啲麵粉防黏,就已經OK。

 

第一次整,我知賣相係唔掂!不過好味又食得就得啦!

 

晚飯前又開始整芝士麵包,用食飯嘅時間去等發酵,食完飯又開工!

 

整到咁上下又要等麵包第二次發酵,又忍唔住整多個藍莓 muffins 俾細佬食!真係全日冇停過咁滯!但我都有瞓咗陣午覺㗎!嘻~

Posted in 【Baby Food】

【1歲】簡易有營早餐

細佬尋日一歲啦!我哋只係簡單地喺屋企同佢切蛋糕、唱生日歌去慶祝生日,多謝Grandma都嚟到賀!

食嘢方面暫時都唔會有乜改變,我都會 keep 住整唔同嘅食物俾佢。今朝起身就整咗呢個:【一口藍莓燕麥】

係參考外國嘅食譜,再自己一邊整一邊試。

材料:2大匙 Rolled Oats (不到個匙羹成座山咁高嘅份量
幾粒藍莓
2大匙Baby cereal

本來只用燕麥,但煮完之後發覺仍然太水,所以加咗啲Baby cereal,即刻杰哂!等佢放涼少少後,就加入藍莓,再用匙羹整形,食得!好快好方便!啱哂我呢啲懶人😆😅 但係絕對係有營養而且味道都唔錯!

做出嚟嘅份量唔只張相入面咁少,有多一倍左右。

雖然係有啲啲濕,不過bb都拎到嚟食,初時個衰衰豬見到藍莓就淨係拎粒藍莓,但後來食吓食吓冇藍莓果啲都食哂,即係全部都食哂!好叻仔!

呢餐應該十分飽啦!跟住就緊係的佢入房玩一陣,然後就瞓覺啦!佢而家嘅 timetable 就係咁,晨咁早 7 點幾左右起身,食埋早餐就大概 9 點至 9 點半去瞓,呢一覺通常係個半鐘至兩個鐘,咁我就用呢啲時間去準備午餐。

Posted in 【Baby Food】, 【LIFE】2017

2017年除夕。快一歲BB的早餐【全麥班戟】

2017年最後一日啦!呢一年點解過得特別快咁嘅?舊年呢日我都仲未有動靜……係開始有啲非常不規律嘅陣痛,有時隔幾分鐘,有時隔幾個鐘,一痛起上嚟都覺得幾痛吓!所以都好易分辨到。

原來我都仲有少少記憶,哈哈!

呢一年嘅轉變都幾大,新生命嘅出現、哥哥嘅行為同所發生嘅種種……同埋自己都有好大嘅改變!自己唔同咗嘅地方就緊係關於「入廚」啦!以前我絕對係唔鍾意亦冇興趣煮,到哥哥要食粥仔,甚至要食飯之後先開始學煮吓,但都未算十分努力。

而家細佬行blw,食物方面真係要R爆頭咁去同佢準備,一來要睇佢鍾唔鍾意食,二來又要整得容易拎住食,更重要嘅係同樣要容易咬到同吞到。呢個過程一啲都唔簡單!我就係邊學邊試,終於叫做修成正果!(誇張咗啲😅)

嚟到就嚟一歲啦!已經有好大進步,唔再需要為佢拎唔拎到而擔憂。咁耐以嚟未試過真係 chok,但 gag 就到現時為止都間中有出現。佢成日好心急咁食嘢,大大個麵包/成舊大過拳頭嘅食物,係都要成舊夾硬「室」入口!

講咗咁耐,其實呢篇本身係想寫今朝試嘅新食譜!就係呢個啦~

又係 pancake!

簡單快捷!又容易拎!

但係呢個食譜其實麻麻,因為細佬嘅反應係:望幾望,玩一陣,咬咗兩啖之後就繼續研究呢舊嘢!跟住就係掉~ 然後,俾第二舊佢,放入口冇耐又吐返出嚟。

我試吓係咪真係咁難食,原來都幾實吓!味道唔係太差,但相比起用香蕉嚟整,當然差好遠。

呢度用咗3樣食物:1隻蛋,1/4 杯 full milk,3大匙全麥麵粉 (whole wheat flour)

同平時煎班戟一樣咁煎,但由於尋日新買咗支 coconut oil,所以就用咗嚟煎。

呢支油好香好正呀!用咗兩次幾乎愛上!

Posted in 【Rex】成長記錄

【11m29d】晚餐,兩款食物六種食材!

呢幾日雖然病咗,但係反而愈夜愈唔想瞓覺住!係都要攪到成點先瞓。尋晚就係要等整麵包,今晚就上網睇嘢都睇成個鐘。

平時起身後細佬未nap都會煮啲嘢俾佢做早餐,否則就係整午餐,晚餐多數由工人整。不過今晚就我煮啦!

得兩樣嘢,但係有齊主要嘅食物!有薯仔、西蘭花、三文魚、紅蘿蔔,仲有豆腐同豬肉添!睇唔出呢?本來想加芝士,但因為奶製品同鐵質一齊食係會影響到鐵質嘅吸收,所以就冇加。

之前講過,佢而家唔多肯食肉丸,所以要將啲肉混入其他嘢食度。今次佢食得幾好,幾驚佢唔夠!其實都唔係太夠,因為佢食到咁上下停吓又食吓咁,我又出一招:拎佢最愛嘅生果(士多啤梨)俾佢食,等佢開胃返啲,或者叫做想繼續食嘢。結果佢食哂之餘仲可以食多個自家製嘅麵包仔,就係尋晚整到兩點果啲腸仔包但冇包到腸仔嘅,特登留啲俾細佬食。

而家食嘢基本上已經十分乾淨,好少掉到周圍都係,食到跌哂嘅亦都少咗好多啦!即係食完之後喺 high chair 上搵到嘅食物係極少量。對於呢個進步真係好滿足,希望繼續愈食愈好啦!

今日發現佢識做一個動作!叫佢 “touch your head” 竟然識得摸自己「耳仔」!可能摸唔到頭?定誤會咗?定係點呢?Anyway,佢而家已經識嘅動作除咗 give me five / hi five, hooray (hands up) 同 hello / bye bye 之外,近日亦學識咗 give (俾xx) 同 take (俾細佬)!當然仲有學行果陣嘅 walk to mama / papa。

Posted in 【Baby Food】

試呢個食譜:Apple and Cheese Quinoa Bites – delicious recipes for little hands

http://littlegrazers.com/apple-and-cheese-quinoa-bites/#.VQHvMbDF9FM

用食譜約一半嘅材料去整。

半個大型蘋果,100g藜麥,約25g芝士(因為得返咁多)。

都幾難搓成波波,我就一隻手用細匙羹,一隻手推落個Tray度。不過由於都幾多汁(來自蘋果),所以我用個sift去隔吓啲汁先整形放落去。

焗完就係咁

雖然有搽啲油喺錫紙上,但係都十分癡底!後來發現用手「Mit」比較容易😅

都幾好味,細佬食咗一半左右。

Posted in 【FTM】學整嘢食, 【LIFE】飲飲食食

私房聖誕大餐!2017【Happy Christmas!!】

christmas_logo_004b

聖誕節,自己係屋企煮「大餐」!
從未試過一次過整咁多野食,仲要係咁西化既食物,好大挑戰呀!
重點只係得兩樣食物,因為都係第一次整,就係PIZZA同蘋果批啦!
本身我都好鐘意食蘋果批,所以自己都十分期待整出黎既效果!

網上好多好多唔同既食譜,最後我係跟呢個食譜整:[食譜] 金寶蘋果批

20171225_171609
蘋果批 (APPLE CRUMBLE) — 鋪左餅底同蘋果餡, 但餅底太薄了! 可能分半時分少左。

Continue reading “私房聖誕大餐!2017【Happy Christmas!!】”

Posted in 【Baby Food】

【11個月】BLW 午餐。薯蓉、班戟、漢堡

整一個餐要用嘅時間係 1 hour +

因為我會盡量用多種食材去整,所以看似簡單嘅一樣食物,需要嘅時間其實唔少!

今日午餐:
1) 芝士西蘭花紅扁豆焗薯蓉 (西蘭花同薯仔蒸熟,加埋芝士同紅扁豆,用攪拌機打蓉,150度焗咗15分鐘)
2) 南瓜肉桂蘋果燕麥Pancake (約1.5tbsp南瓜, 小半個細蘋果, 2tbsp燕麥, 1.5隻蛋, 3tbsp低粉)
3) 洋蔥蘋果牛肉漢堡 (200度焗20分鐘)

個薯蓉本來係想焗到硬身啲!可以切開俾佢拎住食,但可能用嘅度數太低,而且時間唔夠耐,結果焗完出嚟就只係比蓉硬身少少!

咁點算呢?唯有當俾個機會佢學吓用匙羹食嘢啦!😁

咁其實都唔係第一次用匙羹,之前整薯蓉+蔬菜/水果,諗住用嚟拌意粉食,都試過俾啲蓉佢。我會「畢」起一羹蓉,再放喺佢個盤上面,佢已經學識咗自己拎嚟擺入口食,仲識得食完冇咗啲嘢食就俾返個匙羹我!

除咗薯蓉,仲俾過 Yogurt。

Posted in 【FTM】學整嘢食

紫薯饅頭

尋日終於去咗烘焙店度買嘢啦!

尋晚已經急不及待咁整咗好簡單嘅「杯子蛋糕」,不過我係用一格格果啲焗模嚟整,而且整得唔好 (第一次係咁上下?!),連兩個小朋友都多鍾意食……但都有食嘅!

今日再接再厲!用紫薯粉整咗呢個紫薯饅頭。

唔知點解會咁多皺紋……巢哂皮!可能發酵時間太長?定係時間唔夠呢?

味道方面就好似同之前整嘅牛奶饅頭一樣咁,冇乜分別!

Posted in 【Baby Food】

【11M3D】BLW 午餐:煎豬肉薯餅、紅蘿蔔飯波

食到而家11個月啦!都仲係食得唔好,體重冇上升過!仲係得 19.8 lbs。

但係有時又會食得好好,整10個飯波波10個都食哂。完全估佢唔到幾時食得多,幾時食得少,所以無論如何都要落啲心機去盡量整啲吸引佢嘅嘢食啦!

今日就第一次整呢種「煎豬肉薯餅」,用咗半個薯仔,少少紅蘿蔔,約8蚊豬肉,洋蔥小半個,麵粉同一隻蛋。

薯仔蒸熟壓蓉,紅蘿蔔切細粒蒸熟 (但我冇切細,因本身諗住整蓉放冰格),洋蔥切碎先炒,再加用攪拌機攪碎嘅豬肉炒熟,然後加返啲薯蓉紅蘿蔔碎撈埋,再加蛋同麵粉。最後將全部已拌勻嘅材料(蓉)用匙羹取適量,放在煎pan上面細火煎,1~2分鐘後反轉再煎另一邊,完成!(唔知點解煎一陣就好深色,所以好快煎好)

Posted in 【Baby Food】

【10個月21日】BLW 午餐:豬肉丸、甘筍、粟米、香蕉、焗芝士薯波

雖然心情唔好,但對於個仔食嘅嘢絕不能懶。仲學人擺到啲食物咁樣!細佬一望到都覺得驚喜,個樣唔同咗!哈哈!

一開始第一樣就食香蕉,然後先係粟米,大跌眼鏡!

到佢食食吓粟米,因為個盤已經有位,所以我開始將下面呢啲焗薯波放低。佢見到就掉粟米,拎薯波就食!話變就變😂


呢個芝士薯波係突然諗嘅,本來想整薯餅,但整整吓因為太黏,所以試吓搓成圓形,估唔到又冇想像中咁黏!

不過由於我係將啲芝士mix落薯蓉度,所以焗嘅時候,啲芝士係咁漏!先諗起,係喎!通常啲芝士都係鋪喺食物面頭去焗。

錯有錯著,都幾好味丫!外面少少脆,入面同薯蓉冇分別,BB 拎住食完全冇問題!下次都會再整。

最重要係細佬好鍾意,全部食哂!(都有掉咗一兩粒)

焗芝士薯波

材料:薯仔半個,BB 芝士一塊

做法:蒸熟薯仔再壓蓉,加入芝士攪勻後,搓成波波,焗6~7分鐘,再反轉焗6~7分鐘。

Posted in 【Baby Food】

【10個月】BLW 午餐:乳酪麵包、煎粟米雞肉餅、煎菜心豬肉餅、士多啤梨

完全忘記咗屋企上午暫停食水,喺冇水嘅情況下點煮嘢俾Rex食呢?唯有用煎嘅方法啦!

士多啤梨食哂,啲麵包都食咗大部份,其他嘅就掉哂咁滯!但佢掉完啲麵包又會繼續拎盤上嘅麵包嚟食,俾佢激死啦!

下午參加咗個讀書活動,專誠煎啲香蕉pancake帶去食,仲有尋晚整嘅蕃薯麵包。

呢個蕃薯麵包真係十分推介!可以睇返之前嘅post。

Posted in 【Baby Food】, 【Rex】成長記錄

【10個月BB】BLW 晚餐:南瓜飯波、蒸南瓜、粟米雞肉

喺未瞓醒嘅狀態下 (其實係啱啱瞓醒,又見到幾個「陌生人」),竟然將全部食物食哂!

呢度見到有6個飯波,但佢食完之後再食埋整好咗果4個,即係總共食咗10個南瓜飯波!好叻仔呀!連就咁蒸熟嘅南瓜都食哂,但3個粟米雞肉就掉咗1個,食剩細半個,即係都食咗1個半。

呢個成績非常好,亦係有史以來食得最多飯嘅一次。

另外,Rex 而家可以唔扶住,自己向前行到最多4步!每日都有少少進步,由行得好唔穩陣,到頭兩三步都開始愈行愈穩陣!唔知幾時先真正識行呢!好期待😊

Posted in 【Baby Food】, 【FTM】學整嘢食

甘筍饅頭

懶人做法,就係冇搾汁,直接用攪拌機攪完就落麵粉去搓,結果又攪到個麵糰好硬,幾驚又失敗……


好在最後都成功整到。

有淡淡的甘筍味,第一次整算唔錯掛!不過下次會用甘筍蓉,會靚啲,冇一粒粒先!

Posted in 【LIFE】2017

夜訪廟街

星期五放學不嬲都唔會趕住做功課,更何況5點要去佐敦!仲要今晚爸爸唔喺屋企食飯,一於同Max去拍吓拖!


本來想去玩具反斗城睇玩具,但係呢度超多「手指陀螺」,睇到佢都攰啦!自己話要返屋企。

Posted in 【Baby Food】

【晚餐】三文魚煎餅

而家一星期會食一至兩次魚,主要都係三文魚。

之前多數整落薯仔度再焗,不過可能我唔太識用個光波爐,又可能係份量拿捏得唔好,所以想改一改,就參照網上食譜,整咗呢個「三文魚煎餅」。

除咗三文魚,我仲加咗洋蔥同翠玉瓜,本來想用西蘭花,但個翠玉瓜食開,就煮埋佢先啦!不過我只係切咗1cm嘅厚度。

Continue reading “【晚餐】三文魚煎餅”

Posted in 【學習】興趣班

【游泳】第二堂。學識了!

星期六

約咗夜晚7~8點。不過我冇去,而且爸爸陪佢去方便啲!

上堂學到尾係可以嚟拎住浮板游5米左右,但係單手游。今堂真係學識了!用雙手游自由式,游到大約10米!媽媽開心到無法形容!兩堂就學識,好叻仔呀!仲開始學背泳添!

估唔到呢個仔咁俾心機學……太感動啦!

返到嚟沖完涼食完飯就即刻衝入房瞓覺,好攰好攰呢!下晝仲去公園玩咗成個鐘,應該會好好瞓吧…

Posted in 【FTM】學整嘢食

【一口蕃薯麵包】細細件!好好味!

早兩日上網睇到呢個食譜:【一口地瓜麵包】已經好想試下!睇落好似幾簡單,今日就係晚飯前開始整!利用食飯果段時間等發酵,食完飯就即刻可以繼續!

我自己用既材料有:

蕃薯 100g
中筋麵粉 (已過篩) 140g
糖 12g
鹽 2g
酵母 2.5g
蛋1隻
牛油20g

原食譜有「牛奶10-20g」,我冇落係因為加哂所有嘢之後,個麵糰嘅濕度感覺上係剛剛好,再加啲水份落去我怕會太濕 (憑著失敗過幾次嘅經驗!) 所以我就決定一滴奶都唔落!因為一旦過濕,係唔可以加麵粉囉…我上次試過整饅頭時就係因為咁,不停落少少麵粉咁加入去,結果麵糰係Ok,但蒸出嚟竟然係一撻撻,好明顯係麵粉問題。

做法大家可以參考頭先條 link,我跟足㗎!不過發酵時間就有啲唔同。

用曲奇餅模印出形狀,細細件啱哂baby食

用光波爐焗,已經將麵包分開兩次去焗,最後舊麵糰仲剩好多,於是就試吓用嚟包紅豆餡!一直都好想整紅豆包,終於俾我試到!都好成功,不過呢款麵包就有啲啲硬,即係唔夠軟熟!

img1510239059396

Posted in 【Baby Food】

【10個月】10M6D。BLW 晚餐

介紹吓先!左上嘅係蘋果,右邊係甜椒牛肉丸同菜心。下面5塊係煎薯餅,入面有洋蔥同西蘭花,加咗2湯匙中筋麵粉,薯仔就用咗小半個。

個薯餅做法好簡單,削皮、切粒再蒸熟,然後壓蓉,MIX 埋洋蔥 (最好炒過,我今次懶只係蒸咗)、已蒸熟嘅西蘭花同麵粉,做成「麵糊」,就可以整個圓形落PAN煎。今次用咗太多油!下次要落少啲!

細佬雖然唔算十分鍾意食,但係…最後都食咗4塊左右!相信都夠飽了!菜心反而完全唔LIKE,吐返出嚟,牛肉丸都係麻麻鍾意。

Posted in 【Baby Food】

【10M7D】BLW 午餐

今朝5點半起身飲奶,尋晚食得太少啦!晚飯時間又邊食邊恰眼瞓,之後又唔肯飲奶。

到8點幾NAP一陣,9點半左右起身。我就10點幾先開始整午餐,趕到11點半俾佢食!

左上係蒸熟嘅西蘭花,右邊係粟米雞肉煎餅,下面5塊係香蕉PANCAKE。

整呢啲嘢都用咗差不多成個鐘頭!不過自己落手落腳整,睇住佢食都會投入啲!😆

見佢肯食已經非常高興,食得多更加係開心到彈起!