Posted in 【Rex】成長記錄

37M28D【有禮貌】

通常我都會陪喆睡覺。雖然從小 (3個月左右) 就開始訓練他自己入睡,但因為有人不合作😩 ,所以也沒辦法了,我由間中陪伴,到現在幾乎9成。

今日午睡時,我陪了他一會便出房。他一直大哭叫我,但我有事情在做🤫,就沒有理他。

期間,哥哥入房陪他,但卻被他打還是踢了一下。

到我回房間陪伴他時,他第一句就問:「你頭先去咗邊度呀?」(一直都很喜歡問人「去咗邊 / 做乜嘢」之類)

然後第二句竟然是:「Sorry, mom.」(最近由「媽媽」改口叫我 “mom”)

可能是知道自己做了錯事,所以道歉?總之就是令我感到驚訝。

最近他的禮貌亦在很大進步。除了會跟哥哥叫人「食飯」外,平時任何人幫他取水杯,夾餸等等,都會說 “Thank you” 或者「唔該哂!」

Posted in 【Rex】成長記錄

【33m15d】Went on the potty 👏👏👏

今朝早好成功喺 potty 度痾咗 poo poo 呀!

不過佢嘅表現係好驚,超驚,驚到一路痾就一路企起身!

首先係第一次話 make poo poo,check 吓條戒片褲濕唔濕,因為佢尋日每次都係痾完之後先話 make pee pee,原來冇濕喎,諗住佢真係要痾啦,坐咗一陣就話「冇喇」,起身著褲,如是者重覆咗兩三次,有時仲坐咗喺 potty 度有成5分鐘左右,仲諗緊佢可能覺得好好玩?好得意?但又覺得冇理由㗎!個 potty 又唔係舒適。

以下內容可能令人感到不適 / 不安。你有權唔睇😁 但睇完就唔好話我……😂

終於有次坐落去之後一陣就搵隻手攪後面,見到佢隻手指污糟咗!原來發現佢痾咗少少,即係佢知道肚唔舒服要痾啦?!之後仲真係痾咗一大條添!但係好好笑嘅係佢一路痾,一路就勁驚!好似唔知有啲咩要喺自己後面果度走出嚟咁,而且痾好大條果陣,佢係緊張到係咁要企起身,我就係咁㩒返佢坐低,話俾佢知唔好起身……

原來,乜原來會驚成咁?我已經對哥哥以前係點冇乜印象了……我只知道有小朋友會因為唔習慣冇片片而選擇一定要喺尿片度痾。

細佬呢個表現就令我明白到「片片俾到小朋友安全感」,冇片,完全係「凌空」痾嘅感覺又確係一時間好難接受嘅。

Posted in 【Rex】成長記錄

【33M12D】戒片、獎勵計劃

而家有兩大個項目要訓練細佬!

第一:自己著鞋&除鞋

第二:戒片

自己著鞋&除鞋

每次出門口著鞋同返屋企除鞋, 佢都係要攪好耐~~好耐~~好耐, 先肯自己除。又氹又盛咁, 可以等成幾乎半個鐘先除鞋, 都唔明點解要等咁耐….佢已經知道:唔除鞋就唔可以入屋玩, 淨係可以坐喺門口隔離張櫈仔度。照計係小朋友都會想快D入去玩架㗎!但係佢又唔受呢套….坐喺度好耐都可以自娛, 唱歌, 趴係度…..

前日我開始就整左個 Reward Chart, 有幾樣嘢做到就有星星貼紙。佢本身好鐘意玩貼紙, 我當然期望獎貼紙可以吸引到佢啦!第一樣就係自己除鞋, 第二樣係擺好自己嘅咗, 包裝玩具。第三樣係坐 Potty, 第四樣就係成功係 Potty 度痾咗 pee / poo。

果日佢去完公園玩, 返到屋企之後, 同平時一樣淨係坐喺度唔除鞋。我就拎呢張獎勵計劃嘅紙俾佢睇, 同時拎埋張星星貼紙, 同佢講話除咗鞋就俾佢貼貼紙。佢即刻好快手咁除咗對鞋啦!但係就只此一次……

當晚爸爸帶佢去街, 又唔肯自己著鞋, 拎D貼紙出嚟吸引佢都唔得, 佢話唔要。去完街返到嚟又係咁。即係話, 貼紙只可以吸引到佢一次?!我又要用其他方法去令佢自動自覺除鞋…..(但仍然keep住著咗除咗都俾貼紙, 佢唔貼就我幫佢貼上去)

尋日出去食飯時又係咁, 我地三個都準備好哂出門口, 佢都係唔肯自己著鞋, 想我幫佢。結果佢肯自己著喇, 但就唔肯貼個魔術貼。咁對鞋有三條魔術貼, 我就幫佢貼兩條, 最後果條我一定要佢自己, 佢到行出出門口都係唔貼, 要落到樓下, 佢終於忍唔住自己貼啦!

戒片

好喇~到戒片片

呢排間唔中都有同佢坐 Potty, 但就冇一個特定時間, 即係唔會每隔15分鐘定30分鐘去一次。主要原因係我懶….佢一直非常唔願意坐, 每次都掙扎唔肯坐低, 坐低咗都成日要起身。

所以就喺個 Reward Chart 進行嘅同時間, 整埋坐 Potty 嘅獎勵。另外再加上睇完一篇人地分享的教仔方法後, 套用落呢個 Situation 度, 又OK work 咁喎, 佢唔再係每次都掙扎唔肯坐啦!

兩樣夾埋我覺得已經成功令佢唔抗拒坐 Potty!可能又因為其中一次, 即係前日朝早同佢坐係成功咗pee pee, 我即刻大大力咁讚佢, 再打埋電話俾爸爸, 等佢感受到自己成功咗係一件值得開心嘅事。

今朝我早咗起身, 8點半左右, 細佬已經食完早餐仲刷完牙一陣, 我就同佢去坐 Potty。

然後, 第一次同佢著底褲。

早幾日都仲係著 Training Pants (都係環保尿片果種, 外層防水), 突然轉普通底褲係因為咁啱睇到有人分享「3日如廟訓練」, 提及著嘅係普通底褲, 要令佢感覺到濕, 所以我就順勢試吓。雖然只有5, 6條底褲, 但我會同 Training Pants 輪住用。

呢幾日唔可以完全唔出街, 同埋 Naptime 都係要著片片, 聽日又要出去, 我預咗可能需要比3日更多既時間去訓練。話哂, 今次同哥哥細個果陣唔同, 而家我完全唔急, 因為知道勉強冇幸福😂 (其實係怕對佢有心理上嘅影響)。

黎緊我會繼續記錄!!

Posted in 【LIFE】2019, 【Rex】成長記錄

【32m18d】撞穿頭😭

今朝10點搭1左右,我仲半睡半醒期間,突然聽到細佬喊得好大聲,即刻起身衝出去睇,見到工人抱住佢,話佢撞到個頭。

本來以為好小事,只係痛啫,點知睇真啲,工人用紙巾印佢個頭,心知不妙!

果刻好唔想相信呢個事實……但真係發生咗!!😖

頭後面有條裂開咗嘅血痕!唔洗諗咁多,一定要去醫針縫針啦!

因為有過哥哥嘅經驗,所以都唔叫白車,自己執嘢同不停索走啲血,然後就抱佢出門口。

去到醫院登記完,再去到分流站,大約係10點8,9左右。見姑娘係10點10左右。

姑娘問洗唔洗同佢照 x 光,話驚撞裂頭骨,我覺得唔需要,就冇照到。不過問到縫唔縫針,就緊係要啦!

等咗成個鐘,終於都叫我哋入去啦。原來係頭先果位姑娘縫,仲有一個姨姨幫手,主要要hold實佢唔俾佢郁。

我要求喺房,所以全程我都用電子奶咀但求令佢分心,但係都唔得。佢真係太痛啦…姑娘同佢左右各打一支麻醉針,然後就縫咗3針,跟住叫我睇。我見到係縫好咗,但果個 area 啲頭皮就腫哂,佢話係因為啲麻醉藥。跟住就幫佢貼膠布。

縫完出嚟要坐多45分鐘,即係1點,因為要觀察吓佢會唔會嘔吐之類。

佢都算精神嘅,即使撞完,抱佢到樓下見到個看更伯伯時,竟然識得笑住講拜拜!!估佢唔到呢!不過仲好,證明唔算太嚴重……之後一直都冇喊同幾好精神又識玩,只係每次俾人攪個傷口先狂喊。

記得應該係4年前,哥哥果陣4歲,又係撞穿頭要去醫院,縫針果陣係唔俾我入的,而且房入面亦有好多人,至少都3,4個,係咪醫生縫呢,我就唔記得啦。果時仲好驚訝「嘩!要咁多個人捉實佢㗎!」但今次同樣驚訝,因為咁少人。

惡夢完了……我完全忘記咗要去攞藥,不過印象中哥哥果次都冇俾藥,所以就算啦!都應該可以唔用,係止痛藥。

返到屋企問佢仲企唔企上張書枱度,佢話「唔係呀 / 唔企呀!」

係就好啦!😊

Posted in 【LIFE】2019, 【Rex】成長記錄

2019之日常~2019.09.19(星期四) 愛寫字。去公園玩

20190919_101014.jpg

細佬真係好鐘意寫字!!亦都好鐘意睇住本書來讀。

雖然仍然係未認得D字, 但佢勝在唔怕醜, 自己作D語言出黎!

而家間唔中都會叫我幫佢影相, 例如見到D好我意既公仔, 又或者見我影緊佢, 就即刻扮個得意樣俾我影。

今日同佢去街就係咁啦~我地去左尖沙咀個遊樂埸玩, 估唔到人少到呢!可能因為係閒日, 雖然已經下午4點幾, 但附近冇乜學校。

20190919_161132.jpg

一去到冇耐已經有個哥哥問細佬可唔可以一齊玩!

呢個哥哥已經4歲啦!知道細佬唔敢行一條橋咁既野, 就鼓勵 + 夾硬迫佢行, 好攪笑。可惜哥哥好快就要走啦。

20190919_164603.jpg

之後見佢好似同個外藉既姐姐玩緊咁, 佢係度同人地講外星話, 人地可能見佢都唔知講乜, 怕左佢!

玩左一個鐘左右就返屋企, 好在有帶野食, 臨走果陣佢係咁要我抱, 通常都係因為肚餓!反而眼訓又未扭抱扭得咁緊要。

20190919_172306.jpg
好味~ 不過唔會飽

呢個新既 McQueen 水樽細細個好岩佢而家咩, 車左個 backpack 俾佢好鐘意, 出門口果陣係都要拎D無謂野擺入去…另外仲有幾架玩具車, 然而就 backpack 同水樽都話要自己咩!

Posted in 【LIFE】2019, 【Rex】成長記錄

2019之日常~2019.09.08 (星期日)

原來, 我的小兒子睡覺時很「定」, 這點跟哥哥又是大不同。

近來, 弟弟很常說的開埸白是:「我想…..」。例如想吃 gummy, 想玩某某玩具。

line_leaf

有時候, 哥哥令我很生氣。

是未懂得照顧弟弟吧….總是以自己的喜樂行先….

還小….是吧!

儘管有時會見到比他還小的孩子很照顧弟弟……

line14

20190908_125824.jpg

2019.09.08 星期日

今日打算去某海濱公園玩, 沿途經過「馬騮山」, 便入去看了一會。

完全是 unlucky day….當我們想要去 Grandma 那裡吃午餐時, 就下起雨來。(沒帶雨傘)

因為討厭站著的那個地方….所以即使雨勢頗大, 還是決定抱住弟弟衝過去。

東西還未開始吃, 已經看到雨愈下愈細, 後來更是整天都沒有再下雨了, 可惡。

Posted in 【LIFE】2019, 【Rex】成長記錄

2019之日常~2019.09.05 (星期四)

20190905_175844.jpg

煎了 Pancake 等你們去公園玩完回來後吃的。
平時不愛吃 pancake 的哥哥竟然也有吃!
還說一開始吃的時候不覺得好味(但他太餓了),吃了一會才覺得好味。

P.S. 這個 pancake 不是自製的。

lineb_illust_47_2m

20190906_002301.jpg

弟弟跟哥哥大大大不同!
弟弟喜歡拿筆畫,甚至會拿筆來跟著寫。
以前哥哥從來不會填色,弟弟卻是很有興趣。
這是弟弟說最喜歡的「美國隊長」!
他常把 “Captain America” 說成好像是 “Captain 阿咩黎架”!

Posted in 【Rex】成長記錄, Montessori & Homeschooling

【在家學習】(28m20d) 剝雞蛋殼

沒有刻意在家給他玩 messy play / sensory activity,只在公園讓他走到草地那邊玩泥沙。

去完公園就帶他去買麵包 (我一說要走啦,他就說:「包包」)。

入到麵包店,他第一時間走去拿夾子,想自己夾麵包?我沒有讓他夾,但在前往付款時,讓他雙手捧著托盤,走了幾步到收銀處。很成功功呢!當然我在旁邊緊張地「磅住」……

買完麵包去 supermarket。由於比平時晚了回家,就直接取消 naptime。

拿了個煮好的雞蛋給他剝殼,這是我早幾日前已經想讓他做,終於今日做了!

想不到這個小朋友竟然可以自己把雞蛋殼全剝掉了!我教的,就只是在一開始給他雞蛋時,示範了兩秒,然後他就全神貫注地剝啦!

最有趣的是一剝完殼就跟我說:「食㗎!」(意思是他要吃),我想說這是留來做晚餐的,但見他很想吃的樣子,而且,也不是大問題,就隨他的意思讓他吃吧!

這樣會不會比較有「立刻體會」的效果?常說發生甚麼事都要立即回應或跟孩子說,否則過後未必記得而且無意義了。剝完殼立即有雞蛋吃也算是吧?🤭

Posted in 【Rex】成長記錄, Montessori & Homeschooling

【在家學習】(28m19d) Sensory / Messy Play / Art : Finger paint

早前在書店見到一盒四色的 finger paint,竟然只需30元有找,立即就買。

今日終於拿出來玩了!

無可否認,我有時很怕讓他玩這類型,即是會弄髒的玩意。但他們這個年齡層,又確是很需要這類 sensorial 的發展,所以總會在某些時候「的」起心肝去做。

其實都不算太 messy,因為顏料都是可以清洗。

沒有準備甚麼紙張,我直接就叫 Rex 畫在地上。他也很自在地左畫右畫,發現地上的顏料有點滑,還站起來用雙腳踏在地上然後大力地左扭右扭!正好!可順便作為大肌肉的訓練了!🤣

Posted in 【Rex】成長記錄, 從遊戲中學習

【28M6D】玩粟米粉

午餐後又在家裡自製 Messy Play,或者叫做 Sensory。

正好有整整一包已過期的粟米粉,就隨便拿來倒了半包,加了些水。因為水太多了,又加多些粉。

如果不加水的話可以跟他玩寫字,但我不知怎的突然走去加水……?

後來 Rex 玩到雙手好 messy,說要洗手!問他還玩嗎?他說不。其實他是肯定會洗完手再玩的!所以我不讓他去洗手,只用上圖右下角那個白色的盤裝水給他洗手。

但他洗完之後就一整盤水倒在粟米粉裡去……

然後,才真正享受這次「遊戲」。

這次大概玩了接近一小時。

粟米粉加水 (我用水喉水,沒過濾也非熟水) 好像不能完全融解,不清楚是因為已過期,還是本來就是這樣?因後期的清潔工作不斷都有粒粒。

上次玩水是放在地上玩的,今次突然想到用這張淘寶買的積木桌,非常好用呢!中間凹下去的位置原本是用來放積木的,上面有塊面板,可用來砌積木或當桌子用。雖然質量不算很好,而且中間有個洞,是用來加條柱子承托著面板的。我把面板拿開,用膠紙封了那個洞,就可以用來放水玩了!清洗又容易!十分推薦!

平時玩的就是這種積木。

照片的重點其實是拍下弟弟自己砌的積木,他能夠把軌道拼成這樣,證明已經明白珠子要在這樣的積木軌道上才能滾動。媽媽真的好滾動呀!

Posted in 【Rex】成長記錄

28個月4天

很久沒玩這個了!剛把桌子打開,就急不及待地拿出來玩。

這方法太好了!就是把一部份玩具收起來,間中跟擺出來的玩具調轉,就能保持新鮮感!

即使是放了出來的玩具,也要不時轉換擺放位置,也有同樣效果。👍

Posted in 【Rex】成長記錄

Thursday Playgroup (27m2d)

哥哥做功課做到9點多,期間有看其他圖書 (即是不專心做功課),弟弟見到這幾本書就拿來看,還要我讀給他聽!當我指著書名讀完一次之後,他要求我讀多次。

這情況真是很讓我感興奮!他大概會是個不抗拒看文字的孩子吧?其實要多跟他讀中文才對……

每次工人拿吸塵機出來,他都要「攪攪震」,拿這個拿那個的,然後又做吸塵的動作,常常令我們哭笑不得。今早我很早就醒來了,見他如此積極,就讓他一嘗吸塵的滋味吧!

又到上 Playgroup 的星期四。近來的招牌笑容!😁

Playgroup 畫兔兔

今次吃的是棉花糖,印象中弟弟沒吃過?他試完一粒之後就不肯吃了,只愛餅餅。

Posted in 【Rex】成長記錄

Rex 之成長小記 (26個月)

有時會自己找書來看。今晚就拿著這幾本購於數年前的小書,一頁又一頁的翻來看,好像懂的一樣。

今日哥哥有新玩具,就是那個: “3,2,1, go…shoot…” 他就一直都集中去玩哥哥的陀螺!自己的玩具幾乎沒玩過。

平時的話都會一會兒玩玩這個,一會兒玩玩那個。

現在說句子可算是十分流利了!除腔調還是超級 baby 外,就好像是個小孩子般在說個不停。就像哥哥,常常說些我們聽不太明白的英語……

雖然很想他把中文也學好些,但過往我還是未夠努力,現在他所學到的、明白的,都跟哥哥以前一樣,都是憧英文而不懂中文。我正在比以往更努力地教他多些中文,借的故事書都以中文繪本為主,幸好他也很有興趣,而且學會了之後也跟學懂了英文一樣,指著那些東西說他們的中文,例如:小狐狸、狐狸媽媽。不過就沒有對英文般敏感和一學就記得。

小朋友都會被電視吸引,但想不到這一位會如此著迷!?一開電視竟然興奮到動手動腳。前陣子有時晚飯前 nap,到要吃飯時還未起來,爸爸就是開電視才可以讓他「立即」醒來而不會哭。雖然我不喜歡他們看電視,但又覺得這是個快速有效的方法……

說到看電視,可能是第二個孩子的關係,又或者只是個人心態,我已經沒有以前般緊張!可能因為哥哥也要有看電視的時間,未必可以每次都剛好是弟弟睡覺時,所以一看電視就一定會並肩坐著…..其實都幾可愛!當然,哥哥的電視時間一樣有限制。

吃飯的情況甚差。不明白為何明知道是晚飯時間,大家都已經圍在飯桌前準備吃飯,工人抱他去坐 high chair,仍然可以扭計兼且極力抗拒不肯坐。不得不使用硬功令他坐著,你以為他不想吃飯嗎?絕對不是呢!通常他又會乖乖吃飯。

所以這位脾氣不太好的小朋友,有時真令人感懊惱……

2019.03.22

開始出現這個笑容!要拍照的時候就會做出來!1歲多的時候雖然也明白到拍照時”cheese”的露牙,但樣子就是跟現在不同!現在是看似很用力的笑!完全就跟哥哥小時候一樣呢!(不是比較,只是找到兩個的共通點)

去公園玩發現他變得大膽了,因為我已經兩三個星期沒有帶他「認真」地去公園玩,都是工人帶多,所以真令我感到很驚訝……他會爬那個彎上去的架上去溜滑梯!而每次溜滑梯也跟以前不同,會很隨意就滑下,不像之前般總是在猶豫甚麼的,好像有點怕般遲遲不肯溜。

回家後會自己脫鞋脫襪子!我只教過他一兩次脫襪子要從後面向腳跟處拉下,他就已經懂得怎樣脫下!鞋子也一樣。這是以前教過哥哥很多次但他也不太會做的,證明他們的能力是不一樣,哥哥聰明記憶力好,弟弟在動作上和跟隨指示去做的能力比較高,不過就比較「唔聽話」,亦不太肯回答問題。有時候我也分不清到底他是不明白,還是不肯答?

常常說 help me (大大聲叫) …..my finger…..my foot….(意即撞到了/被踩到了之類,或者是痛了)

極有禮貌,常常說 please, sorry, thank you 。有次 grandma 來吃飯,夾餸給他後也有主動說 Thank you Grandma!

令人好感動啊!

2019.04.01

Posted in 【Rex】成長記錄, 【學習】

Playgroup 蛋。蛋。蛋。

今日爸爸收早,第一次來跟Rex一起上Playgroup。

今日玩的活動是放雞蛋入圓桶、用蠟筆幫雞蛋填色、在「米堆」中拿雞蛋給爸爸媽媽,最後還有蛋吃呢!弟弟超愛吃雞蛋,應該覺得很驚喜吧!

明顯地,今堂比上堂乖了!為甚麼會這樣?相信不是因為爸爸在吧?且看下堂會不會一樣乖!

Posted in 【迪士尼美語學習】World Family, 【Rex】成長記錄

【2Y2M】World Family – Story Telling (Toy Story)

算一算, 原來今堂是我們報名參加 “Story Telling” 第30堂了!
但其實印象中有2至4堂是沒有上, 另外好像有兩次因天氣或教育局宣佈幼稚園停課而改期 (自選日子)。

現在可能對環境已經太熟悉, 所以行為簡直是差到……一開始上堂聽故事便已經在所有人後面圍著跑, 間中也有看看導師的故事書, 但只是一兩分鐘, 然後又再跑。

捉也幾乎捉不住。他會跟你玩「捉衣因」, 看見你過來便逃跑!所以我只可以等到他跑遠了, 離開了其他人比較遠的地方才去捉他。如果緊緊地抱住他, 他是走不掉的, 但又會太吵鬧, 不停扭計 。把他帶到最後面的座位去, 跟他說好了只可以在裡面, 不可以跑的, 但他還未太理解, 前後兩次跟他說完再返回坐著的位置, 又到兩秒又走掉了…..

寰宇家庭 迪士尼美語世界活動: Story Telling

最能夠乖乖地坐下來的時候, 就是做勞作/手工/填色的時間了。 Continue reading “【2Y2M】World Family – Story Telling (Toy Story)”

Posted in 【Rex】成長記錄

[25M27D] 說句子

呢幾日講嘢有明顯進步!

之前都係3個字嘅句子。

而家幾乎係5、6個字都講到!

好似尋晚咁,突然講咗句: “I will get the seven.”

同埋頭先好認真咁望住我講: “Can you find ot?”

有時佢講嘅嘢真係突然到會令人嚇一跳!

好多嘢佢哋早就「在心中」!只不過係你未發現或佢未表現出嚟。

所以我仍然深信「Input」、「Output」之說。

你想佢學乜,多啲 input,遲早有日佢會 output。

Posted in 【Rex】成長記錄

有規律?愛整齊?

雖然有時弟弟好像聽不明白,或是聽了不理你,或是根本沒聽到。但昨天上 playgroup 時,導師說他是個很有規律的人,沒有一個小朋友能做到,但他就做到。

我知道他很愛整齊,從他把圖書一本一本排列好,有不整齊或自己弄不到很整齊的時候,會很脾氣就能看出端倪!

不過,他也未至於甚麼也整齊,至少他沒想做的話就是東西亂放!到處都是……

然而,看得出他也是對自己有要求的,只不過脾氣很臭就是了!😅

Posted in 【Rex】成長記錄

【23M13D】影子

尋日同今日都要去尖沙咀上堂,懶媽媽唔慣早起身都要起……好耐冇上過上午嘅堂啦!今日係11點半。

因為去果陣呢個BB瞓緊覺,又想佢瞓耐少少,所以就推BB車。尋日冇推,幾乎自己行足!只係抱過唔超過5分鐘。叻叻!

返到屋企附近放佢落地行,好似發現新嘢咁,一路行一路望住自己個影子!

其實佢得幾個月大果陣已經有留意過,仲走去捉啲陽光射喺屋企地板上嘅光線!

之後我有時見佢有望影子,都會扮吓手勢引佢玩,但從來都好似冇太大興趣咁。

今日終於都再次留意到,同佢用影子 SAY HI 又會望住個影同我講返 HELLO。

是日WF嬰幼兒活動:當一位小偵探

Posted in 【LIFE】2018, 【Rex】成長記錄

【23M6D】乜都學,今次係要剪……

話說我見到哥哥啲腳趾甲好長,拎嚟睇果陣話而家同你剪腳甲,然後我就行去拎指甲鉗。

同一時間細佬就去除自己原本著緊果對毛毛鞋!

本來都冇為意係咩一回事,到我同哥哥剪腳甲果陣,細佬就「遞」佢隻腳俾我!!

原來佢聽到我話同哥哥剪腳甲又要剪埋一份😂😂😂

呢個BB真係好攪笑,永冇蝕底!

Posted in 【Rex】成長記錄

【23M4D】同人 say sorry

今日食完午飯,帶佢去上 playgroup。

行到近地鐵站出口附近,差啲撞到人,因為佢成日都唔肯俾我拖住……

點知佢識得同人講:Sorry!

果剎那嘅同時,我都有同對方講 sorry。但聽到佢講真係好安慰,我自己都好習慣講 sorry,估唔到細佬咁叻叻學咗!

好嘅學到,當然都有學到唔好嘅嘢啦!但因為佢今次唔係對住屋企人,而係街外人嘛!所以都幾 surprise 㗎!

至於 Playgroup 今日係最後一堂,本來唔打算繼續報,但後來又諗到,既然一來未搵到報邊間,二來呢度有個好好嘅地方就係上堂比較自由,唔返學只要早一日請假就可以,唔會話只可以請幾多日假咁,呢樣我最鍾意!仲有三來係其實細佬都幾鍾意上堂,即使我真係覺得……好悶,但係佢開心係最重要。

所以,暫時我只報4堂,如果12堂就最快都要2月先上完,而且根本冇可能,因為至少有兩三堂我哋係上唔到。到時25、6個月了,又好似太大個……所以4堂雖然貴啲 (250/堂),但都還算值得俾佢上多幾堂嘅。

可能有哥哥嘅經驗,真係唔想咁快俾佢獨自去上堂,第一個小朋友係唔知點解會咁狠心?反而第二個就比較……珍惜!覺得佢得果兩歲就自己返學好慘豬!

哥哥果陣的確係好可憐㗎……由本身好唔怕陌生人,又鍾意同任何人溝通,變成連成日見嘅親戚都驚咗怕咗,完全反哂常!!諗返其實果時都好掙扎,到底係咪應該停止唔好再返,定係再睇耐啲呢?

當然,到後來佢都適應到啦!但就總係覺得好殘忍!又唔知會唔會因為咁而令佢有心理陰影 (或者佢自己都唔知)。有得揀,第二個就唔再咁行囉。

Posted in 【童書】, 【迪士尼美語學習】World Family, 【Rex】成長記錄

World Family 寄來的聖誕禮物

如果冇記錯, 會員每年都會有一份聖誕禮物。

早期好似係DVD多, 呢兩年開始轉為故事本, 仲好啦!

20181203_13565020181203_135703

仲有埋碟添, very good!

20181203_135655.jpg

下午一收到呢份禮物, 就拎住黎講故事俾細佬聽啦! 因為當時佢坐係 high chair 度食緊 lunch, 所以都好專注咁睇。不過睇左幾頁就開始話: mama, no

所以就唔再講。

到夜晚訓覺前同佢一齊睇迪士尼D書 (呢排幾乎每晚都會咁做) 第一本就係講呢本書。

佢竟然可以好有耐性咁聽我講左幾頁, 雖然冇下午果陣咁多, 但係叫做「佢可以控制本書」時都肯睇。即係平時佢睇迪士尼D書係佢自己掀, 佢掀到邊頁我就講邊頁。而佢又好有自己主見, 未講完就又掀 (其實佢係完全唔聽你講乜), 指下呢樣又指下果樣咁, 要你跟住佢既步伐…..你又要應佢「哦! Mickey…哦! Donald…」不過如果你教佢一D佢冇自己指既公仔, 即係一個新字詞, 佢又會聽同跟你講喎!

其實佢都係有接收到你講既野, 所以我先會繼續我有我講, 佢有佢指!!

睇完呢本書, 佢就繼續睇返佢最愛既迪士尼啦~ 呢排好鐘意講: Book 6。所以今日我就拎呢本出黎睇, 又係睇左大約半個鐘左右就去訓覺。

可能佢都眼訓, 所以同D書講拜拜時都冇扭計, 抱起佢又乖乖地伏係我度, 然後叫佢關燈又好乖咁關燈, 同佢唱埋首歌仔, 訓佢落床仔又完全冇扭計, 超乖。

陪佢睇書前係工人放佢落床, 但佢就喊到好可憐咁, 唔肯訓。照計今日冇訓到下午果轉, 應該十分眼訓, 但可能佢期待同我睇書, 所以就扭計豬啦~ 我呢個媽媽…應該要主動D做丫嘛!!!

Posted in 【Rex】成長記錄

20m18d 又上Playgroup啦!玩麵粉

今日上 playgroup 玩麵粉 (其實係糯米粉),估唔到細佬都幾有興趣喎!玩玩吓仲將我搓成嘅波波擺入口!!可能佢認得呢樣嘢係整食物,喺屋企我緊係唔俾佢玩啦!最多都係俾搓好嘅麵團佢「督」吓!都已經督得好開心,哈哈笑。

原來喜歡玩車上的機關

上完堂之後又喺外面玩一陣,玩咗呢架車好耐,原來係攪果兩度門。喺屋企玩哥哥啲車都發現佢係對啲可以開關嘅車門比較有興趣,並不是將啲車推前推後。


今晚工人整到隻蛋好 cute! 不過細佬唔係咁欣賞,仲好似驚驚哋添!直到將隻「雞仔樣」整到冇咗,佢先肯食隻蛋!😂

Posted in 【Rex】成長記錄

Rex’s Baby Language (20m17d)

近排成日學我哋咁叫哥哥:Max

好似今日咁,我一叫Max,佢就即刻望向哥哥然後講:Max ark co gee si ho bee he ba ee da…..

以上除咗Max一字外,其他都係BB話 😂

另外,今日想整頂帽俾佢,所以量度吓頭仔,大約 49.5 cm!

前排試過一次睇住佢撞親隻腳,心痛佢一定好痛,情不自禁地就攬住佢錫返。跟住開始就一整親痛就要人錫錫🤣🤣😘😘

Posted in 【Rex】成長記錄

Rex 發展:玩砌圖,講 next

晚飯後同工人玩,第一次聽到佢講 “next”。

之前都有類似嘅音,但冇今次咁清。

原來佢玩緊 puzzle! 之前喺玩具反斗城買果套。

玩完一個又一個!工人同佢講 upside down,似明又好似未明咁,但估唔到佢完全冇人幫之下都可以砌到!叻叻豬呀!

除咗 next,佢已經識講好多嘢,不過就冇哥哥果時細個講嘢咁清咁快同咁叻!

佢叻嘅係大小肌肉嘅發展,連密實袋都俾佢開到。

仲有最叻嘅係發脾氣!🤣

Posted in 【迪士尼美語學習】World Family, 【Rex】成長記錄

【DWE】活動:我的字母

20180810_152942.jpg

好耐好耐冇寫下細佬上 World Family 活動啦! 呢次唔係 Story Telling, 又係「活動」!!

一去到又係攬到我實一實, 好怕醜!

明顯對D字母好有興趣! 因其實近呢個月已經開始左教佢 Letter Sound, 所以認得下而特別感興趣吧?!

無論係聽或睇碟, 細佬都係比哥哥少得多, 但相對由於工作照顧佢而日日都有得聽, 再加上有哥哥之前的經驗, 所以都係睇少D, 同講多D中文好….

Posted in 【Rex】成長記錄

【1Y5M】17個月

無意中睇返以前既 Blog, 雖然記錄哥哥既發展唔算係十分多, 但都比細佬多好多好多….
點解會咁架? 明明之前仲覺得寫哥哥既唔夠詳細, 好想將細佬既發展寫得更詳細, 點知仲衰….
唯一既解釋係….要湊住佢兩個!(喂, 你有工人點解都唔得閒寫?) 我都唔知點解, 永遠都有好多野做咁!例如…訓覺!!哈哈….

講下者….其實細佬我就比較專注於佢響食果方面!哥哥就簡單D, 煲粥多。主要都係環境影響啦!仲有就係年紀大左, 諗野又唔同左啦!

呢次睇返哥哥細個, 就好明顯可以睇到細佬同哥哥既分別。

首先最最最大分別就係:「講野」
而家睇返先知道當時同月齡的哥哥(即係都係17個月大)已經識接歌啦!(哥哥的舊文:接歌
講野就更加早啦!
細佬到而家都仲係簡單既字, 例如 mum mum, 街 (去街), 媽媽 (好似要好用力咁), 數1, 2 (呢排開始自己數1然後又講到2, 我地好早好早已經教佢啦….), 至於其他佢都多跟我地講, 不過就唔係咁清楚, 其實佢係肯講, 尤其跟住讀D字, 只不過係講得唔岩, 而且平時係唔多講, 最叻就係自己會數1,2囉!

第二樣想講既係:「肯唔肯自己行」
仲有好大好大既分別就係哥哥成日都係行路, 即係出街已經幾乎完全唔帶BB車, 重點係佢肯自己行。
但係細佬係行兩步就要人抱, 所以一定帶車, 唔係就抱到手都斷….(再講一次, 年紀大啦, 我冇力)

第三樣係:「怕唔怕陌生人」
呢樣又係好大分別。哥哥係咩人都唔怕, 見到陌生人都唔會驚, 又乜人抱佢都得。
細佬就唔係啦, 人地未掂佢就已經驚緊, 如果抱住佢, 佢就攬到實一實, 如果冇抱, 佢就喊住要抱。試過好幾次係見到人就爆喊, 要抱佢”離開現埸”。

細佬雖然參加得比較多 World Family 既活動, 主要都係 Story Telling, 但就比較少去 D Playroom, 即係有波波池果D度玩, 亦冇參加過出面既 Playgroup。(哥哥的舊文:1小時45分的PLAYGROUP (試堂)
而係活動中既表現都明顯唔同, 哥哥係幾乎成堂都四圍走, 攪呢樣攪果樣冇時停。
細佬就比較定, 一開頭都係會驚驚地, 有D緊張咁, 細少少仲會喊, 抱住佢一陣就會好D, 都會開始跟其他BB一樣企起身, 周圍走同周圍爬。

「時間表」
其實我冇刻意安排時間表俾細佬, 但佢就由細細個開始已經有好定時既作息, 完全係由佢自主地安排時間表!而且亦都一個十分好!!一開頭覺得個時間表幾定果陣, 佢係8點多D就開始眼訓, 到後來慢慢調較到而家10點訓覺。而起身呢, 就冇乜得點調較啦, 佢通常係6點至7點半就醒, 前排完去日本仲慘, 而家有時會5點幾未夠6點就醒!!仲未適應返香港時間咁。
哥哥就係比較夜訓, 但就晏D起身。

「大小肌肉發展」
細佬亦明顯比哥哥發展得好, 好細個已經識掀書, 擰開D蓋呀, 樽呀等等, 今日(2018.6.3)仲試過兩三次自己玩到迪士尼美語世界部卡機, Play 到張卡添!(因為對佢地黎講都算幾難) 仲有細佬超鐘意爬高爬低, 枱枱櫈櫈….乜都擒!仲要超大膽!哥哥就冇擒咁多, 可能係環境做成, 間屋太多地方俾佢擒!

「健康狀況」
哥哥未滿月已經病了, 但細佬到而家為止, 傷風感冒之類係極少, 有都會自然好, 睇醫生就只有兩次左右, 打完針都未試過發燒!!!

講住咁多先….

 

 

(其實呢篇寫完好耐, 10月1日凌晨先post…)

Posted in 【Rex】成長記錄, 【學習】認字

【Rex 學習】中文認字

唔知大家有冇睇開 Facebook 一啲二手童書 Group?我間中都會睇吓。最近就俾我見到套中文認字閃卡,係大 size 果種,於是就俾我買咗啦!

之後喺淘寶訂購咗幾百張白卡紙,好似係 300g/張,重到阿媽都唔認得😅

但要自己手寫,我又懶,買就叻,做就……哈哈!都寫咗10張㗎!不過就好少同佢睇,所以其實都仲係停留咗喺度。

去完旅行返嚟正常都唔想洗錢住,已經洗咗一大筆嘛……都唔知點解無啦啦又走去睇啲 Group。都好嘅!中文字卡不嬲都想買,只不過我未搵到邊度有,先至唯有去淘寶訂。而家終於都有啦!就開始同細佬玩嚕!

首先,我係已經知道佢OK會睇嘅,我先決定買。之前一直有用迪士尼美語世界啲卡仔同佢閃,佢好開心㗎!重點係我發現佢真係有睇,仲會好似睇到唔夠喉咁!所以每次同佢玩完我都會攬到佢實同大力拍手讚佢,佢又會笑得好開心!好似因為認到字而有滿足感咁。

而家一日同佢閃兩三次,記得果吓就會玩,唔知成果會係點呢?我都好期待……就好似用迪士尼套教材咁,我相信堅持同佢做都係會有成果嘅!

希望佢可以對中文都有興趣啦!英文我反而唔擔心。

Posted in 【LIFE】2018, 【Rex】成長記錄

準備去旅行啦!(+細佬發展情況)

成個月有多冇寫 blog,睇嚟我真係好忙!🤤

忙啲乜,前排搬屋都已經夠多嘢攪,仲要同工人攪日本簽證!臨發現時日無多果陣,仲差兩個星期日左右就出發…好在,唔需要等5~7個工作天就已經收到通知話批咗,拎得visa啦!太好啦!幾驚唔批…唔批錢事少,冇人幫手就好大件事啦!

因為根據上次旅行嘅經驗,真係會攰到咩咁㗎!想瞓多陣都唔得。即係呢,個B晨咁早起身,習慣咗都係工人湊住先,到我瞓醒先接手,但去旅行就冇啦…所以我同爸爸都一致認為呢個決定係冇錯!(帶埋佢去)

其實幫工人攪簽證都唔係咁煩複,只要齊哂文件就OK!但有啲冇喺網站度註明,但原來都係要嘅,其實係咪應該改改佢,寫返清楚啲呢?攪到我係咁即時搵俾佢哋…

不過算啦!都批咗!而家就等出發!仲有一個星期咋!好好好好好期待呀!

細佬而家16個月大啦!呢張相影到佢超級老積…其實真人都唔係咁老成嘅!係好 cute 㗎!而家成日扮可愛引人笑,又比以為大膽咗!仲大膽到不得了,成日擒高擒低,睇少一陣都可以已經爬咗上哥哥張書枱度,隻手攪緊隻窗啦!😲

未係好識講嘢,但會有意識咁指住一樣嘢讀,例如英文字,圖書同海報上面嘅字,有時睇圖書見到幅圖畫仲會「咔」一聲笑出嚟!好似覺得個公仔好好笑咁!

講得最叻嘅應該係個「街」字,喊果陣識叫「媽」,好肚餓或者想食嘢時識講「mum」,擲骰仔又學人講個掉字,但係…完全聽唔出係咩字囉…😂

佢好鍾意喺我哋張床度典來典去,好 enjoy cozy 同軟林林嘅嘢!但就多次因為突然撐個人,撞到我爆缸!尋日先俾佢撞爆完咋!痛到我呢…仲要佢又痛,狂喊,我點痛都要忍住,首要任務係錫返佢……

佢雖然超級好動,成隻 monkey 咁,但係又可以非常專心。呢樣嘢同哥哥唔同,而且比哥哥早更多對書本有興趣,會自己拎出嚟睇。

哥哥而家鍾意睇書嘅程度,可以用「極度喜歡」嚟形容,甚至都未夠貼切,因為佢經常喺未瞓著果陣,偷偷地睇書,仲要冇開燈!有時半夜醒咗,都會拎書嚟睇,確實係非常誇張!

Posted in 【Rex】成長記錄, 【學習】

14M9D ~ 開始學習用筆畫畫啦!

星期六同哥哥出中環睇醫生。爸爸收咗工,緊係叫埋佢出嚟啦!難得只有我哋兩個,細佬喺屋企,我哋就完全屬於佢啦嘛!睇完醫生Join埋爸爸就周圍行吓。

入咗HMV,哥哥睇玩具,爸爸唔知行咗去邊,我陪咗哥哥一陣就去睇第二啲嘢。原諒我……睇啲男仔玩具真係冇興趣㗎……

無意中發現咗呢盒特粗嘅蠟筆!諗起之前聽完姑娘講要俾佢試吓拎筆畫嘢,於是即刻買。

買咗返嚟幾日都未開始用,早幾日第一次,同細佬喺廳張檯,俾佢坐喺張櫈仔度畫。

雖然我有捉住佢右手同佢寫吓畫吓,但係佢畫兩吓就開始拎啲筆嚟玩,最後仲將支筆擺去個窗度,又想掉……好在唔易爛啫!

今日食完晚飯,佢又好似平時咁,多次走埋嚟要我抱住。

都係一上嚟就攪個 keyboard 啦!再唔係見到第二啲新奇嘢就攪吓。

呢次我突然醒起呢盒蠟筆,就拎返上次畫果張紙出嚟俾佢畫啦。

今次叻咗!開頭未係好記得咁,後來就開始畫畫畫~ 畫完一支又拎另一支,不停換筆!係不停!拎起畫幾秒就換!

其實抱住佢睇住佢畫仲好!一來親暱啲♡二來要捉住佢手都容易得又,三來就係睇得好清楚佢點畫(玩)法。

仲可以喺佢一邊畫嘅時候,一邊教佢認識咩顏色,我覺得個一個非常適合同一歲BB玩嘅親子遊戲/活動。一邊親子 (我成日都會係咁錫佢面珠仔),一邊教吓佢嘢,佢又開心有新奇好玩嘅嘢俾佢攪。

我覺得佢係「攪」,比起玩,用「攪」呢個字嚟形容絕對係更加貼切!😂

Posted in 【迪士尼美語學習】World Family, 【Rex】成長記錄

迪士尼美語世紀課程:認識各種職業

2018-03-10, Day 433, 14m8d

呢兩日突然咁凍,又病病哋,但都唔想因為咁而唔帶細佬去玩!哥哥以前好似參加得比較多,反而細佬係少參加。呢個係第一個「非Storytelling 」嘅課程!(哥哥以前未有的) 以後要多啲參加先得。

一入去都仲係好怕醜,係都要痴住我想我抱,唯有攬住佢上堂啦!慢慢我都放低佢喺地下,但都仲未 warm up。

我諗有成10~15分鐘左右,先開始自己企起身,即係好似之前咁,會想走來走去,但又未 action。

導師一拎啲櫈出嚟,百厭豬就「大顯身手」!爬上去,仲企埋喺櫈上面添!張櫈嘅大細同顏色都同屋企果張99%相似!佢完全係駕輕就熟。

導師同佢玩完之後,俾咗呢個醫生聽診嘅玩具俾佢,不知幾開心,有玩具玩丫嘛!每個BB都有㗎。

到尾聲啦!一人拎幾張唔同職業嘅公仔貼上張大卡上面,好好玩,好新奇呀!

睇吓佢哋幾 busy!哈哈……

上堂期間細佬都有走來走去,不過唔算多,比較多嘅係想走埋去攪導師已收起嘅玩具。佢見到有條杆咁嘅嘢就拉起!

有時又無啦啦喺度倒後行,仲突然自己轉圈添!我係第一次見到佢轉圈咋!

返屋企同工人講,佢話原來係早一兩日教佢轉過嚟,但我明明喺度都睇到,但我又見唔到佢轉嘅……?

同場加映:終於收到呢條好靚嘅奶咀鍊啦!多謝❤ 真係好靚靚。不過細佬唔食奶咀,條鍊又咁精緻,應該會永久「珍藏」。😉

Posted in 【Rex】成長記錄

識跳,仲會餵人食野

過埋今日,細佬就14個月大啦!
未夠一歲識行,未夠14個月識跳!真係跳起,雙腳離地!
仲有,未夠14個月就差啲打到「關斗」!超勁!!(我就話打唔到好啲,好驚佢扭親條頸)

其實,我自己就認為係同點同佢玩有好大關係。以前哥哥細個果陣好多我都唔知道或唔識點做。而家哥哥都7歲啦!而且亦因為一啲特別嘅經驗,知道有啲野真係要由細細個開始同BB玩+訓練。

即係例如用腳踢野啦,用手拋或掉,甚至好似我咁,見到佢雙手撐住地下,個頭「烏」低少少,我就試下扶住佢打關斗,俾佢感受下係咩滋味!(點知佢夠力打向側邊……)

仲有,我認為BLW都有一定幫助!佢嘅手部發展幾好,識得「禁」、搣、「練」等等….幾個月大就識用手指去掀書。

由11定12個月開始俾佢用匙羹。今日有新嘅突破!終於自己「不」到少少乳酪嚟食啦!Yeah~

Posted in 【LIFE】飲飲食食, 【Rex】成長記錄, 【哥哥的小學生涯大小事】

【13M7D】午餐 & 晚餐

有南瓜、翠玉瓜、粟米雞肉丸、芝士、紫菜,仲有準備中所以冇入鏡嘅白飯波波!

晚餐仲豐富!有翠玉瓜、菠菜豬肉丸、蕃茄、三文魚,仲有烚緊嘅雞蛋同三色米飯波!都係未準備好所以影唔到😅

通常俾嘢佢食都唔可以一次過,因為佢見多嘢食就成日拎嚟掉!所以寧願整好咗嘅就放上盤度俾佢食先,而且天氣凍,都唔想啲嘢凍哂。雖然……佢食成粒鐘有多,乜都凍哂!但係都盡量啦!攪到好似食法國菜咁逐樣出😂

佢食嘢係慢慢嘆,你以為佢掉咗啲嘢食就係唔食咩?以為佢飽?完全唔係!掉完果樣嘢,轉頭都會拎返果樣嘢嚟食!(當然唔係執返上嚟俾佢食啦) 真吹脹!好多BB都會係咁……

太耐冇寫 BLOG,通吓呢個細佬仔嘅發展先!

而家13個月啦!成日跟人講嘢,最好笑係講:「哎…吔!」或者係:「哎吔吔!」又或者係:「吔吔吔……」不停咁「吔」!

好早之前掉咗落地就話:「喔~OH!」

出自咁細個BB把口超好笑。

早幾日見到佢突然倒後行!!有冇咁攪笑呀?12個幾月就識倒後行??真係好可愛!佢仲要係倒後行完幾步之後,再行返前,再倒後行!

仲有爬樓梯,無啦啦爬上上格床啲樓梯,仲要一爬就爬到上三層,好危險呀!以後絕對要睇到實一實……

已經識得「俾/GIVE」同埋「俾細佬/TAKE」,(好似之前講過) 仲有OPEN, CLOSE….我覺得仲有好多佢係學識咗,不過未能表達。

最好笑嘅動作係,坐喺度,用腳撐起個PAT PAT,但兩隻腳板係冇離地,即係坐喺度「櫈」!好似隻青蛙仔咁!

仲有最勁嘅就係佢可以坐喺度自轉!360度咁轉一個圈都得!

講緊嘅都係未夠13個月時發生,爬樓梯好似係剛剛一歲左右。

而呢幾日仲識得自己玩搖搖馬!由一開始要人幫佢坐上去,到之後識自己爬上去坐,之後想搖但兩隻手又唔識得扶實,到而家識得扶邊度啦!仲識得搖添啦!絕對唔可以睇少BB自學嘅能力!

實在太神奇,咁細個嘅BB都已經好有自己嘅意識!想咁定想咁呢,非常有主見!

係啦~打一歲針時姑娘建議可以俾佢玩多啲積木,同埋俾啲筆佢試吓畫吓,訓練吓啲小肌肉。所以前排淘咗啲「泡沫積木」返嚟,今日第一次開嚟玩。點知,呢個傻豬豬忍唔住嘴,先後咬咗三啖!!咬爛咗3舊積木……仲要含咗喺口入面,好危險呀!!睇嚟呢啲積木未啱佢玩……又要再買過啦!反而哥哥就超鍾意玩,但又可能係貪新鮮啦!頭先砌咗呢啲:

好靚!我都忍唔住,即刻影相!

一開始玩果陣佢未識咁砌,但經過砌咗幾次之後,就砌咗呢啲車出嚟啦!仲要係有意思又有名堂㗎!

講開哥哥,因為流感情況嚴重,所以提早放新年假!而早前同佢做嘅評估已出咗報告,125…爭少少就130,所以呢個衰豬真係超難攪…

Posted in 【Rex】成長記錄

【11m29d】晚餐,兩款食物六種食材!

呢幾日雖然病咗,但係反而愈夜愈唔想瞓覺住!係都要攪到成點先瞓。尋晚就係要等整麵包,今晚就上網睇嘢都睇成個鐘。

平時起身後細佬未nap都會煮啲嘢俾佢做早餐,否則就係整午餐,晚餐多數由工人整。不過今晚就我煮啦!

得兩樣嘢,但係有齊主要嘅食物!有薯仔、西蘭花、三文魚、紅蘿蔔,仲有豆腐同豬肉添!睇唔出呢?本來想加芝士,但因為奶製品同鐵質一齊食係會影響到鐵質嘅吸收,所以就冇加。

之前講過,佢而家唔多肯食肉丸,所以要將啲肉混入其他嘢食度。今次佢食得幾好,幾驚佢唔夠!其實都唔係太夠,因為佢食到咁上下停吓又食吓咁,我又出一招:拎佢最愛嘅生果(士多啤梨)俾佢食,等佢開胃返啲,或者叫做想繼續食嘢。結果佢食哂之餘仲可以食多個自家製嘅麵包仔,就係尋晚整到兩點果啲腸仔包但冇包到腸仔嘅,特登留啲俾細佬食。

而家食嘢基本上已經十分乾淨,好少掉到周圍都係,食到跌哂嘅亦都少咗好多啦!即係食完之後喺 high chair 上搵到嘅食物係極少量。對於呢個進步真係好滿足,希望繼續愈食愈好啦!

今日發現佢識做一個動作!叫佢 “touch your head” 竟然識得摸自己「耳仔」!可能摸唔到頭?定誤會咗?定係點呢?Anyway,佢而家已經識嘅動作除咗 give me five / hi five, hooray (hands up) 同 hello / bye bye 之外,近日亦學識咗 give (俾xx) 同 take (俾細佬)!當然仲有學行果陣嘅 walk to mama / papa。

Posted in 【Baby Food】, 【Rex】成長記錄

【10個月BB】BLW 晚餐:南瓜飯波、蒸南瓜、粟米雞肉

喺未瞓醒嘅狀態下 (其實係啱啱瞓醒,又見到幾個「陌生人」),竟然將全部食物食哂!

呢度見到有6個飯波,但佢食完之後再食埋整好咗果4個,即係總共食咗10個南瓜飯波!好叻仔呀!連就咁蒸熟嘅南瓜都食哂,但3個粟米雞肉就掉咗1個,食剩細半個,即係都食咗1個半。

呢個成績非常好,亦係有史以來食得最多飯嘅一次。

另外,Rex 而家可以唔扶住,自己向前行到最多4步!每日都有少少進步,由行得好唔穩陣,到頭兩三步都開始愈行愈穩陣!唔知幾時先真正識行呢!好期待😊

Posted in 【Baby Food】, 【Rex】成長記錄

有意識地叫「媽」(9m1d)

有兩件事要記低!太重要!

第一,帶咗佢去睇中環果個「名醫」,話Rex嘅嚴重程度只有2,以1~5嚟計,5係最嚴重。

第二,幾次都望住我叫「媽」,唔係講得好正,但我相信係有意識而且知道我係媽媽。仲有,佢亦都識叫「哥」,唔知咁啱定真係識?

今日午餐都好豐富,有南瓜波飯、啤梨蘋果蓉豬肉丸、有機青瓜,仲有生果~無花果!差啲唔記得食呢啲嘢之前仲俾咗啲自制嘅基本麵包,但佢食好少咋,雖然好肚餓 (我係正下一餐嘅時間俾佢食),但佢好似唔多鍾意食咁。

呢餐樣樣都食得唔多,後來都係餵,全程坐咗有差唔多45分鐘,因為冇乜點喊,佢想喊時餵佢食嘢又唔喊,所以先可以持續咁耐。

下午又俾咗啲水蜜桃佢食,但由於我要出門口,所以就快快手手咁餵佢。

到晚餐,簡單啲,雞鎚同青瓜,用我哋食嘅糙米白飯整飯波,仲有火龍果。青瓜咬兩啖就掉,睇嚟佢真係唔鍾意食青瓜。

而家食雞鎚可以同佢拆到條骨咁樣,叻咗!

而家 Keep 住「記得嘅話」每日都同佢碌卡 (迪士尼美語世界),仲會睇一至兩次DVD,初時都比較緊張睇幾耐,但發現細佬唔會十分專注咁睇嘅時候,我都會俾佢睇耐少少。

唔知係咪首歌特別吸引Baby? 有一首唱時間嘅歌,同哥哥一樣特別鍾意!一睇到或聽到都會笑!

Posted in 【Rex】成長記錄

7~9個月寶寶的生活啟蒙遊戲 – BabyHome 新知大耳朵 (轉貼)

https://www.google.com.hk/amp/s/m.info.babyhome.com.tw/amp/article/3628

7坐8爬,細佬係未夠6個月識坐,6個月後坐得愈來愈穩,7個月兩隻腳成日young young吓準備爬,7未夠8個月識爬了!而家仲要爬得好快添!

轉身,之前雖然已經識,但係學識之後一直都唔多肯轉,連我哋反轉想佢趴吓都唔制!但係呢兩個星期,可能為咗起身爬,所以轉身十分靈活!一下就反轉咗個人,兩吓就雙手撐住地下,第三吓就已經坐咗喺度。所以而家同佢換片要佢係鬥快!慢咗或者換緊時,甚至將佢瞓低果吓,佢已經彎哂腰要轉身,每次都要拎啲嘢俾佢揸住,令佢分心,先比較容易完成任務!

可能地方問題 (9成9係),細佬爬得比哥哥多,多爬行「有助延腦平衡功能及肌肉神經協調的發育」。以前哥哥跑步好容易跌倒或成日好似就嚟會跌倒咁!唔知關唔關事呢?

識爬之後都開始學扶住啲嘢企,由趴住咁扶住企,到愈扶愈高,會捉住梳化企。睇 facebook 先記起哥哥未夠8個月時已經會企喺梳化上面,扶住梳化背咁爬 (擒會貼切啲) 上去!超勁!

細佬開心嘅時候好得意,果對手會係咁上下郁,即係好似扮雀仔飛嘅快版咁樣!就算睇唔到佢個樣係咪笑緊,淨係睇佢對手就知佢開唔開心啦!仲有樣嘢好特別,就係佢成日都會皺眉同戚眉㗎!

寫住咁多先,再儲喺草稿度就會唔記得Post….😂

Posted in 【買】BB用品, 【Rex】成長記錄

我的孩子很忙碌

斬吓眼細佬就8個月有多啦!近來可以坐定定耐玩具嘅時間亦都耐咗!

對於玩具,我個人比較鍾意啲具有操作性嘅!而且最好唔係電子玩具,即係㩒制就發聲果啲。不過我覺得呢類玩具點都要有一個,係一個就夠啦!所以最好就係揀啲大舊啲,即係多啲唔同操作就有唔同聲音嘅。

好忙咁玩緊新拎出嚟嘅玩具!(多謝朋友仔)

我唔想個仔擁有太多玩具,所以我會精心挑選!

前排就買咗下面呢架珠珠車仔,一來有上面可訓練小肌肉嘅珠仔,二來前面有繩拉,可以俾佢知道要架車行,唔一定要推架車,仲可以用繩嚟拉㗎!

但凡可以轉(Spin)嘅玩具,細佬好鍾意轉!就好似呢架車啲轆咁,同哥哥一樣咁鍾意玩!(太相似啦!定係多數BB都係咁?)

又好忙咁玩呢架車仔,一玩就…唔知幾多分鐘!

講開玩具又想講吓去完日本返嚟,買咗一樣非常滿意又鍾意嘅書仔!就係呢本啦~ (同玩具有關咩?哈哈…)

係磨砂膠書,中間有層薄海綿。

購自大宮鐵道博物館。

我鍾意佢嘅原因係,一來唔會被撕爛,二來又咬得(/≧▽≦)/~┴┴   仲唔怕好似啲紙板厚書咁唔小心打到自己會痛。仲可以陪BB沖涼時睇,一邊睇書一邊沖涼!仲有仲有,入面全部都係男仔都鍾意嘅車同火車!一見到已經諗都唔諗即買。

佢有時都會拎住本書嚟睇㗎!好攪笑,唔只書,有啲 lotion 呀,cream 呀果啲,佢都會拎住睇,好似識睇啲字咁。

Posted in 【Rex】成長記錄

去超市採購~第一次坐超市購物車

尋晚細佬3點幾醒咗,喊咗好耐,點都氹唔到,見佢好似想食奶咁,唯有去沖奶俾佢啦!飲完終於都肯瞓啦…

我今日8個月4日大啦!

今朝起身後,10點幾帶埋佢落去超市,諗住買個電子磅同買啲食材。呢間超市比較少人,可以慢慢逛!仲第一次嘗試放佢坐喺架車度添!

開頭細佬都好好奇咁摸吓架車,又伸手出去摸食物架上面啲嘢。但坐咗大約十分鐘左右就開始扭計!抱返佢出嚟咩住佢就唔喊。呢個BB好癡身呀…

Posted in 【Rex】成長記錄

【Rex】7~8個月

7個月時趴喺度開始腳撐撐咁,但就未識爬,持續咗好多日。後來開始會「扇」住咁向前撐,加上雙手向前爬,慢慢就真係識爬啦!一日一日咁進步,三幾日就真係爬!好快。

8月尾識得瞓低再起身,又突然識發出「爸爸爸」嘅聲音(雖然有時講到「把把」聲),係佢第一個識講嘅字!唔知佢又知唔知道點解呢?

之後我教佢講「媽」,佢好快就學識啦~不過未掌握到係點發音,所以都只係間中聽到,有時都唔係好正,但見到佢個嘴係度努力緊,哈哈!

至於爬行就愈來愈熟練啦!訓低左,會轉身,然後雙手撐起,再用埋雙腳,加PAT PAT向後坐,咁就成功坐到起身啦!

最攪笑嘅一樣嘢係,唔記得係由6個月定7個月開始,佢開始識學我咁,將個口痴埋人哋隻手度bu人!初時都唔太肯定,之後就好肯定啦!好可愛呀…

仲有就係識得自己拎住張被同人玩peekaboo,即係佢瞓低時拉住張被,跟住用力將張被拉高遮住自己塊面,然後再大大力咁拉返張被落嚟。原來咁細個BB已經學識咗兼且會主動撩人玩,好過癮!(同哥哥相隔6年,我幾乎咩都唔記得哂)

不過食野方面就差D…..

一開始時係餵糊仔,到六個月大時開始試行BLW,不過都有俾下糊仔同粥仔。差不多八個月大前,由於我同哥哥去左旅行,只得工人照顧佢,所以叫佢餵返粥仔/糊仔,夜晚爸爸係屋企先俾FINGER FOOD佢食。到我地返黎之後,就全面BLW,冇再俾粥或糊仔。

可能之前習慣左俾人餵食多,佢唔係次次都肯自己拎野食。通常係一開始時好有興致咁拎黎食,但食食下,可能攰/D野唔好食/難吞等等我都唔知係咩原因,總之好多時食左十至二十分鐘就會喊,甚至更短時間!仲要係喊到你要抱佢先收聲,好似有D抗拒食野咁。

試下佢係咪真係唔想食,餵佢,佢又食喎!!心諗:死啦~佢一定係要人餵啦!

呢個情況一直都係咁上下,減少左餵佢,但因為太浪費食物(有時只食到4份1咋),而餵佢又肯食,所以都會忍唔住去餵佢,佢肯食我個心又好過D!我又心諗:呢D唔係糊仔粥仔,佢亦都慣左食呢種食物,即係佢已經識得食野要咬/啜,咁就算我餵佢,佢都唔係話一啖就同我吞左去丫!同埋我覺得小朋友係遲早唔俾大人餵,要自主嘛!所以佢學識左咀嚼同點食野既技巧,我都OK!不過就要慢慢咁減少餵佢,同埋要諗諗方法點攪,都幾頭痕。

關於迪士尼美語世界:冇哥哥咁鍾意睇,可能我又比較少播DVD,不過CD係幾乎每日播,有時一日播4~5次添!計埋repeat同一隻碟。有時氹佢都會同佢唱吓啲歌仔,有啲佢會好留心聽仲會聽到就笑。

Posted in 【Baby Food】, 【Rex】成長記錄

BLW (7M27D) 第一次食牛油果:敏感

Lunch:
PASTA, 紅蘿蔔,薯仔,菜心
食得好少,完全唔係「食野MOOD」。

Snack:
日本帶返黎既水蜜桃
餵佢食

Dinner:
飯波
唔多肯食,玩完一餐之後扭計,餵佢又食。

我有用筷子餵佢食大人飯,佢成日想拎我對筷子,唔知算唔算對餐具有興趣?
不過得果七個幾八個月又太細啦~之前試過Preload Spoon俾佢,一拎就跌哂,都未放入口。
就算放入口,位置錯哂,仲要不停咬SPOON,頭又咬尾又咬,算吧啦!佢只係牙痕吧!!

至於牛油果,今日係第一次俾佢食。
非常非常林,一拎起就爛哂!
但細佬識得啜手,即係都食到D!
而且食完幾個鐘頭後發現佢塊面多左紅色粒粒,即係敏感。

Posted in 【Rex】成長記錄

牙仔相+擰頭+玩peekaboo

今日放佢喺張床度玩,終於俾我影到一張好清楚睇到牙仔嘅相啦!

仲見到佢上排都有少少白色點,應該就嚟出啦!

另外,呢排開始學識擰頭,好似明明哋係咩意思咁!有次我餵佢食嘢,佢唔想食扭扭哋計,然後就係一連串嘅擰頭!不過可能係咁橋啫!佢有時特登擰頭引人笑嘅!!

又識得自己拎住張被玩”oh~jart” (英文會易明D! 即係Peekaboo) 真係好可愛呀~原來咁細個人仔已經學識咁多野啦!如果可以盡快教識佢點去表達自己就更好,(發夢ing)因為呢個衰豬實在太鐘意發脾氣,或者係一唔滿意/唔岩佢心意就大發雷霆!D脾氣勁到不得了~~

Posted in 【Baby Food】, 【LIFE】2017, 【Rex】成長記錄

7個月(7m10d) 加固 + 去泳池游泳

20170811
Day 222
7 months 10 days
31 weeks 5 days

全日都是BLW,沒有用匙餵。
(但有用手餵給他BLW的食物)

由於早上7點半才飲第一餐奶,11點都未準備好食物給他,所以12點時第二餐也是飲奶。

然後就是1時許,因為食物已準備好了,而且哥哥也開始吃午飯,所以就直接拿給他吃。

可能不太餓,吃了一會兒粟米之後就不再吃了。

午餐:粟米、蘋果、豬肉

跟哥哥一起吃

Continue reading “7個月(7m10d) 加固 + 去泳池游泳”

Posted in 【Baby Food】, 【Rex】成長記錄

7個月(7M9D) 加固食物:蕃薯、青瓜、蜜糖豆、薯仔、藍莓、紅桑子、雞肉、蘋果、啤梨、白飯

20170810
Day 221
7 months 9 days
31 weeks 4 days

當我在打文章題目時,自己也嚇了一跳!怎麼一日已經吃了這麼多種食物呢?真的假的??

午餐:蕃薯,青瓜,蜜糖豆

另外還準備了一碗薯仔+蜜糖豆+雞蓉,只吃了很少,可能太乾了,不喜歡吃吧!

下午在超市買了好多蔬果回家,所以就加了藍莓和紅桑子 (Raspberry) 給他當點心吃,不過是我餵他的。照舊一開二,吃得很好,沒有咳和 gagging 之類。

幾乎全部為Rex而買,好貴啊!

Continue reading “7個月(7M9D) 加固食物:蕃薯、青瓜、蜜糖豆、薯仔、藍莓、紅桑子、雞肉、蘋果、啤梨、白飯”

Posted in 【Baby Food】, 【Rex】成長記錄

懂得「打嘩嘩」

Day 215
7 month 3 days
30 week 5 days

昨晚哥哥跟弟弟玩「打嘩嘩」,即哥哥輕拍弟弟的嘴巴,弟弟竟然真的懂得發出聲音!製造出好像在說:「嘩、嘩、嘩」的聲音。

由於我只看見,沒有聽到,所以本來不太相信……

剛才我們在地墊上,哥哥又再輕拍弟弟嘴巴,弟弟真的會即時發生「嘩」的聲音!這一幕,就在我眼前發生!是真的啊!弟弟真的會玩這個遊戲呢!
其實早在個多兩個月前 (?) 我們已經玩過好多次了!或者之後哥哥也有間中跟他玩吧?所以他記得。

另外,近月都經常坐著時,屁股上上下下的在”un”!! 近日還開始懂得用雙瞓的力量去撐高身體,近乎想要爬的向前傾!

今日自己拿著吃的食物是~
上午:蘋果,西蘭花
晚上:粟米,菜心

午餐:菜心豬肉米糊
晚餐:燕麥糊+1/5個蛋黃 (本來給4份1個,但給他打到掉在地上了)

今日曾經出現過雙膝撐起上半身,像這樣。應該快會學懂得爬了?