紅菜頭薯蓉三文魚菠菜飯
紅菜頭約5份1個，去皮切粒
薯仔半個，去皮切粒
與紅菜頭一起蒸約15分鐘
三文魚蒸約5分鐘至全熟
菠菜烚幾分鐘
所有材料放入攪拌機攪蓉
最後混入白飯，完成！
Category: 【FTM】學整嘢食
哥哥三年班啦 + 蕃薯波波 (煙un版)
呢幾個月已經冇乜太多心機去整野食, 應該話去完旅行返黎之後就已經懶左!
再加上早前迷上手作…再愛上車縫, 結果就只有好間唔中整下麵包, 冇喇!!
熱度總會減退, 尤其我呢D出左名三分鐘熱度既人…雖然未至於冇哂興趣, 但就因為某D原因, 所以就暫時減慢速度! (唔係停止, 熱誠依然有!)
而且9月開學嘛! 哥哥又鬼咁大食! 要為佢準備多D零食同早餐! 雖然我未叻到可以準備到「每日」, 至少仍然可以減少食D唔多有益既食物。
今日開學第一日, 我堅持要自己送佢去搭校車。冇錯…之前連落樓我都懶…但我其實唔係咁過得到自己…所以今日仲要帶埋細佬一齊送佢返學添! 順便同細佬去公園行下, 玩左陣。
係喎, 而家先醒起唔記得等哥哥放學返黎再同佢地去公園玩添…因此晨咁早冇人玩, 哥哥今日又放早。
下午同佢兩個去左超市, 買左兩條大眼雞, 好耐冇煲過魚湯啦!! 竟然, 哥哥俾分有「十份之九」(佢用既形容詞….) 仲肯食哂一個大碗添!! 我要努力D煲多D先得! 反而細佬就唔鐘意飲! 可能有薑味? 但係細佬肯食D魚肉同埋豆腐, 哥哥就唔多食。兩個真係好唔同呀!!
岩岩又試左個新食譜! 係蕃薯波波! 唔係之前果隻!! 係用木薯粉同低筋麵粉整。
我係跟呢度整既: https://cook1cook.com/recipe/27014
材料:
蕃薯 370g
牛油(我用GHEE) 20g
糖 20g
鹽 1g
木薯粉 80g
低筋麵粉 20g
做法請參考上面條LINK
蕃薯其實隨手拎左3個超市買既日本蕃薯, 所以重量猜跟足。
另外將D波波搓成 10~12g 一個, 方便細佬食。焗既時間大約係15分鐘。
自己試食後覺得好好好好味呀~!! 相信佢地都會鐘意食掛?!! (哥哥超級挑食….)
自創食譜：芋頭味日式小饅頭
芋頭蒸多了，把一半用來做麵包，另一半試做小饅頭！
幸好結果是成功的！我把食譜中一半的片粟粉改為芋頭蓉，加水量大大增加！
原來做這種小饅頭濕一點比乾一點好得多，又學到野！
第一次用矽膠模。超正。超易脫模❤
又係muffin，今次唔同嘅地方係……睇吓個底先啦！
好正呢！早幾日喺烘焙店買，超容易脫模！一早已經想買啦！本想用嚟整蛋糕仔，不過其實整乜都得啦！大愛❤❤❤
哥哥指定零食：提子餅乾 (附食譜)
夜晚臨瞓前同哥哥傾吓計，講講吓問佢想帶咩零食返學校食，佢話想要提子餅。
喺我腦海中嘅提子餅，係某個牌子出嘅，中間夾住啲提子，係幾好食。
不過佢有食過咩？我自己都好耐冇食啦！一於立即上網搵食譜整先！(當時已經晚上10點幾)
俾我搵到呢個！原食譜大家可click入去睇，我自己就跟足9成，係糖果度用少咗一半，因為佢成日話啲嘢食太甜！真乖仔，食少啲糖仲乖！
材料 : 大約 18 x 18 cm 之餅乾
低筋麵粉 100 g
baking powder 1/4 茶匙
肉桂粉 少許 (我落得都多)
Brown sugar 10 g
鹽 少許
橄欖油 2 大湯匙
蛋 (中尺寸) 1 個 (打散)
提子乾 80 g
水 50 ml
做法睇原食譜啦！我跟住做嘅，焗完先切開，仲要切得好唔整齊。
唯有幫你消滅哂佢哋！
講緊嘅係呢啲：
其實我自己好鍾意飲，尤其係朝早起身口淡淡，飲一杯熱乎乎，濃濃嘅朱古力！好正！
尋晚整咗啲牛奶包，其中兩個夾白朱古力饀，兩個夾芝士，當然都係整俾哥哥，仲有三個迷你麵包夾BB芝士俾細佬。另外有兩個冇饀嘅，下午哥哥放學返嚟我就整咗個牛肉漢堡夾埋芝士俾佢食，超開心！
尋日仲焗咗個 Apple Crumble，哥哥今日帶咗返學校小息食，仲話今日得一件開心事，就係食咗呢個咁好味嘅蘋果批！我相信係真心話，因為佢放學返嚟同臨瞓前都講咗次！♡♡♡ 又曾經好幾次話多謝我，成日整咁好味嘅嘢俾佢食。知就好啦！😘
頭先就整咗兩個迷你腸仔包、兩個吞拿魚包、一個提子包(切開6件再痴埋成一個圈，哥哥仲問我係咪冬甩🤣)，仲有兩個冇饀嘅麵包。
唔知點解今次焗完有個包面縮咗！麵包真係唔易整，我仲有好多咗要學！！
【肉桂蘋果包】好味！一口氣食咗三個(附食譜)
參考人地食譜, 再改D咁。（我係新手！食譜純為分享）
麵團材料：
高筋粉 210g
全麥粉 40g
Buckwheat Flour 5g
酵母 3g
Brown Sugar 30g
鹽 3g
暖水 170g
橄欖油 20g
麵團做法：全部放入麵包機，按DOUGH模式，需一個半小時完成。
麵包餡材料：
蘋果 1個
檸檬汁 幾滴
Brown Sugar – 1茶匙
玉桂粉 – 5g (大約, 隨自己喜歡)
提子乾 – 50g (先浸15分鐘, 再瀝乾/印乾水備用)
麵包機開始運作後就準備麵包餡材料：浸提子乾，將蘋果切細細粒，與檸檬汁同Brown Sugar，再加D水（約兩大匙）放入小鍋用細火煮十至十五分鐘直至蘋果夠軟，加入肉桂粉拌勻後熄火。
做法：主要參考呢個網頁去做。
困難之處係一來我冇細少少巴焗盤，所以當切開哂Ｄ包之後放上長方形焗盤就變得好鬆散，形都變埋！哈哈！而切麵包切到入面D餡好易跌出來。
可能用左全麥麵粉同 Buckwheat Flour，口感比較實，不過我自己好鐘意Buckwheat Flour！就係貪佢口感實D同時又幾好味。
手痕整。手工麵條，芝士包，muffins
早幾日病咗，間唔中都周身攰又頭痛，仲要瞓住覺時骨痛！辛苦到暈！不嬲都唔鐘意食藥，所以冇睇醫生。今日病情又好咗好多喎！又手痕要整吓嘢食先安落。
繼今朝整個一口藍莓燕麥後，又整咗南瓜同菠菜麵條。(南瓜麵條跟呢度整, 兩款都冇落鹽)
其實十分容易整！只要個麵團唔好太濕又唔可以太乾 (講廢話)，同埋用多啲麵粉防黏，就已經OK。
晚飯前又開始整芝士麵包，用食飯嘅時間去等發酵，食完飯又開工！
整到咁上下又要等麵包第二次發酵，又忍唔住整多個藍莓 muffins 俾細佬食！真係全日冇停過咁滯！但我都有瞓咗陣午覺㗎！嘻～
今日整咗呢個：【健康小食】 酥脆焗薯條
焗完出嚟一陣就俾哥哥食哂！好在我都食咗一條咁大把！相都未影……
私房聖誕大餐！2017【Happy Christmas!!】
聖誕節，自己係屋企煮「大餐」！
從未試過一次過整咁多野食，仲要係咁西化既食物，好大挑戰呀！
重點只係得兩樣食物，因為都係第一次整，就係PIZZA同蘋果批啦！
本身我都好鐘意食蘋果批，所以自己都十分期待整出黎既效果！
網上好多好多唔同既食譜，最後我係跟呢個食譜整：[食譜] 金寶蘋果批
紫薯饅頭
尋日終於去咗烘焙店度買嘢啦！
尋晚已經急不及待咁整咗好簡單嘅「杯子蛋糕」，不過我係用一格格果啲焗模嚟整，而且整得唔好 (第一次係咁上下？!)，連兩個小朋友都多鍾意食……但都有食嘅！
今日再接再厲！用紫薯粉整咗呢個紫薯饅頭。
唔知點解會咁多皺紋……巢哂皮！可能發酵時間太長？定係時間唔夠呢？
味道方面就好似同之前整嘅牛奶饅頭一樣咁，冇乜分別！
甘筍饅頭
懶人做法，就係冇搾汁，直接用攪拌機攪完就落麵粉去搓，結果又攪到個麵糰好硬，幾驚又失敗……
好在最後都成功整到。
有淡淡的甘筍味，第一次整算唔錯掛！不過下次會用甘筍蓉，會靚啲，冇一粒粒先！
【紫心蕃薯麵包】
尋晚整完，今晚再嚟！太好味，唔夠喉！
不過原來黃色蕃薯好味啲，可能因為呢隻冇咁甜啦！
【一口蕃薯麵包】細細件！好好味！
早兩日上網睇到呢個食譜：【一口地瓜麵包】已經好想試下！睇落好似幾簡單，今日就係晚飯前開始整！利用食飯果段時間等發酵，食完飯就即刻可以繼續！
我自己用既材料有：
蕃薯 100g
中筋麵粉 (已過篩) 140g
糖 12g
鹽 2g
酵母 2.5g
蛋1隻
牛油20g
原食譜有「牛奶10-20g」，我冇落係因為加哂所有嘢之後，個麵糰嘅濕度感覺上係剛剛好，再加啲水份落去我怕會太濕 (憑著失敗過幾次嘅經驗！) 所以我就決定一滴奶都唔落！因為一旦過濕，係唔可以加麵粉囉…我上次試過整饅頭時就係因為咁，不停落少少麵粉咁加入去，結果麵糰係Ok，但蒸出嚟竟然係一撻撻，好明顯係麵粉問題。
做法大家可以參考頭先條 link，我跟足㗎！不過發酵時間就有啲唔同。
用光波爐焗，已經將麵包分開兩次去焗，最後舊麵糰仲剩好多，於是就試吓用嚟包紅豆餡！一直都好想整紅豆包，終於俾我試到！都好成功，不過呢款麵包就有啲啲硬，即係唔夠軟熟！
【10個月】BLW ~ 茶點
下午一點，準時眼瞓。
呢轉十分好瞓，三點多啲先起身。
因為11點食 LUNCH，所以已經好肚餓啦！好在媽媽已經準備好豐富嘅茶點！
登~登~就係 STRAWBERRY PANCAKE 啦！
又係PANCAKE？
係呀！因為太容易整啦！又食得乾淨！
至於個牛肉漢堡，本來係整俾哥哥嘅，但係佢緊係覺得冇味，所以唔食！入面有紫洋蔥同埋車厘茄㗎！好有營養。細佬都食咗差唔多兩塊，有大半塊俾佢掉咗落地😑
士多啤梨班戟，我用咗4大粒士多啤梨，切粒攪蓉，加咗4茶匙中筋麵粉同2茶匙低筋麵粉，仲有一隻蛋，攪勻。份量要自己睇，視乎個稀杰程度去落麵粉，因為士多啤梨多汁，所以先要用咁多麵粉，由於一開始我係用中筋，後來先醒起用低筋會軟熟啲，所以就中筋同低筋麵粉都有😅
攪勻就落pan煎，冇用油。
而個牛肉就有用油煎，仲落好多吓添！因為冇加麵包糠，所以比較實同硬，但係細佬都食到！
【湯】最忙的星期日：忌廉薯仔濃湯
又又又煮新嘢！
每逢星期日乜都自己做，但反而愈做愈起勁！摩打 run 開停唔到！！
因為之前買咗兩盒 whipping cream 都冇用過，所以就上網搵食譜用咗佢。
原來煮忌廉湯都會用到 whipping cream，所以就地取材，屋企有幾個薯仔，就用薯仔嚟煮啦！
我用咗兩個中型薯仔，半個洋蔥，兩盒250ml嘅雞湯，半盒 whipping cream (只需半盒！即係要再煮多次或煮其他嘢去用埋佢！)
做法都好簡單，先炒洋蔥，再落薯仔炒一陣，加雞湯，煮10分鐘左右，薯仔夠稔啦！就用攪拌機攪蓉，最後落啲鹽、黑胡椒粉同 whipping cream 攪勻就完成啦！
不過由於blend完啲薯仔仲好杰，所以加咗少少水。但係出嚟都係超級濃，或者下次只用一個薯仔，或者再加多啲水。
我覺得好好味喎！可惜冇人鍾意飲…一係就話濃咗啲。可能係因為我太鍾意食薯仔啦！😂
BLW (9M11D) 新買意粉&芝士♡新嘗試：雞肉丸/餅
做咗ftm咁多年，我諗我近排先開始算合格！
尋日去 Taste 買咗好多正嘢！分享吓呢幾包意粉。
3包都係0納，啱哂 baby 食，尤其 BLW 嘅BB。
不過左邊果包就細粒啲，要抓握能力好啲先試到。
我今日就先煮中間果包 ~ Delverde 嘅蝴蝶意粉，睇落個外形係最易俾bb拎嘅！
不過Rex似乎唔係好咬到！定係懶呢？成餐都食少好。
用嚟撈意粉嘅白汁就係一向都用開方法整：奶粉 + 麵粉 + 芝士。 Continue reading “BLW (9M11D) 新買意粉&芝士♡新嘗試：雞肉丸/餅”
【光波爐】媽媽整嘅曲奇餅
早幾日工人好有 heart 咁整咗啲曲奇餅，今日終於輪到我啦！尋晚上網搵咗個比較簡單嘅食譜，即刻試吓！
整俾個仔食，當然會有多少少心機啦！重點係曲奇餅可以用啲得意有趣嘅模去壓啲形狀出嚟。而呢兩個模具：心心同星星，已經買咗幾年啦！一直都冇乜點用，最多用嚟壓吓 sandwich，但因為個模太細，其實都極少用。而家開始整吓啲甜品小食，先終於大派用場。
Max 當然係非常開心啦！焗出啲曲奇餅又咁啱係佢最肚餓嘅時間 (就嚟食晚飯)，所以就話好好味！其實我哋都覺得一般啦！都唔喺度分享食譜了！下次整得好先寫。
【自煮晚餐】基本白汁意粉 (麵)
本身夜晚出去食，結果冇出到，但又冇買餸，就上網搵吓白汁係點整，屋企有牛油有奶又有cream，估計都係用呢啲材料。
咁就整咗呢個超簡易嘅白汁！加咗洋蔥同芝士腸，仲有幾舊本菇去炒。炒完就加返啲牛油、牛奶、麵粉混合嘅「麵糊」再兜兜，最後加埋已煮好嘅意粉落去，再加少少鹽、白胡椒粉同 Italian seasonings，完成。
不過由於睇唔到食譜份量係for幾多人，原來只係2人份，結果啲汁唔太夠，所以用嘅麵都減少啲。呢個都唔係大問題，下次要改進嘅係味道，應該加返多少少鹽！咁就好OK啦！
以前屋企邊會有麵粉呢樣嘢，無鹽牛油更加係唔知點用，而家我諗呢幾樣嘢一定要長期有存貨先得啦！
【光波爐】海綿蛋糕 (亂改版)
不得不讚，繼尋日工人姨姨 (我叫唔出”工人姐姐”，因為佢年紀比我大😂) 好有心咁整完曲奇餅之後，今日又再主動話要整呢個海綿蛋糕！
佢係參考本光波爐食譜嚟整嘅，但係又懶叻咁唔睇，話自己記得。點知轉個頭原來佢記咗整曲奇餅嘅材料，完全唔係整蛋糕果啲，只係用咗整蛋糕話要用嘅自發粉…代替咗整曲奇餅用嘅麵粉！
當時佢已經將牛油150克同自發粉150克溝埋咗啦！發現咗之後唯有即刻上網睇吓有咩係可以用呢兩樣嘢嚟整啦…最後就將人哋嘅食譜份量加返啲，而用嘅糖份量又減啲咁 (我唔鍾意太甜)，結果焗出嚟又幾好食喎！
材料：
牛油 150克
自發粉 224克
糖 90克
蛋 3隻
鹽 少量
雲尼拿油 2滴
做法：
用光波爐焗12分鐘+3分鐘+4分鐘，完成。
點解焗幾次，咪就係因為入面未焗到囉！所以自己慢慢加時間去焗咋！
原來咁都得嘅，好似又唔係太難。難得工人姨姨咁肯學，我都要努力呀！
***係喎，呢個應該已經唔係海綿蛋糕，都唔知係乜蛋糕啦…😅 最大嘅分別係用多咗一樣嘢：牛油！
【光波爐】曲奇餅
第一句要講嘅係，啲曲奇餅唔係我整㗎，我完全冇參與過，哈哈！
咁邊個整呢？當然唔會係屋企個男人啦！即係另一個女人…就係工人啦！
唔知係咪因為見我呢排咁努力整麵包，所以又想學吓整嘢食呢？其實佢已經好好，學識煮好多餸，估唔到連呢啲都想學埋，仲要咁主動！
唔分享食譜啦，因為係跟光波爐本食譜整，由於我冇買低筋麵粉，所以就用 all purpose flour。
味道都可以，跟足食譜嘛！但我覺得甜咗啲！(以前我好鍾意食甜嘢，而家口味變咗) 至於個質感就爭啲，用低粉應該會鬆化少少吧！第日囡返低粉再試先得！
本來以為 Max 會鍾意食，點知佢唔多食，原來同我一樣都係覺得啲餅硬咗啲！呢個仔對食超級挑剔！
整麵包失敗了
今次諗住整俾細佬，所以用咗隻靚啲嘅麵粉，加少量鹽，冇加糖。
點知焗完出嚟變咗咁樣！扁嘅？
估計係因為啲酵母…我唔識分亦睇唔到我用果隻係咩酵母，尋日用完剩返果啲我拎咗去雪。可能因為咁，啲酵母死哂啦！個麵包似係未焗到，亦似係發唔起，所以我諗冇錯感受係酵母問題！
我要繼續努力！學整多啲嘢食俾佢兩隻小魔怪！
用麵包機整麵包
舊年買電視送咗部麵包機，一直都放喺屋企發毛中……近來成日整嘢食俾細佬，又會煎吓Pancake等等，於是就拎埋部麵包機出嚟試吓用啦！
跟部機俾嘅食譜去整，話落酵母係要用手指喺麵粉中間開個窿嚟落，點知我忘記咗，一嘢就倒哂落去。好在冇乜事！之前都驚會失敗，整唔到麵包㗎！因我上網見有啲人話整幾次先有一兩次成功。
結果一打開部機，見到原原整整嘅麵包頂部，即刻開心哂！雖然要成3個鐘咁耐，但係簡單嘛！唔洗自己攪啲材料，慳返啲力水，哈哈！
食譜話落嘅食用油，我就用咗可高溫煮食果隻橄欖油，唔知會唔會因為咁而好味啲呢？
下次買咗隻靚啲嘅麵粉先整俾細佬食啦！今次其實都有俾咗少少佢食，差啲唔記得……
蕃薯PANCAKE
想學黎整俾Rex食，不過由於未整過，所以第一次就用全蛋整左先！
唔想俾細佬試蛋白住，雖然之前已經試過少少，但刻意整俾佢既野食我就唔想佢食太多。
呢次好成功！哥哥亦都好鐘意食！
買左蕃薯之後先後悔唔應該整蕃薯俾細佬，因為佢食親都會痾得比較密，甚至會整到PAT PAT紅，所以之後我冇再整蕃薯PANCAKE俾佢，改為用牛油果！因為屋企仲有。
講開牛油果，尋日（29/8）係第一次俾佢食。
食完之後其實我發現佢嘴仔附近有少少紅左，但我唔太肯定關唔關事，所以今日再試下。
我加左蛋黃同牛油果去煎，但係失敗了～～
原來牛油果係林到完全煎唔到…..加左蛋黃都唔得。
雖然「煎完」都係林到同即開牛油果一樣，但我都照俾細佬食，不過就唔可以俾佢自己拎了，我又餵佢了～～又係同我全部食哂！好為食，哈！
不過食完之後塊面又紅左，咁我都可以幾肯定佢有少少敏感，所以都會停一停唔再俾佢食住。
M.R. In UK 