今日搭地鐵時, 本來背住我, 突然轉身過黎, 攬住我講左句 “I LOVE YOU!”, 初時都估唔到佢講咩架, 隔左幾秒先諗到! 之後仲要講多句 “攬實”, 真係LUM到爆呀!
頭先阿仔竟然單腳企係自己張食飯椅上! 仲要雙手擺下擺下取平衡咁!
從今起, 我地都要習慣下叫阿仔個名啦! 唔可以再叫BB啦! 大個仔啦!
而且由於阿仔開始會講「俾BB」,「BB玩」等等, 所以更加唔好再叫佢做BB。雖然, 佢係我心目中仍然係好BABY~~~
呢排開始用花灑同阿仔沖涼, 每次都喊到豬仔咁, 今日竟然完全冇喊到! 好開心呀! 終於有進步啦!!
2012年10月6日 (SAT)
今日係一早記低左要去佳寶報名既日子! 本來話早D起身出門口, 點知遲哂!! 聽唔到鬧鐘啊!! 唔緊要, 好在去到都唔算超多人排隊, 我地既籌都係93! 學校唔大, 感覺仲好似好迫咁…不過中間好大果個FOR運動既…物體呢! 就幾吸引啦! 側邊仲見到有D小朋友用既地墊, 幾得意! 都好快就報好名可以走得! INTERVIEW將會係11月3日1430時! 幾鐘意呢D學校, 可以快D知道邊日IN! 唔…D老師都幾NICE! 不過其實大部份幼稚園既老師都表現得好NICE丫! 返屋企都非常之快! 只係十五分鐘左右咋! 呢間係我其中一間幾鐘意既學校, 主要係因為我好BUY佢某D CONCEPT! 而且佢係蒙特梭利教學。不過缺點係好細, 希望INTERVIEW當日可以望真D! ANYWAY, 佢都係冇OUTDOOR PLAYGROUND, 唉~~ 爭D啦!!
星期四本想帶阿仔返學, 點知自己星期三夜晚開始唔舒服, 仲發燒! 燒到40.4度! 食完飯就去訓左陣, 差唔多12點果時就成條死屍咁行出去量體溫, 因我知自己已經發緊燒! 發冷! 好辛苦! 跟拎左感冒藥同退燒藥食。之後係退左燒, 但係個頭都痛痛地!
到星期五, 起身果時都係唔多妥, 不過都帶左阿仔返學。跟住冇返屋企, 去做左好多野! 攪到接阿仔都遲左! 原本12點9食完飯走, 但去到已經1點3左右。
又成星期冇返學, 今次接阿仔時佢仍然係喊喊地咁, 係訓覺房已經望到我, 走到埋黎之後好快就冇再喊! 而且同之前有D唔同! 佢可以愉快地同老師拜拜, 心情亦都比之前任何一日都好! 相信佢係開始適應了! 希望下星期可以有更大既進步啦! 不過要等到星期三先返學, 因為中秋假期。
雖然未睇醫生, 但星期三果晚話左星期四入大埔, 而且禮賢會既交FORM最後日期係星期五, 所以今日無論如何都要入去! 先搭9個字車去坑口拎證件相, 然後再搭車去觀塘, 再搭半個幾鐘頭車入大埔! 搭巴士都搭到頭暈呀!! 到大埔仲要食一陣野又交埋FORM去浸信會, 先至去睇醫生食藥, 勁辛苦! 成個人冇力! 好在食完藥慢慢咁好返D, 個人有力左同精神返D! 再去禮賢會交FORM。
正校D職員俾我感覺係…麻麻地! 有個阿姐我唔知佢係咪老師, 唔係好似囉! 望左我個仔幾次, 但係毫無表情! 真奇怪! 你覺得我個仔有問題? 定係覺得佢得意先望佢丫? 咁望法但又冇表情, 難免令人感到不安! 同不滿!! 一直以黎我都係咁! 同阿仔出街, 有人係咁望佢, 但又冇同佢玩或笑之類, 都會令我覺得奇怪, 繼而覺得討厭!!
今日中秋節 (星期日), 我起身又好累了! 經過一輪梳洗之後個人都係唔多舒服, 本來打算帶阿仔入大埔玩, 但係都係由爸爸代勞啦! 我係屋企又再睇幼稚園既野, 跟住訓左陣, 起身後個頭仲更更更痛!! 唉~ 未好返哂尋晚就唔應該飲啤酒啦!! 低B!!
阿仔拎新玩具入黎同我講「玩呢個」。我話好呀! 佢邊爬上床邊說「上黎」。上到黎又話「坐低玩」。這一連串既說話方式, 唔係第一次, 都已經維持左一段時間。其實佢都算係學緊組句了! 是嗎??
另外, 阿仔整親自己, 痛既話佢會話「SORRY!」。不過佢一定係誤會了! 自己整親先SORRY, 佢整親人地又唔會SAY SORRY! 哈哈! 佢攪錯左呢!!
上星期五阿仔返左一日學, 星期六去大埔禮賢會OPEN DAY, 之後食埋飯先走。
好肯定既係因為返左果日學之後, 阿仔既情況令我非常擔心! 星期六果日好明顯佢連跟開既人都唔肯跟, 係都要叫媽媽, 係咁話「媽媽度」。就連我入個廁所都喊到豬仔咁, 冇人TUM到佢。夜晚訓覺又係咁喊, 明明訓著左, 都會突然間喊, 好似係發惡夢咁! 好可憐! 又係咁叫媽媽, 媽媽度。
因每次阿仔喊, 我都會話BB唔好喊, 媽媽係度。有時連爸爸抱佢都唔得, 我一抱佢哄佢就收聲。到尋晚, 星期日, 阿仔仍然係咁發惡夢, 我開始有D滾滾地! 嬲唔係嬲阿仔, 而係嬲間學校! 點解可以令到我個仔咁驚, 變成咁? 親戚都話阿B唔係咁, 痴身左好多, 而且個樣好可憐咁! 我就感覺到阿B既恐懼! 佢真係好怕我行開左就唔再見到我咁……超級缺乏安全感! 正常已經試過咁多次, 佢應該好明白, 媽媽走左, 轉頭(或者係返學既果幾個鐘), 媽媽係會返黎既! 但阿仔既情況係, 佢可能知道, 但仍然連果一陣間既分離都唔能夠接受! 導致到佢而家咁樣。
而尋日上寰宇家庭既活動時, 阿仔一入門口已有D抗拒咁唔想行入去。之前一直都冇試過係咁! 而上堂既時間就同對上果次差不多, 都係周圍走, 冇時停, 最多只會留心果一陣間。其他小朋友都冇咁”活躍!! 佢簡直就好似一隻甩繩馬騮仔咁!! 捉佢埋黎坐又會扭計! 總之, 佢都鐘意係果度玩, 我認為係因為有爸爸媽媽係度, 佢先至可以上堂都玩得開心。
2012年9月17日 (MON)
冇返學, 同姨婆飲茶, 之後湊俾婆婆。
睇下呢隻豬仔幾百厭丫~~
2012年9月3日 (星期一)
今日係阿B第一日返學。由爸爸媽媽一齊送佢返學。一早6點就起左身啦! 俾阿B嘈醒左!
7點40分左右出門口。
去到學校門口, 只係影左幾張相。跟住有個MISS就走埋黎問我想而家俾阿仔入去, 定係等一陣先。佢話因為校車乎返到, 課室就會得佢同另一個同學仔。咁我諗住少人D俾阿仔入去, 等佢容易適應D, 所以就話而家入啦。隨即, 好快, 就由普通話老師抱左阿仔走啦! 阿仔當然即喊啦! 但果一刻我真係全未有心理準備! 連同阿仔講幾句都未講…即係講D令佢安心點放心點既說話。例如, 媽媽一陣返黎接返你。
第一日返一個鐘。我地去左T.L.飲茶。飲完, 過左時, 差不多1小時45分先去接返佢。
班主任似有少少怨言, 話太耐了! 阿仔一直都有喊。
今日做左一個非常非常唔好既事…係餐廳鬧阿B。嚴重傷害佢既弱小心靈…而最痛既, 係阿B實在太可憐, 咩都唔識, 就要承受媽媽既臭脾氣。佢只不過係一個天真無邪, 單純貪玩既小朋友。我唔能夠令佢時時刻刻都開心, 活在快樂既世界中, 非常愧疚……..好唔想佢對我產生我曾經有過果種恐懼感……呢種恐懼其實時至今日我都仲有。所以更加唔想阿仔有!!! 好討厭咁樣既我…
2012年8月25日 (SAT)
又同阿B去街街啦!
今日去左尖沙咀THE ONE。
因為有RILAKKUMA!
媽媽自己都影左D相, 要帶阿B去影先得!
呢度有間LEGO專賣店, 仲有張檯俾小朋友玩LEGO, 都幾好呀! 有機會再帶阿B黎玩先得! 不過, 我更想既係買返副俾佢。
好啦! 黎到6/F caffè HABITŪ (openrice), 門外面有SOFA坐! 岩哂呢個坐唔定既小魔怪!
買左個藍莓芝士蛋糕同一個唔記得咩青豆湯。阿仔只肯食CHEESE CAKE (應該話佢鐘意食先岩!), 個湯可能佢覺得唔好飲。我自己都覺得個湯既味有D唔同…我地好少食呢種味道既野。諗住俾多D唔同口味阿B食, 但佢點都唔肯飲, 唯有放棄, 自己飲哂啦!
之後仲係另一間餐廳度, 呃左人地一個氣球添呢!
可能我太急於訓練阿B去廁所同自己食飯啦, 所以因為呢樣而鬧得佢都幾勁! 有時係因為太嬲, 一時忍唔住…有時又因為覺得佢開始大個仔, 明白我講乜, 覺得佢係應該要識, 要記住, 所以鬧佢! 但我知咁樣其實好錯! 佢可能會對呢D野產生恐懼, 更加唔想見到既係因為見我咁樣鬧佢而學左我…我既情緒同表現太激動啦! 而最攪笑既係, 呢兩日我鬧完佢, 由爸爸去接手處理教佢既野時(因爸爸係度會好D, 我唔駛係情緒唔好時仍然要繼續理阿B! 換個人去教佢會好好多!), 佢就同爸爸講「媽媽鬧」! 令當時好嬲既我都忍唔住笑……
{Life.Learning.Travelling} Our Diary 